यहेजकेल 14
14
परमेसवर कै जरिये मूर्तिपूजा की घोर निन्दा
1एक दिन इस्राएल के कितणे पुरनिये मेरे धोरै आकै मेरै स्याम्ही बैठगे। 2फेर यहोवा का यो वचन मेरे धोरै पोहच्या, 3“हे माणस की सन्तान, इन आदमियाँ नै तो अपणी मूरतां ताहीं अपणे मन म्ह बणा राख्या, अर अपणे अधर्म की ठोक्कर अपणे स्याम्ही धरी सै; फेर के वे मेरे तै कुछ भी पूछण पावैंगें? 4इस करकै तू उनतै कह, प्रभु यहोवा न्यू कहवै सै: इस्राएल के माणसां म्ह तै जो कोए अपणी मूरतां ताहीं अपणे मन म्ह बणाकै, अर अपणे अधर्म की ठोक्कर अपणे स्याम्ही धरकै नबी कै धोरै आवै, उस ताहीं, मै यहोवा, उसकी घणी सी मूरतां के मुताबिक ए जवाब देऊँगा, 5जिसतै इस्राएल के माणस, जो अपणी मूरतां के जरिये मेरे ताहीं त्याग कै दूर होग्या सै, उननै मै उन्हे के मन के जरिये फँसाऊँगा।”
6“इस करकै इस्राएल के माणसां तै कह, प्रभु यहोवा न्यू कहवै सै: मुड़ो अर अपणी मूरतां नै पीठ कै पाच्छै करो; अर अपणे सारे घृणित काम्मां तै मुँह मोड़ो। 7क्यूँके इस्राएल के माणसां म्ह तै अर उसके बीच रहण आळे परदेशियाँ म्ह तै भी कोए क्यूँ ना हो, जो मेरै पाच्छै हो लेणा छोड़कै अपणी मूरतां ताहीं अपणे मन म्ह बसाया करै, अर अपणे अधर्म की ठोक्कर अपणे स्याम्ही धरै, अर फेर मेरे ताहीं अपणी कोए बात पूछण कै खात्तर नबी के धोरै आए, तो उस ताहीं मै यहोवा खुद ए जवाब देऊँगा। 8मै उस माणस कै खिलाफ होकै उस ताहीं अचम्भित करुँगा, अर निशान्नी ठहराऊँगा#14:8 निशान्नी ठहराऊँगा या मै उसनै हैरान कर दियुँगा यहे. 32:10 या हैरान कर दियुँगा के एक निशान्नी ठहरे अर कहावत बण जावै।; अर उसकी कहावत चलाऊँगा अर उसनै अपणी प्रजा म्ह तै नाश करुँगा; फेर थम माणस जाण ल्योगे के मै यहोवा सूं। 9जै नबी नै धोखा खाकै कोए वचन कह्या हो, तो जाणो के मन्नै यहोवा नै उस नबी ताहीं धोखा दिया सै#14:9 मन्नै यहोवा नै उस नबी ताहीं धोखा दिया सै यो एक सच सै के बुराई अर भलाई दोन्नु परमेसवर सै। वो अपणी इच्छा कै मुताबिक उनका इस्तमाल करै सै के माणस की वफादारी नै परखै अर उसनै अन्ततः अपणी बेट्टियाँ के शोधन म्ह साथ देणिया बणावै।; अर मै अपणा हाथ उसके बिरुध्द बढ़ाकै उसनै अपणी प्रजा इस्राएल म्ह तै नाश करुँगा। 10वे सारे माणस अपणे-अपणे अधर्म का बोझ ठावैगें, यानिके जिसा नबी तै पूछण आळे का अधर्म ठहरैगा, उसाए नबी का भी अधर्म ठहरैगा। 11ताके इस्राएल के माणस आगै तै मेरे पाच्छै हो लेणा ना छोड्डै अर ना अपणे ढाळ-ढाळ के अपराध्धां के जरिये आगै तै अशुद्ध बणै; बलके वे मेरी प्रजा बणै अर मै उनका परमेसवर ठहरूँ, प्रभु यहोवा की याए वाणी सै।”
नूह, दानिय्येल, अर अय्यूब
