Lukas 2
2
Yesus lahir
2:1-7
(Mat 1:18-25)
1Satu kali begini, Raja Besar Roma yang orang panggil Raja Agustus de kas printa untuk daftar smua orang yang ada di krajaan Roma. 2Daftar sensus nama-nama ni pertama kali dong bikin waktu Kirenius de jadi gubernur Siria. 3Smua orang dong pigi daftar dong pu nama-nama ke dong pu kota asal. 4Yusuf de pigi dari kampung Nazaret di Galilea ke Kota Betlehem di Yudea. Betlehem ni dong biasa bilang juga Kota Daud, de pigi daftar nama disitu karna de asal dari kluarga deng turunan Raja Daud. 5De pigi daftar disana deng Maria de pu calon istri yang ada hamil. 6Waktu dong di Betlehem, su waktu untuk Maria mo lahir anak. 7Karna dong tra dapat tempat untuk tinggal, jadi dong tinggal dalam kandang binatang. Maria de mlahirkan anak laki-laki, anak yang pertama. De bungkus deng kain, trus kas tidur di tempat taru makanan untuk binatang.
Orang-orang yang jaga domba pigi liat Yesus
2:8-20
8Pas malam itu tra jau dari kampung Betlehem di tempat luas yang ada rumput-rumput, orang-orang jaga dong pu domba. 9Kaget begini, dekat dong muncul Tuhan pu malaikat satu, baru ada cahaya yang luar biasa dari Tuhan kas trang dorang, baru orang-orang yang jaga domba dong takut skali. 10Trus malaikat bilang dong begini,
“Kam jang takut, karna sa mo kastau brita baik ke kam. Brita baik ini nanti bikin smua orang pu hati snang skali. 11Hari ini su lahir di Daud pu kampung Betlehem, Anak satu yang nanti kas slamat kam. De tu Tuhan, Raja Yang Allah Pili. 12Begini De pu tanda: Kam nanti pigi trus liat bayi satu dong bungkus pake kain, baru De tidur dalam binatang pu tempat makan.”
13Kaget begini, muncul sama-sama deng malaikat itu malaikat-malaikat banyak skali dari surga yang puji Allah, dong bilang,
14“Mari tong puji kas tinggi Allah di tempat yang paling tinggi,
juga damai di bumi untuk orang-orang yang Tuhan pili.”
15Habis malaikat-malaikat pigi kembali ke surga kas tinggal dorang, orang-orang yang jaga domba tu dong baku bilang, “Ayo tong skarang pigi ke Betlehem liat apa yang su jadi, sperti yang Tuhan su kastau sama torang.”
16Dong cepat-cepat pigi begini dong ketemu Maria deng Yusuf, baru dong liat bayi De tidur dalam binatang pu tempat makan. 17Waktu orang-orang yang jaga domba su liat Dia, dong kastau apa yang malaikat tu su bilang sama dong tentang bayi itu. 18Trus smua orang yang dengar crita itu heran. 19Tapi Maria ni de pikir trus simpan smua tu dalam de pu hati. 20Orang-orang yang jaga domba dong kembali ke tempat luas yang ada rumput, deng puji-puji kas tinggi Allah, karna dong su dengar deng su liat smua jadi sperti yang malaikat kastau.
Maria deng Yusuf bawa Yesus ke Ruma Allah
2:21-40
21Begitu su dlapan hari, Anak itu dapa sunat. Dong kas nama De Yesus, nama yang malaikat kasi, waktu De blum ada dalam perut.
22Pas hari untuk Maria mo kas bersi diri ikut hukum Musa,#2:22 kas bersi diri ikut hukum Musa ‒ Prempuan de jadi kotor slama tuju hari stela lahir anak laki-laki deng masi tinggal di ruma sampe 33 hari. Slama itu prempuan tra bole kore ato pegang barang-barang yang dong pake kusus untuk Allah. Pas su 40 hari prempuan de harus kas korban persembahan dari yang dong mampu kasi, supaya prempuan de bersi lagi (Imamat 12:1-8). Yusuf deng Maria dong pigi bawa Yesus ke Yerusalem untuk kasi sama Tuhan. 23Karna dalam hukum Tuhan tatulis begini, “Smua anak laki-laki yang lahir pertama itu kas kusus untuk Tuhan.”#Keluaran 13:2, 12, 15 24Dong juga mo kas korban persembahan “dua ekor anak burung merpati puti ato dua ekor burung merpati hitam,” sperti ada tulis di hukum Tuhan.#Imamat 12:6-8
25Pas skali di Yerusalem tu ada orang satu, de pu nama Simeon. De orang benar, de sunggu-sunggu ikut Tuhan pu mau, de juga ada tunggu Tuhan pu janji yang mo kas slamat orang Israel, trus Roh Allah slalu ada sama dia. 26Roh Allah kastau de kalo seblum de mati de pasti liat Raja Yang Tuhan Pili. 27Hari itu Roh Allah kas grak Simeon pu hati, untuk pigi ke Ruma Allah pas Yusuf sama Maria juga ada bawa Yesus yang masi bayi, untuk bikin yang harus dong ikut dari hukum Musa. 28Baru Simeon de gendong Anak itu trus de puji Allah de bilang,
29“Sunggu eh! Tuhan pu janji untuk saya, skarang su jadi.
