मत्ती 15

रीति रुवाज़ मन्नेरे बारे मां सवाल

(मरक. 7:1-13)

1तैखन किछ फरीसी ते किछ शास्त्री लोक यरूशलेम नगरे मरां यीशु कां आए ते ज़ोने लग्गे। 2“तेरे चेले बुज़ुर्गां केरि रसमरे खलाफ किजो च़लतन, तैना रोट्टी खाने करां पेइले हथ न धोन?” 3तैनी तैन जुवाब दित्तो, “तुस किजो अपने रसमन सेइं परमेशरेरो हुक्म ट्लोड़तथ? 4किजोकि परमेशरे ज़ोवरूए, कि अपने हाज बव्वेरी इज़्ज़त केरा, ते ज़ै कोई अपने हाज बव्वे जो बुरू ज़ोलो तै मारो गालो। 5पन तुस ज़ोतथ, कि ज़ै कोई बाजी या अम्मा सेइं ज़ोए कि, मीं करां ज़ै किछ मद्दत तुसन मैल्ही सकती थी, तै पेइली बलिदान भोवरीए, यानी परमेशरे जो च़ढ़तल च़ाढ़ोरीए 6त तै अपने बाजी केरि इज़्ज़त न केरे, एन्च़रे तुस अपने रसमन सेइं परमेशरेरो हुक्म ट्लोड़तथ। 7हे पाखंडी लोकव, यशायाह नेबे तुश्शे बारे मां ई भविष्यिवाणी ठीक कियोरीए,

8एना लोक ऐशी सेइं त मेरी बड़ी तारीफ़ केरतन,

पन एन केरे दिल मीं करां बड़े दूर आन।

9एना लोक बेफैइदी मेरी आराधना केरतन,

किजोकि एना मैन्हु केरे हुक्मां केरि शिक्षा देतन।”

मैन्हु ज़ुट्ठो केरनेबैली गल्‍लां

(मरक. 7:14-23)

10फिरी मैन्हु एप्पू कां कुजेइतां ज़ोवं, “शुना, ते समझ़ा। 11ज़ै चीज़ ऐशी मां गाचे तैस सेइं मैन्हु ज़ुट्ठो न भोए, पन ज़ैन तैसेरे ऐशी मरां बेइरोवं निस्ते, तैन्ने तैस ज़ुट्ठू केरते।” 12तैखन चेलेईं यीशु कां एइतां ज़ोवं, “कुन तू ज़ानतस कि फरीसी लोकेईं ए गल शुन्तां ठोकर खाइ?” 13तैनी जुवाब दित्तो, “ज़ै बुट मेरे सुर्गेरे बाजे नईं लेवरो तै ज़ीलना पुटतां छ़डनोए। 14तैन केरि परवाह न केरा, तैन काने बत हिराने बालेन, अगर अक कानो होरि काने बत हिराए, त तैना दूईये गढे मां बिछ़ड़ेले।”

15एन शुन्तां पतरसे ज़ोवं, “ए मिसाल असन समझ़ा।” 16यीशुए ज़ोवं, “कुन तुस हेजू भी बेसमझ़थ?” 17“कुन तुस न ज़ानथ, कि ज़ैन किछ ऐशी मां गाते तैन पेटे मां गाते, ते फिरी पेटे मरां बेइर निस्ते? 18पन ज़ैन किछ मैन्हेरे अन्त्रेरां निस्ते, तैन दिले मरां निसते, तैन्ने मैन्हु ज़ुट्ठो केरते? 19किजोकि बुरे खियाल, कत्ल केरनो, अड्लाहे देइने गलत कम केरनू, बदमाशी, च़ोरी, झूठी गवाही देनी, ते तुहीन दिले मरां निसचे। 20एन एरी गल्‍लन ज़ैना मैन्हु ज़ुट्ठो केरचन, पन हथ धोने बगैर रोट्टी खाने सेइं मैन्हु ज़ुट्ठो न भोए।”

कनानी कौमरे कुआन्शरो यीशु पुड़ विश्वास

(मरक. 7:24-30)

