1Ath 2
2
Ũthũkũmi wa Vaũlo Thesalonika
1Mbaitũ inyw'ĩ ene nĩmwĩsĩ kana kũmũthokea kwitũ kũyaĩ kwa mana. 2#Meko 16.19-24; 17.1-9 Nĩmũũlilikana kana tũtanamba kũka kwenyu Thesalonika, nĩtwathĩnĩtw'e mũno na kũumangwa twĩ Vilivi. Ĩndĩ Ngai nĩwatũnengie ũkũmbaũ wa kũtavany'a Ũvoo Mũseo wake kwenyu, o na kau nĩtwasiĩĩawa mũno. 3Kũmwĩsũva kwitũ kũyumanĩte na ũvũngũ kana wendi mũthũku, o na tũikwenda kũtũmĩĩa mũndũ ũseleke. 4Vandũ va ũu, o ũndũ Ngai woonie twaĩlĩtwe nĩ kũsũvĩa ũla Ũvoo Mũseo, now'o tũneenaa. Tũimanthaa kwendeesya andũ, ĩndĩ tũmanthaa kũmwendeesya Ngai ũla ũoasya mawendi maitũ. 5Inyw'ĩ nĩmwĩsĩ nesa kana tũyaatũmĩa ndeto sya kũkathĩĩa mũndũ mana, kana tũkatũmĩa ndeto sya kũvitha wendi wa syĩndũ, na Ngai nĩ ngũsĩ. 6Ithyĩ tũyamanthaa ndaĩa kuma kwa andũ, kuma vala mũĩ, kana kuma kwa andũ angĩ, 7o na kau ta atũmwa ma Klĩsto twaĩ tũtonya kwenda ũtethyo kuma vala mũĩ. Ĩndĩ twaĩ auu yĩla twaĩ nenyu ta inyia wa syana akĩea syana syake mwene. 8Nĩtwamwendete mũno ũkethĩa o na tyo Ũvoo Mũseo kuma kwa Ngai tweeyũmbanĩtye kũmũnenga w'oka, ĩndĩ o vamwe na mathayũ maitũ, nũndũ mwaĩ mũnatw'ĩka endwa maitũ.
9Kwa w'o mbaitũ nĩmũũlilikana ũndũ twatethasya wĩa na kũnyamaa; twathũkũmaa ũtukũ na mũthenya, nĩ kana tũikamũtw'ĩkĩe mũio tũimũtavya Ũvoo Mũseo kuma kwa Ngai. 10Inyw'ĩ mwĩ ngũsĩ, o na Ngai nĩ ngũsĩ, kana mwĩkalo witũ kwenyu inyw'ĩ aĩkĩĩi waĩ mũtheu na mũlũngalu, na ndwaĩ ũwetwa ũndũ mũthũku. 11Nĩmwĩsĩ kana tweekie kĩla ũmwe wenyu o ũndũ ĩthe wa syana wĩkaa syana syake. 12Nĩtwamũthangaaisye, twamũkiakisya na twamwĩsũva mwĩkalae mwĩkalo wa kũmwendeesya Ngai, ũla ũmwĩtaa mũlike ũsumbĩnĩ na ũkumyonĩ wake.
13O ta ũu nĩtũmũtũngĩaa Ngai mũvea, nũndũ yĩla mwavikĩiwe nĩ Ũvoo Mũseo kuma kwa Ngai, ũla mweewie kuma vala tũĩ, mũyaawosa ta ũvoo wumĩte kwa mũndũ, ĩndĩ ũndũ w'o ũilyĩ: Ũvoo Mũseo kuma kwa Ngai, ũla nĩw'o ũtethasya wĩa nthĩnĩ wenyu inyw'ĩ aĩkĩĩi. 14#Meko 17.5 Mbaitũ, kweethĩiwe kwenyu o ũndũ kweethĩiwe kwa makanisa ma Ngai nthĩ ya Yutia, kwa andũ ala me nthĩnĩ wa Klĩsto Yesũ. Mwathĩniw'e nĩ andũ menyu mathĩna o ala mo mathĩniw'e nĩ Ayuti, 15#Meko 9.23,29; 13.45,50; 14.2,5,19; 17.5,13; 18.12 ala mooaie Mwĩai Yesũ na athani na matũlũngya kũu. Andũ asu maimwendeeasya Ngai na nĩ nthũ sya kĩla mũndũ! 16O na matũsiĩĩaa tũikatavye Andũ-ma-mbaĩ-ingĩ ũvoo wa kũmaetee ũtangĩĩo. Ũu nĩw'o maendeeie kwingĩvĩĩsya naĩ syoo, ĩndĩ yu ũthatu wa Ngai nũmavikĩĩte.
Wendi wa Vaũlo wa Kũthokea Athesalonika ĩngĩ
17Mbaitũ, yĩla ithyĩ twataanĩiw'e nenyu kwa kavinda, kwa mĩĩ eka veva, nĩtwekalile twĩ na wendi mũnene wa kũmwona, na twatata twonane nenyu kwa metho. 18Kwa w'o nĩtwendaa kũsyoka ĩngĩ kwenyu. Nyie takwa Vaũlo nĩnatatie kaingĩ, ĩndĩ Satani atũsiĩĩa. 19Mwĩona wĩkwatyo witũ, ũtanu witũ, ngovia ya ũsindi ya kwĩkathĩĩa nayo mbee wa Mwĩai waitũ Yesũ yĩla wĩũka ta ĩkethĩwa kyaũ? Ninyw'ĩ. 20Ĩĩ, inyw'ĩ ninyw'ĩ nguma yaitũ na ũtanu witũ!
BIBLE SOCIETY OF KENYA © 2011