Lukas 3
3
Yohanes Tukang Baptis
3:1-20
(Mat 3:1-12; Mrk 1:1-8; Yoh 1:19-28)
1Waktu su 15 taun Tiberius jadi Raja Besar Roma, Pontius Pilatus de gubernur daera Yudea, Herodes raja wilaya Galilea. Trus Herodes pu sodara Filipus, de raja wilaya Iturea deng Trakhonitis, trus Lisanias raja wilaya Abilene. 2Waktu itu juga, Hanas sama Kayafas yang jadi Pemimpin Imam. Trus Allah bicara sama Yohanes, Zakharia pu anak yang waktu itu de tinggal di tempat sepi yang kring.
3Trus Yohanes de pigi ke smua daera Yordan deng kastau kalo dong harus tobat, trus dapa baptis supaya dapa kas ampun dari dong pu dosa-dosa. 4Sperti yang tatulis dalam kitab Nabi Yesaya,
“Ada suara yang batariak di tempat sepi yang kring,
‘Kas siap jalan untuk Tuhan,
kas lurus jalan untuk Dia.
5 Timbun tempat-tempat yang renda,
kas rata gunung-gunung deng tempat yang tinggi,
kas lurus jalan yang belok-belok,
trus kas rata jalan yang batu-batu. # 3:4-5 Kas siap jalan untuk Tuhan ... trus kas rata jalan yang batu-batu ‒ Disini Yohanes pake kata kiasan untuk dorong orang-orang untuk tobat dari dong pu dosa-dosa trus kas siap diri untuk sambut Tuhan datang.
6 Smua orang nanti liat bagemana Allah kas slamat orang-orang!’ ”#Yesaya 40:3-5
7Banyak orang yang datang untuk Yohanes baptis dorang. Yohanes kastau sama dong begini,
“Kam ini ular bisa pu turunan! Sapa yang kas ingat kam untuk lari dari Allah pu mara besar yang nanti datang? 8Kalo memang kam su tobat dari dosa, kas hasil bua yang pantas untuk orang yang su tobat dari dosa. Jang kam pikir dalam hati, ‘Tong slamat karna bapa Abraham tu tong pu nene moyang!’ Dengar eh, Allah bisa bikin anana untuk bapa Abraham dari batu-batu ini! 9Kapak su siap mo tebang pohon sampe ke akar-akar, jadi pohon yang tra kas hasil bua yang baik, pasti dapa tebang trus buang ke api.”#Matius 7:19
10Orang-orang dong tanya Yohanes, “Kalo begitu, apa yang musti tong bikin?”
11Yohanes de bilang, “Sapa yang punya dua baju, de musti kasi satu sama yang tra pu baju, juga orang yang pu makanan, de musti bagi sama orang yang trada makanan.”
12Orang-orang tukang tagi pajak dong juga datang mo baptis trus dong tanya sama dia, “Bapa guru, apa yang musti tong bikin?”
13Yohanes kastau, “Jang tagi lebi banyak dari yang musti ko tagi.”
14Pasukan tentara juga tanya sama dia, “Kalo tong, apa yang musti tong bikin?”
Yohanes de jawab sama dong, “Jang kam kuras deng pras orang, kas cukup kam pu hidup deng kam pu gaji.”#3:14 kam pu gaji ‒ Tentara dong pu gaji kecil jadi dong biasa paksa orang untuk ambil uang ato barang.
15Waktu itu orang-orang dong tanya-tanya, kalo Yohanes ni ka Raja Yang Allah Pili yang dong tunggu-tunggu. 16Jadi Yohanes jawab deng bilang smua orang dong begini,
“Orang yang pu kuasa lebi besar dari saya, De nanti datang, mo buka De pu tali spatu saja sa tra pantas. Sa baptis kam deng air, tapi De nanti baptis kam deng Roh Allah juga deng api. 17De su mo kas pisa orang yang baik deng yang jahat, macam orang yang su pegang tapis untuk kas pisa biji gandum dari ampas. Biji gandum De kumpul ke De pu tempat simpan, tapi smua ampas De nanti bakar di api yang tra bisa padam.”
