मत्ती 23

यीशु अपने चेलन ते होरि लोकन ज़ोते शास्त्री ते फरीसी लोकन करां खबरदार राथ।

(मरक. 12:38-39;लूक. 11:43,46;लूक. 20:45-46)

1तैखन यीशुए बड़े लोकन सेइं ते अपने चेलन सेइं एन ज़ोवं। 2“शास्त्री ते फरीसी लोक मूसेरो कानून समझ़ाने बालेन। 3एल्हेरेलेइ ज़ैन किछ तैना तुसन ज़ोतन तैन तुस केरा ते मन्ना, पन तैन केरां ज़ेरां कम्मां न केरा, किजोकि तैना ज़ोने त ज़ोतन पन केरन नन्ना। 4तैना अपने मेर्ज़ी सेइं कानून बनातन ज़ैना लोकां केरे लेई मन्ने मुश्किल भोतन, पन एप्पू अपने कानूने मन्नेरी कोशिश भी न केरन। 5तैना ज़ैन किछ केरतन सिर्फ मैन्हन हिरानेरे लेई केरतन, तैना अपने कुपाए ते पैखड़न पुड़ पवित्रशास्त्रेरे वचन लिखतां बड्डे-बड्डे जन्त्रां केरे ज़ेरे बन्धतन, ते अपने चोगन पुड़ लम्मो गुच्छे लातन (ताके लोक समझ़न तैना बड़े धर्मी आन)। 6तैना धामन मां खास ठैरी बिशनू चातन, ते प्राथना घरे मां खास कुर्सन पुड़ बिशनू चातन। 7ते तैना चातन कि लोक तैन्न जो बज़ारन मां नमस्कार ज़ोन, ते तैन्न जो गुरू ज़ोन। 8पन तुस अपने आपे जो गुरू न ज़ुवेइयथ, किजोकि तुश्शो अक्‍के गुरू आए, ते तुस सब ढ्लां केरे ज़ेरे बराबर आथ। 9ते दुनियाई मां केन्ची जो (आत्मिक) बाजी न ज़ोइयथ, किजोकि तुश्शो अक्‍के बाजी आए ज़ै सुर्गे मां आए। 10ते न केन्ची जो मालिक ज़ोइयथ किजोकि तुश्शो अक्‍के मालिके ज़ै मसीह आए। 11पन ज़ै तुसन मां बड्डो भोनू चाते, त तै तुश्शो सेवक बने। 12ते ज़ै कोई अपनो आप बड्डो बनानेरी कोशिश केरते, त तै निकड़ो बनाव गालो, ते ज़ै कोई अपनो आप निकड़ो बनाते त तै बड्डो बनाव गालो।”

शास्त्री ते फरीसी लोकां केरे पाखंडे पुड़ झ़िड़क

(मरक. 12:40;लूक. 11:39-42,44,52;20:27)

13तैखन यीशुए ज़ोवं, “हे पाखंडी शास्त्री ते फरीसी लोकव, तुसन पुड़ अफ़सोस, किजोकि तुस सुर्गेरे राज़्ज़े मां लोकन दाखल भोने न देथ, किजोकि न तुस एप्पू दाखल भोथ, ते न होरन दाखल भोने देथ। 14हे पाखंडी शास्त्री ते फरीसी लोकव तुसन पुड़ अफ़सोस, तुस विधवा कुआन्शां केरे घरन लुटतथ, ते लोकन हिरानेरे लेई लेम्मी-लेम्मी प्राथना केरतथ, तुसन जादे सज़ाह मैल्हेली।”

15“हे पाखंडी शास्त्री ते फरीसी लोकव, तुसन पुड़ अफ़सोस! तुस अक मैन्हु अपने धर्मे मां आन्नेरे लेई बड़े दूर-दूर गातथ, ते ज़ैखन तै तुश्शी शिक्षा मन्ते त तैस एप्पू करां दुगनो नरके मां गानेरे काबल बनातथ।”

16“हे बत हिराने बाले कानाव, तुसन पुड़ अफ़सोस, कि तुस ज़ोतथ कि अगर कोई मन्दरेरी कसम केरे त कोई हर्ज़ नईं, पन अगर मन्दरेरे सोन्नेरी कसम केरे, त तैसेरी कसमरो पाबंद भोल्हो। 17हे बेवकूफ ते कानाव, बड्डू कुन आए सोन्नू या मन्दर, ज़ेसेरी वजाई सेइं सोन्नू पवित्र समझ़ू गाते?” 18“तुस ज़ोतथ कि अगर कोई बलिदान च़ाढ़नेरे ठारारी कसम केरे, त कोई हर्ज़ नईं, पन च़ैढ़ोरी चीज़री कसम केरे त तैसेरो पाबंद भोल्हो। 19हे कानाव! बड्डू कुन आए, च़ाढ़ोरी चीज़ या बलिदान च़ाढ़नेरे ठार ज़ेसेरी वजाई सेइं च़ाढ़ोरी चीज़ पवित्र समझ़ी गाचे? 20अगर ज़ै कोई बलिदान च़ाढ़नेरे ठारारी कसम केरते, त तै सेब्भी च़ैढ़ोरी चीज़ां केरि कसम केरते। 21ज़ै कोई मन्दरेरी कसम केरते त तै मन्दरे मां रानेबाले परमेशरेरी कसम केरते। 22ते ज़ै कोई सुर्गेरी कसम केरते, तै परमेशरेरे तखतेरी ते तैस पुड़ बिशने बालेरी कसम केरते।”