Tuhan biar skarang sa mati deng hati tenang, karna sa pu hati su snang.
30Karna deng sa pu mata sendiri sa liat,
De yang mo kas slamat, yang datang dari Bapa.
31Tuhan sendiri yang su kas siap Dia depan smua bangsa.
32De sperti trang yang kas tunjuk jalan untuk bangsa-bangsa lain,
trang itu yang bikin Tuhan pu orang-orang Israel dong dapa puji.”#Yesaya 49:6; 52:10
33Dengar Simeon bicara tentang Anak itu, De pu bapa deng mama dong heran. 34Trus Simeon kasi berkat sama dong baru de bilang sama Anak itu pu mama Maria begini,
“Dengar, Allah su pili Anak ini. Nanti lewat Anak ini banyak orang Israel dapa hukum juga banyak orang Israel yang dapa slamat. De ni sperti tanda dari Allah, tapi banyak orang yang tantang Dia. 35Ini jadi supaya jlas apa yang ada dalam banyak orang pu pikiran. Juga ko rasa sedi skali dalam ko pu hati sperti tatusuk deng pedang yang tajam.”
36Pas disitu ada satu prempuan yang tua, de pu nama Hana, de ni nabi. De dari suku Asyer, Fanuel pu anak. De su perna kawin trus de hidup deng de pu suami sampe tuju taun. 37Skarang de su janda. De su umur 84 taun. De slalu ada di Ruma Allah, siang malam de sembayang sama Allah deng puasa. 38Pas waktu itu de datang ke dekat Anak itu, baru de puji Allah deng bicara tentang Anak itu sama smua orang yang ada tunggu-tunggu Allah pu waktu kas bebas orang Yerusalem.
39Habis Yusuf sama Maria bikin smua ikut hukum Tuhan, dong pulang ke dong pu kampung Nazaret di Galilea. 40Anak itu tamba besar deng kuat. De mngerti smua deng baik, trus Allah kas tunjuk De pu baik sama Anak itu.
Yesus di Ruma Allah
2:41-52
41Stiap taun Yesus pu orang tua dong pigi ke Yerusalem, untuk dong ikut orang Yahudi pu hari besar Paska.#2:41 hari besar Paska ‒ Orang Yahudi dong ingat waktu dong pu moyang dulu, dong kluar dari tana Mesir. Dulu dong sengsara, dong jadi budak di tempat sana. Tapi Allah su kas kluar dong trus bawa dong ke tana yang Allah su janji untuk dorang. 42Waktu Yesus pu umur 12 taun, dong pigi ke Yerusalem sperti yang biasa dong bikin di hari besar itu. 43Habis ikut hari besar itu, waktu dong jalan pulang, Yesus De masi di Yerusalem tapi De pu bapa deng mama tra tau. 44Karna dong dua pikir De ada sama-sama deng orang-orang yang ada jalan. Sampe su jalan satu hari penu baru, dong dua cari De di tenga dong pu kluarga deng orang-orang yang dong knal. 45Karna dong tra dapat-dapat, dong kembali ke Yerusalem deng trus cari Dia.
46Su cari sampe tiga hari baru dong dapat De dalam Ruma Allah. Yesus De duduk tenga guru-guru agama dengar deng tanya-tanya sama dorang. 47Smua orang yang dengar, dong heran skali sama Dia, karna De tau smua trus De jawab smua deng baik. 48De pu orang tua saja heran liat itu. Trus De pu mama bilang sama Dia, “Anak, knapa Ko bikin tong begini? Sa deng Ko pu bapa tong dua pu hati tra bisa tenang cari-cari Ko.”
49Yesus De bilang, “Knapa bapa deng mama mo cari Saya? Bapa deng mama tra tau kalo Sa musti ada di Sa pu Bapa pu ruma?” 50Tapi dong tra mngerti apa yang Yesus bilang.
51Trus Yesus ikut dong pulang sama-sama ke Nazaret, De paling dengar-dengar sama De pu orang tua. De pu mama simpan smua itu dalam hati. 52Trus Yesus tamba besar deng tamba mngerti smua deng baik, Allah deng manusia tamba snang deng Dia.
Obecnie wybrane:
Lukas 2: MPapua
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2023 (Active), Wycliffe Bible Translators, Inc. All rights reserved.
