यहेजकेल 38
38
गोग कै खिलाफ सन्देस
1फेर यहोवा का यो वचन मेरै धोरै पोहच्या 2“हे माणस की सन्तान, अपणा मुँह मागोग देश के गोग#38:2 गोग उरै मगोग देश के एक प्रधान का नाम गोग सै। की ओड़ करकै, जो रोश, मेशेक अर तूबल का प्रधान सै, उसके बिरुध्द भविष्यवाणी कर। 3अर न्यू कह, हे गोग, हे रोश, मेशेक, अर तूबल के प्रधान, परमेसवर यहोवा न्यू कहवै सै: देख, मै तेरै खिलाफ सूं। 4मै तेरे ताहीं घुमा ले आऊँगा, अर तेरे जबड़याँ म्ह नकेल डालकै तेरे ताहीं लिकाड़ूंगा; अर तेरी सारी सेना नै भी यानिके घोड़यां अर सवारां नै जो सारे के सारे कवच पैहरे होए एक बड़ी भीड़ सैं, जो फरी अर ढाल लिए होए सारे के सारे तलवार चलाण आळे होवैंगे; 5अर उनके गैल फारस, कूश अर पूत नै, जो सारे के सारे ढाल लिए अर टोप लगाऐ होवैंगे; 6अर गोमेर अर उसके सारे दलां नै, अर उत्तर दिशा के दूर-दूर देशां के तोगर्मा के घरान्ने, अर उसके सारे दलां नै लिकाड़ूंगा; तेरै गैल घणे देशां के माणस होवैंगे।”
7“इस करकै तू त्यार हो जा; तू अर जितनी भीड़ तेरै धोरै कठ्ठी हों, त्यार रहणा, अर तू उनका अगुआ बणना। 8घणे दिनां के बित्तण पै तेरी खबर ली जावैगी; अर अन्त के साल्लां म्ह तू उस देश म्ह आवैगा, जो तलवार के बस तै छूट्या होया होवैगा, अर जिसके बासिन्दे घणी सी जात्तां म्ह तै कठ्ठे होवैंगे; यानिके तू इस्राएल के पहाड़ां पै आवैगा जो ज्यादातर उजाड़ रहे सैं; पर वे देश-देश के माणसां के बस तै छुड़ाए जाकै सारे के सारे निडर रहैवैंगे। 9तू चढ़ाई करैगा, अर आँधी की तरियां आवैगा, अर अपणे सारे दलां अर घणे देशां के माणसां समेत बाद्दळ की तरियां देश पै छा जावैगा।”
10“परमेसवर यहोवा न्यू कहवै सै, उस दिन तेरे मन म्ह इसी-इसी बात आवैगी के तू एक बुरी युक्ति भी लिकाड़ैगा; 11अर तू कहवैगा के मै बिना शहरपनाह के गाम्मां के देश पै चढ़ाई करुँगा; मै उन माणसां के धोरै जाऊँगा जो चैन तै निडर रहवै सैं; जो सारे के सारे बिना शहरपनाह अर बिना बेड़यां अर पल्यां के बसे होए सैं; 12ताके खोसकै तू उननै लूटै अर अपणा हाथ उन खण्डहरां पै बढ़ावै जो फेर बसाए गये, अर उन माणसां कै बिरुध्द जावै जो जात्तां म्ह तै कठ्ठे होए थे अर धरती की नाभि पै बसे होए पशु अर और सम्पत्ति राक्खै सैं। 13शेबा अर ददान के माणस अर तर्शीश के व्यापारी अपणे देश के सारे जवान शेरां समेत तेरे तै कहवैंगे, ‘के तू लूटण नै आवै सै? के तन्नै धन छीनण, सोन्ना-चाँदी ठाण, पशु अर जायदाद ले जाण, अर बड़ी लूट करण नै अपणी भीड़ कठ्ठी करी सै?’”
14“इस कारण, हे माणस की सन्तान, भविष्यवाणी करकै गोग तै कह, परमेसवर यहोवा न्यू कहवै सै, जिस बखत मेरी प्रजा इस्राएल म्ह निडर बसी रहवैगी, के तेरे ताहीं इसकी खबर ना मिलैगी? 15तू उत्तर दिशा की दूर-दूर की जगहां तै आवैगा; तू अर तेरे गैल घणी सी जात्तां के माणस, जो सारे के सारे घोड़यां पै चढ़े होए होवैंगे, यानिके एक बड़ी भीड़ अर ताकतवर सेना। 16जिस तरियां बादळ धरती पै छा जावै सै, उसे तरियां तू मेरी प्रजा इस्राएल के देश पै इसी चढ़ाई करैगा। इस करकै हे गोग, अन्त कै दिनां म्ह इसाए होवैगा, के मै तेरे तै अपणे देश पै इस करकै चढ़ाई कराऊँगा, के जिब मै जात्तां के देखदे तेरे जरिये अपणे नै पवित्र ठहराऊँ#38:16 रे जरिये अपणे नै पवित्र ठहराऊँ मै अपणे बैरियाँ तै बदला लेकै पवित्र अर सही प्रगट होऊँगा।, फेर वे मेरे ताहीं पिच्छाण लेवैंगे।”
17“परमेसवर यहोवा न्यू कहवै सै, के तू ओड़ै न्ही जिसका जिक्र मन्नै पुराणे बखत म्ह अपणे दास्सां के, यानिके इस्राएल के उन नबियाँ जरिये करया था, जो उन दिनां म्ह साल्लां ताहीं या भविष्यवाणी करदे गये, के यहोवा गोग तै इस्राएलियाँ पै चढ़ाई करावैगा? 18जिस दिन इस्राएल के देश पै गोग चढ़ाई करैगा, उसे दिन मेरी जळजळाहट मेरे मुँह तै प्रगट होवैगी, परमेसवर यहोवा की याए वाणी सै। 19मन्नै जळजळाहट अर छो की आग म्ह कह्या के बेसक उस दिन इस्राएल के देश म्ह बड़ा भूकम्प होवैगा। 20अर मेरे दर्शन तै समुन्दर की मछलियाँ अर अकास के पंछी, मैदान के पशु अर धरती पै जितने जीव-जन्तु रेंगै सैं, अर धरती के उप्पर जितने माणस रहवैं सैं, सारे काँम्ब उठैगें; अर पहाड़ गिराए जावैंगे; अर चढ़ाइयाँ नाश होवैगी, अर सारी दीवार गिरकै माट्टी म्ह मिल जावैंगी। 21परमेसवर यहोवा की याए वाणी सै के मै उसके बिरुध्द तलवार चलाण कै खात्तर अपणे सारे पहाड़ां नै पुकारूँगा अर हर एक की तलवार उसके भाई कै बिरुध्द उठैगी। 22मै मरी अर खून कै जरिये उसतै मुकद्दमा लड़ूँगा; अर उसपै अर उसके दलां पै, अर उन घणी सी जात्तां पै जो उसके धोरै होवैगी, मै बड़ी झड़ी लगाऊँगा, अर ओळे अर आग अर गन्धक बरसाऊँगा। 23इस तरियां मै अपणे नै महान अर पवित्र ठहराऊँगा अर घणी सी जात्तां कै स्याम्ही अपणे ताहीं प्रगट करुँगा। फेर वे जाण लेवैंगी के मै यहोवा सूं।”
Obecnie wybrane:
यहेजकेल 38: BGC
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