23“हे पाखंडी शास्त्री ते फरीसी लोकव, तुसन पुड़ अफ़सोस, तुस पुतनेरो ते सोंफ़ेरो ते ज़ीरेरो दशोवं हिस्सो त देतथ, पन मूसेरे कानूनेरी खास गल्‍लां ज़ेन्च़रे न्याय केरनो, दया केरनि ते ईमानदार भोनू शारोरूए, ज़रूरी थियूं तुस एन भी केरते राथे ते तैन भी न शारेथे। 24हे बत हिराने बाले कानाव! तुस मश्शे त छ़ानतथ पन सथ्थो ऊँट निगलतथ।”#23:24 तैना लोक कानूनेरी निक्‍की-निक्‍की गल्‍लां बड़े ध्याने सेइं मन्ते थिये ज़ेन्च़रे किछ पीनेरी चीज़न मरां मश्शे छ़ान्ने, पन तैना परमेशरेरे खास हुक्म न थिये मन्ते। तैन ऊँट निगलनेरू ज़ेरू आए।

25“हे पाखंडी शास्त्री ते फरीसी लोकव, तुसन पुड़ अफ़सोस, तुस कटोरो ते कने थाली बेइरमेईं खूब मांज़तथ पन अन्त्रमेईं लालच़ ते बे सबरीए भेरतांए।” 26“हे काने फरीसाव पेइले कटोरो ते थाली अन्त्रमेईं मांज़ा, ते फिरी बेइरमेईं भी साफ भोए।”

27“हे पाखंडी शास्त्री ते फरीसी लोकव तुसन पुड़ अफ़सोस, तुस तैन कब्रां केरे ज़ेरेथ ज़ैन बेइरमेईं त सफैदीए ते बेड़ि रोड़ी लेहीयोचन, पन अन्त्रमेईं मुड़दां केरि हड्डी ते सब किसमेरी गेन्दगी सेइं भेरतन। 28एन्च़रे तुस बेइरमेईं लोकन बड़े धर्मी लेइयोतथ, पन अन्त्रमेईं दुनियारे पाखंडे ते अधर्मे सेइं भेरतथ।”

शास्त्री ते फरीसी लोकन पुड़ सज़ाहरी भविष्यिवाणी

(लूक. 11:47-51)

29“हे पाखंडी शास्त्री ते फरीसी लोकव तुसन पुड़ अफ़सोस, किजोकि तुस नेबी केरे आसथान सजातथ ते धेर्मी लोकां केरि कब्रां बनातथ। 30ते ज़ोतथ कि, ‘अगर अस अपने दादे-पड़दादां केरे ज़माने मां भोथे त नेबन मारने मां तैन केरू साथ न देथे।’ 31एन्च़रे तुस एप्पू मन्तथ कि तुस नेबी केरे कत्ल केरनेबालां केरि औलादी मरां आथ। 32हुनी तुस अपने दादे-पड़दादां केरे पापेरे घड़ो भरते राथ।”

33“हे ज़ेहरीले सप्पां केरे ज़ेरे बच्‍चव! तुस नरकेरी सज़ाही करां केन्च़रे बच़ेले? 34एल्हेरेलेइ हेरा अवं नेबन ते अक्लमन्दन ते शास्त्री लोकन तुसन कां भेज़ताईं, तुस तैन मरां किछन कत्ल केरेले, ते किछन क्रूसे पुड़ च़ाढ़ेले, ते किछन अपने प्राथना घरे मां कोड़ेइं सेइं बाले, ते नगरे-नगरे मां तैन मारनेरे लेई तैन पत्ती लग्गोरे राले। 35एल्हेरेलेइ सारे धेर्मी केरो कत्ल ज़ै इस धेरती पुड़ भोवरोए, तैन केरि सज़ाह तुसन पुड़ एज्जे, धर्मी हाबिलेरे कत्ले करां लेइतां, ते बिरिक्याहरे मट्ठे जकर्याहेरे कत्ले तगर ज़ै तुसेईं मन्दरेरे ते बलिदान केरनेरे ठारारे मझ़ाटे मन्दरेरे अंगने मां कत्ल कियोरो थियो। 36अवं तुसन सेइं सच़ ज़ोताईं कि इस ज़मानेरे लोकन एना सैरी गल्‍लां केरे सज़ाह मैल्हनी।”

यरूशलेम नगरेरे लेई शोग।

(लूक. 13:34-35)

37फिरी यीशुए ज़ोवं, “हे यरूशलेम नगरेरे लोकव, हे यरूशलेम नगरेरे लोकव, तुसेईं केत्रे नबी कत्ल किये ज़ैना बड़े पेइले तुसन कां आए, ते ज़ैना तुसन कां भेज़े तुसेईं तैन घोड़ेईं बेई, मीं बड़े बार सोचू कि तेरे बच्‍चन अकोट्ठे केरि ज़ेन्च़रे कुकड़ी अपने बच्‍चन अपने फंघन हैठ रखचे पन तुस राज़ी न भोए। 38हेरा तुश्शू घर तुश्शे लेई बेरान भोइ गाते। 39किजोकि अवं तुसन सेइं सच़ ज़ोताईं, कि तुस मीं हुन्ना करां तैस दिहाड़े तगर कधे न लेई सकेले, ज़ांतगर मेरे बारे मां इन न ज़ोले, ‘तैसेरी तारीफ़ भोए ज़ै प्रभुएरे अधिकारे सेइं एइते।’”

Obecnie wybrane:

मत्ती 23: BHDNT

Podkreślenie

Udostępnij

Porównaj

Kopiuj