मत्ती 8

कोढ़ी बझ़ानो

(मरक. 1:40-45;लूक. 5:12-16)

1ज़ैखन तै पहैड़ी पुड़ां उन्ढो अव, त बड़े लोक तैस पत्पती च़ले। 2तैखन एक्‍की कोढ़े यीशु कां ज़ैन्धु केरे भारे बिशतां तैस कां मिन्नत केरतां ज़ोवं, “हे प्रभु अगर तू चास त मेरू कोढ़ बज़्झ़ेई सकतस।” 3यीशुए तैस पुड़ हथ रेखतां ज़ोवं, “अवं चाताईं, तू बज़्झ़ोस।” ते तै कोढ़ी तैखने साफ भोइ जेव। 4यीशुए तैस सेइं ज़ोवं, “हेर, एस गल्‍लरे बारे मां केन्ची सेइं किछ न ज़ोइयां। बल्के अपनो आप याजके हिरा। तैल्‍ला पत्ती, तू अपने बेज़्झ़ोनेरे वजाई सेइं च़ढ़तल च़ाढ़, ज़ेसेरे बारे मां मूसा नेबे कानूने मां हुक्म दित्तोरोए, ताके लोकन पतो च़ले कि तू बेज़्झ़ोरोस।”

एक्‍की सूबेदारेरो यीशु पुड़ विश्वास

(लूक. 7:1-10)

5ज़ैखन यीशु कफरनहूम नगर मां अव त अक रोमी सूबेदार ज़ै 100 सिपेहिन केरो अफसर थियो, तैनी यीशु कां एइतां बिनती की। 6“हे प्रभु, मेरो नौकर अधरंगेरो मरीज़ घरे बिमार भोवरोए, तै च़लनेरे काबल नईं, ते तै बेड़ि तकलीफी मांए।” 7तैनी तैस सेइं ज़ोवं, “अवं एज्जेलो ते तैस बज़्झ़ेइलो।” 8सूबेदार#8:8 सूबेदार: ए यहूदी नईं थियो एल्हेरेलेइ तै ज़ोने लग्गोरो थियो अवं इस काबल नईं। ज़ोने लगो, हे प्रभु अवं एस काबल नईं कि तू मेरे घरे मां एज्जी सकस; पन तू अगर सिर्फ ज़बाना सेइं ज़ोस त मेरो नौकर बेज़्झ़ोलो। 9किजोकि अवं भी केन्चेरे अधिकारे मां कम केरताईं, ते सिपाही मेरे अधीन आन, ते ज़ैखन एक्‍की जो ज़ोताईं कि गा, त तै गाते ते होरि जो ज़ोतां एई, त तै एइते, ते अपने सेवके जो ज़ोताईं इन कम केर त तै केरते।

10यीशु एन शुन्तां हैरान रेइ जेव, ते एप्पू पत्ती च़लनेबाले मैन्हन सेइं ज़ोने लगो, “अवं तुसन सेइं सच़ ज़ोताईं, कि मीं इस्राएल मुल्खे मां इस गैर यहूदी मैन्हेरो ज़ेरो मैन्हु नईं लवरो ज़ै मीं पुड़ एत्रो विश्वास केरे।” 11अवं तुसन सेइं ज़ोताईं कि बड़े गैर कौमां केरे लोक पूर्बेरां ते पछमेरां एइतां अब्राहमे, इसहाक ते याकूबे सेइं साथी परमेशरेरे राज़्ज़ेरी धामी मां शामल भोल्हे। 12पन इस्राएली लोक बेइर आंधरे मां छ़ड्डे गाले ज़ैड़ी तैना लेरां देते ते दंत च़ापते राले। 13ते यीशुए तैस सूबेदारे सेइं ज़ोवं, “घरे जो गा, ज़ेरो तेरो विश्वासे तेरे लेई तेरहु भोल्हु,” ते तैखने तैसेरो नौकर बेज़्झ़ोइ जेव।

यीशु बड़े लोकन बझ़ाते

(मरक. 1:29-34;लूक. 4:38-41)

14ज़ैखन यीशु पतरसेरे घरे जेव, त तैनी हेरू, कि पतरसेरी शिखी बड़ो भुखारे, ते तै लेटोरी थी। 15तैनी तैसारो हथ ट्लातो ते अकदम तैसारो भुखार उतरी जेव, ते तै खड़ी उट्ठतां तैसेरी सेवा केरने लग्गी। 16ज़ैखन ड्लोझ़ भोइ त लोकेईं बड़े बिमार, ज़ैन पुड़ भूतां केरो सायो थियो तैस कां आने, ते तैनी तैना भूतां अपने वचने सेइं कढां, ते सारे बिमार बज़्झ़ाए। 17ताके यशायाह नेबेरी ज़ोवरी तै गल पूरी भोए कि, “तैनी एप्पू इश्शी कमज़ोरी हटेइ ते इश्शी बिमैरी भी मुकेइ।”