18Yohanes de trus pake kata-kata sperti itu kas naseat orang, deng kastau Brita Baik. 19Juga, Yohanes tegur Herodes yang pu kuasa di Galilea karna masala Herodias, de pu sodara pu istri,#3:19 masala Herodias, de pu sodara pu istri ‒ Herodes de kawin deng Herodias, padahal dari hukum Musa tu laki-laki tra bole kawin deng de pu ade ato de pu kaka pu istri kalo kaka ato ade masi hidup (Imamat 18:16). juga tentang smua yang jahat, yang de su bikin. 20Tapi Herodes tamba bikin jahat lagi, de suru orang kas masuk Yohanes ke penjara.
Yesus dapa baptis
3:21-22
(Mat 3:13-17; Mrk 1:9-11; Yoh 1:32-34)
21Waktu smua orang banyak itu su dapa baptis, Yesus juga dapa baptis. Baru De ada doa begini, tiba-tiba langit tabuka, 22trus Roh Allah De turun ke Yesus bentuk sperti burung merpati di atas Dia. Trus ada suara dari langit, “Ko ini Sa pu Anak yang Sa sayang. Ko bikin Sa pu hati snang.”
Yesus pu daftar nene moyang
3:23-38
(Mat 1:1-17)
23Waktu Yesus mulai De pu kerja, De pu umur kurang lebi 30 taun. Orang-orang dong tau Yesus tu Yusuf pu anak.
Yusuf pu bapa tu Eli.
24Eli pu bapa tu Matat,
Matat pu bapa Lewi,
Lewi pu bapa Malkhi,
Malkhi pu bapa Yanai,
Yanai pu bapa Yusuf.
25Yusuf pu bapa Matitia,
Matitia pu bapa Amos,
Amos pu bapa Nahum,
Nahum pu bapa Hesli,
Hesli pu bapa Nagai.
26Nagai pu bapa Maat,
Maat pu bapa Matitia,
Matitia pu bapa Simei,
Simei pu bapa Yosekh,
Yosekh pu bapa Yoda.
27Yoda pu bapa Yohanan,
Yohanan pu bapa Resa,
Resa pu bapa Zerubabel
Zerubabel pu bapa Sealtiel,
Sealtiel pu bapa Neri.
28Neri pu bapa Malkhi,
Malkhi pu bapa Adi,
Adi pu bapa Kosam,
Kosam pu bapa Elmadam,
Elmadam pu bapa Er.
29Er pu bapa Yosua,
Yosua pu bapa Elieser,
Elieser pu bapa Yorim,
Yorim pu bapa Matat,
Matat pu bapa Lewi.
30Lewi pu bapa Simeon,
Simeon pu bapa Yehuda,
Yehuda pu bapa Yusuf,
Yusuf pu bapa Yonam,
Yonam pu bapa Elyakim.
31Elyakim pu bapa Melea,
Melea pu bapa Mina,
Mina pu bapa Matata,
Matata pu bapa Natan,
Natan pu bapa Daud.
32Daud pu bapa Isai,
Isai pu bapa Obed,
Obed pu bapa Boas,
Boas pu bapa Salmon,
Salmon pu bapa Nahason.
33Nahason pu bapa Aminadab,
Aminadab pu bapa Admin,
Admin pu bapa Arni,
Arni pu bapa Hezron,
Hezron pu bapa Peres,
Peres pu bapa Yehuda.
34Yehuda pu bapa Yakub,
Yakub pu bapa Ishak,
Ishak pu bapa Abraham,
Abraham pu bapa Terah,
Terah pu bapa Nahor.
35Nahor pu bapa Serug,
Serug pu bapa Rehu,
Rehu pu bapa Peleg,
Peleg pu bapa Eber,
Eber pu bapa Salmon.
36Salmon pu bapa Kenan,
Kenan pu bapa Arpakhsad,
Arpakhsad pu bapa Sem,
Sem pu bapa Nuh,
Nuh pu bapa Lamekh.
37Lamekh pu bapa Metusalah,
Metusalah pu bapa Henokh,
Henokh pu bapa Yared,
Yared pu bapa Mahalaleel,
Mahalaleel pu bapa Kenan.
38Kenan pu bapa Enos,
Enos pu bapa Set,
Set pu bapa Adam,
Adam ni Allah pu anak.
Obecnie wybrane:
Lukas 3: MPapua
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2023 (Active), Wycliffe Bible Translators, Inc. All rights reserved.