12फेर यहोवा का यो वचन मेरे धोरै पोहच्या, 13“हे माणस की सन्तान, जिब किसे देश के माणस मेरे तै बिश्वासघात करकै पापी हो जावै, अर मै अपणा हाथ उस देश कै बिरुध्द बढ़ाकै उसका अन्नरूपी आधार दूर करुँ, अर उस म्ह काळ भेजकै उस म्ह तै माणस अर पशु दोनुआं नै नाश करुँ, 14फेर चाहे उस म्ह नूह, दानिय्येल अर अय्यूब#14:14 नूह, दानिय्येल अर अय्यूब ये तीन माणस असाधारण उदाहरण सैं जो अपणी स्वामी-भक्ति कै कारण माणसां पै आणआळे विनाश तै बचाये गये थे। ये तीन्नु माणस भी हों, फेर भी वे अपणी धार्मिकता कै कारण सिर्फ अपणी ए जान नै बचा सकैगें; प्रभु यहोवा की याए वाणी सै। 15जै मै किसे देश म्ह दुष्ट जन्तु भेज्जूँ जो उस ताहीं निर्जन करकै उजाड़ देवैंगे, अर जन्तुआं कै कारण कोए उस म्ह होकै ना जावै, 16तो चाहे उस म्ह वे तीन्नु धर्मी माणस हों, फेर भी प्रभु यहोवा की या वाणी सै, मेरे जीवन की कसम, ना वे बेट्टयाँ नै अर ना बेटियाँ नै बचा सकैगें; वेए एक्ले बचैंगें; पर देश उजाड़ हो जावैगा। 17जै मै उस देश पै तलवार खींचकै कहूँ, ‘हे तलवार उस देश म्ह चाल;’ अर इस तरियां मै उस म्ह तै माणस अर पशु नाश करुँ, 18फेर चाहे उस म्ह वे तीन्नु धर्मी माणस भी हों, फेर भी प्रभु यहोवा की या वाणी सै, मेरे जीवन की कसम, ना तो वे बेट्टयाँ नै अर ना बेटियाँ नै बचा सकैगें, वेए एक्ले बचैंगें। 19जै मै उस देश म्ह मरी फैलाऊं अर उसपै अपणी जळजळाहट भड़काकै उसका लहू इसा बहाऊँ के ओड़ै के माणस अर पशु दोन्नु नाश हों, 20तो चाहे नूह, दानिय्येल अर अय्यूब भी उस म्ह हों, फेर भी, प्रभु यहोवा की या वाणी सै, मेरे जीवन की कसम, वे ना बेट्टयाँ नै अर ना बेटियाँ नै बचा सकैगें, अपणी धार्मिकता के जरिये वे सिर्फ अपणी जान नै बचा सकैगें।”
21“क्यूँके प्रभु यहोवा न्यू कहवै सै: मै यरुशलेम पै अपणे च्यांरु तरियां की सजा भेज्जूँगा, यानिके तलवार, काळ, दुष्ट जन्तु अर मरी, जिसतै माणस अर पशु सारे उस म्ह तै नाश हों।#14:21 प्रका. 6:8 22फेर भी उस म्ह थोड़े-से बेट्टे-बेटियाँ बचैंगी जो ओड़ै तै लिकाड़कै थारे धोरै पोहचाई जावैगी, अर थम उनके चाल चलण अर काम्मां नै देखकै उस विपत्ति कै बारै म्ह जो मै यरुशलेम पै गेरूँगा, बलके जितनी विपत्ति मै उसपै गेरूँगा, उन सारया कै बारे म्ह शान्ति पाओगे। 23जिब थम उनका चाल चलण अर काम देक्खो, फेर वे थारी शान्ति के कारण होवैंगे; अर थम जाण ल्योगे के मन्नै यरुशलेम म्ह जो कुछ करया, वो बिना कारण न्ही करया, प्रभु यहोवा की याए वाणी सैं।”
Obecnie wybrane:
यहेजकेल 14: BGC
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