यीशुएरे चेले बन्नेरो मतलब

(लूक. 9:57-62)

18यीशुए अपने च़ेवरे पासन मैन्हु केरि भीड़ लेइतां अपने चेलन, गलील समुन्दरे पार गानेरो हुक्म दित्तो। 19ज़ैखन तैना पार गानेरी तियारी केरने लग्गे, त तैखन अक शास्त्री मैन्हु तैस कां एइतां ज़ोने लगो, “गुरू, तू ज़ेरहां भी गालो त अवं तीं पत्ती च़लेलो।” 20यीशुए तैस जो ज़ोवं, “लौई केरि कुढां, ते अम्बरेरे च़ुड़ोलू केरे आल्हे भोतन, पन मैन्हेरे मट्ठे यानी मीं कां कोई ठार नईं ज़ैड़ी अवं झ़ुल्‍ली सेखी।” 21चेलन मरां एक्‍के होरे तैस सेइं ज़ोवं, “हे प्रभु, मीं घरे गानेरी अज़ाज़त दे, मेरे बाजेरे मरनेरां बाद अवं तैस देबतां एज्जेलो ते फिरी तीं पत्ती च़लेलो।” 22यीशुए तैस जो ज़ोवं, “तू मेरो चेलो बन ते मीं पत्ती च़ल, ते ज़ैना लोक आत्मिक तरीके सेइं मर्रेन तैन अपने मैन्हु मरने बलगने दे।”

यीशु तूफान रोकते

(मरक. 4:35-41;लूक. 8:22-25)

23ज़ैखन यीशु किश्ती मां च़ढ़ो त तैसेरे चेले भी तैस सेइं साथी च़ले। 24ते अचानक समुन्दरे मां अक बड़ो तूफान अव ते किश्ती छ़ेलहेईं सेइं छ़पने लग्गी ते यीशु तैस मां झ़ुल्‍लोरो थियो। 25तैखन चेलेईं तै बींझ़ेइतां तैस सेइं ज़ोवं, “हे प्रभु, असन बच़ा! अस त डुबने लगोरेम!” 26तैनी तैन सेइं ज़ोवं, “हे घट विश्वासे बालाव, तुस किजो डरतथ?” तैखन तैनी खड़े उट्ठतां तूफान त समुन्दर डांटो, तैखने तूफान रुकी जेव त समुन्दर बड़े शांत भोव। 27लोक हैरान भोइतां ज़ोने लग्गे, “ऐह मैन्हु कौन आए कि तूफान त समुन्दर भी एसेरो हुक्म मनतन!”

ज़ैस मैन्हु पुड़ भूतेरो सैयो थियो यीशुए तै मैन्हु बझ़ाव

(मरक. 5:1-20;लूक. 8:26-39)

28ज़ैखन तै गलील समुन्दरेरे पार, गिरासेनी इलाके मां पुज़ो, त दूई मैन्हु ज़ैन पुड़ भूतां केरो सैयो थियो कब्रन मांमेइं यीशु कां मिलने आए। तैना एत्रे निग्गर थिये, कि कोई भी तैस बत्तां निस्सी न थियो बटतो। 29तैना ज़ोरे-ज़ोरे चिन्डां मारने लग्गे ते ज़ोने लग्गे, हे परमेशरेरा मट्ठां, तीं असन सेइं कुन कम्मे? कुन तू वक्ते करां पेइले असन नरके मां छ़डने एवरोस? 30तैन करां दूर सूरां केरो अक बड़ो घान च़रने लगोरो थियो। 31भूतेईं यीशु कां मिन्नत केरतां ज़ोवं, “अगर तू असन कढने चातस त उन सूरां केरे घाने मांजो भेज़।” 32तैखन यीशुए ज़ोवं, “गाथ,” तैना भूतां तैट्ठां निस्तां तैन सूरां केरे घाने मां जेआं, ते सूरां केरो सारो घान उछ़ड़तो-उछ़ड़तो डैल्‍ले मां गेइतां सारे सूर मेरि जे। 33तैखन सूरां केरे च़ारनेबालेईं एन हेरू, त तैना डेरि जे, ते तैनेईं नगरेरे लोकन सेइं सारो बिस्तार दित्तो, ते ज़ैन पुड़ भूतां केरो सैयो थियो तैन केरो हाल भी शुनाव। 34तैस नगरेरे सारे लोक यीशु सेइं मिलनेरे लेई आए ते यीशु लेहितां लोक मिन्नत केरतां ज़ोने लग्गे, इश्शे इलाके मरां च़लो गा।

Obecnie wybrane:

मत्ती 8: BHDNT

Podkreślenie

Udostępnij

Porównaj

Kopiuj