21यीशु तैट्ठां च़लो जेव, ते सूर ते सैदारे आसे पासेरे इलाकेरे नेड़े अव। 22तैस इलाकेरी अक कनानी कुआन्श यीशु कां आई, ते चिन्डां मैरतां ज़ोने लग्गी, “हे प्रभु दाऊदेरा मट्ठां, मीं पुड़ दया केर, मेरी कुइये पुड़ भूतेरो सैयोए, तैन भूत तैस बड़ू सताते।” 23पन यीशुए कोई जुवाब न दित्तो, तैसेरे चेले नेड़े एइतां तैस कां मिन्नत केरने लग्गे, “एस भेज़, किजोकि ऐह चिन्डां मारचे ते इश्शो पीछो न छ़डे।” 24तैनी जुवाब दित्तो, “अवं इस्राएलेरी हेरोरि भैड्डां केरे अलावा होरि कोन्ची कां नईं भेज़ोरो।” 25पन तै कुआन्श आई, ते तैस कां मथ्थो टेकतां ज़ोने लग्गी, “हे प्रभु मेरी मद्दत केर।” 26तैनी जुवाब दित्तो, “बच्‍चां#15:26 बच्‍चां बच्‍चां केरो मतलब इड़ी यहूदी लोकन ते कुतरां केरो मतलब गैर कौमां केरे लोकन। केरि रोट्टी नेइतां कुतरन देनी ठीक नईं।” 27तैसां ज़ोवं “सच़्च़े प्रभु, पन ज़ैन टुक्ड़े मालिकेरी मेज़े पुड़ेरां बिछ़ड़तन तैना कुतरां भी खातन।” 28यीशुए तैस जुवाब दित्तो, “ऐह कुआन्श तेरो विश्वास बड़ोए, ज़ेरू तू चातिस तेरे लेई तेरहु भोए” ते तैसारी कुई तैखने बेज़्झ़ोइ जेई।

यीशु अलग-अलग किसमेरे रोगी बज़्झ़ाते

29यीशु तैट्ठां निस्तां गलील समुन्दरेरे बन्ने पुड़ अव, तैखन तै एक्‍की पहाड़े पुड़ गेइतां बिश्शी जेव। 30ते बड़े लोकां केरि भीड़ तैस कां आई, तैन लोकेईं एप्पू सेइं साथी टोन्टे, काने, लट्टे, डोंडे ते होरे काई एरे ज़ेरे मैन्हु साथी आने, ते तैसेरे पव्वन कां छ़ड्डे, ते तैनी तैना सब बज़्झ़ाए। 31ज़ैखन लोकेईं हेरू कि लट्टे गल्‍लां केरतन कमज़ोर तकड़े भोतन, टोन्टे च़लतन ते काने लातन त तैना बड़े हैरान भोइ जे ते इस्राएलेरे परमेशरेरी तारीफ़ केरने लग्गे।

यीशु 4000 लोकन रोट्टी खुवाते

(मरक. 8:1-10)

32यीशुए अपने चेले कुजेइतां तैन सेइं ज़ोवं, “मीं एन लोकन पुड़ बड़ो तरस एइते, एना मैन्हु ट्लेइ दिहैड़ी केरे देंते बराबर मीं सेइं साथिन, ते एन कां खाने जो किछ भी नईं। अवं एन नियन्ने भेज़ने न चैईं, कोस्कोई एरू न भोए कि एना बत्ती मां रेइ गान।” 33तैसेरे चेलेईं तैस जुवाब दित्तो “अस इस सुनसान ठैरी मां एत्रे लोकां केरे लेई रोट्टी कोट्ठां आनम, ज़ैना सेब्भी केरे लेई पूरी भोन?” 34यीशुए पुछ़ू, “तुसन कां केत्री रोट्टी आन?” तैनेईं ज़ोवं, “सत रोट्टिन ते किछ निक्‍की मेछ़ली भी आन।” 35तैखन तैनी लोकन ज़मीनी पुड़ बिशनेरे लेई ज़ोवं। 36ते यीशुए तैना सत रोट्टी ते मेछ़ली ट्लेइ, ते परमेशरेरू शुक्र केरतां ट्लोड़ी, ते अपने चेलन कां दित्ती ते चेलेईं तैना मैन्हन दित्ती। 37सारे मैन्हु रोट्टी खेइतां रेज़्ज़ी जे। तैल्‍ला पत्ती, यीशुएरे चेलेईं मेछ़ली त कने रोट्टी केरे बच़्च़ोरे टुक्ड़न मरां सत टोकरे भेरतां सल्‍ले। 38रोट्टी खाने बालां केरि तैधात कुआन्शां ते बच्‍चां केरे अलावा 4000 मड़द थिये। 39तैखन तैने तैना सब लोक भेज़े ते एप्पू किश्ती मां च़ेढ़तां मगदन इलाके जो च़लो जेव।

Obecnie wybrane:

मत्ती 15: BHDNT

Podkreślenie

Udostępnij

Porównaj

Kopiuj