Ta je Vejec 27
27
1U ma ca hobâ ge bong nyi,
Anyin ae ca khanö u ûnyi ame he ka o hnyi bong.
2E so ame he ke at he ka haisoi u, ke ca hing hnyimâm bi;
Ke hnen atkanyua, ke ca hnen esongodâm bi.
3E hmak veto, ke hmak minya öny;
Ke haba hmonyin anyin at ae monu, e ti hmak bi hon li ûnyi e.
4Wathethot ame beovecâ, ke hmonyin ame bahihingölö;
Ke ie at ame he ka tot hnyi hnyimakan
5E so hwa ûne ae manen Hon betenge ae iyong.
6E hnathu je aat hnen at ibetengiö:
Ke osehia ûcimhnyimak at iwahnaihmiony.
7Haba at ae sekon me ame höcö ge hani;
Ke hnebwia hia ta je ûnyi ae hiny ka at ae mekihnânem.
8Helâ me meno ame gâ monu ûnyi hnyi hâûen,
Helâe at ame he monu ûuyi hnyi hnen.
9Wakaco me ûnyi ae bo so ame osenyinâ hnyok:
Ke hnebwia ûhnenamö ûnyi hnyi hnyekon ihuminy at.
10Ca degec ihumâm me ihuminy kâmâm;
Ke ca dit bi ka hnyi uma umen liamekeiny möu hnyi bong u me vec hnyin:
E so at ame laba hakekeny, hon liamekeiny ame laba sâkâû.
11Nökuk lö, metâ but, me me senyin dö hnyekuk,
Me me hu hnân thu kâu at ame haikongu nya.
12Haba at wâ wia, me ame wâ monu, me ikhölö:
Ke haba tavat monu adre me he, me hu vec gadra.
13Hom dö ûkhaûen at, wale ame tot hnân hwaban atkanyua;
Ke hok haten dö ûnyi ge at ame tot hnâu hwaban momo ae atkanyua.
14Haba at ame vesâ hnyi haolany me haisoâ ihuminy ge hofuc ae gan,
Me adre me he ka ha hofuc e, me hnân hangâ.
15E ûcû khukhula hnyi bong we
Me momo ae fuc bebehu.
16Haba at ame thawâ momo e, e ame tha wâ ang,
Ke haba hnyamen a metân ame kâlâ wakaco.
17Adre khet homakan fao hnen fao;
Helâe ame so hnyimakan at ûnyi ge ihuminy.
18Haba at ame tuö imeta, me ame he ka an wan;
Ke haba at ame tuö tuhan, me adre me he ka ogânâ.
19E ûcû hnyimak me hnyimak hnyi an,
Helâe minya hnyekon ke at ka ke at:
20Ame ca sekon hedis me hnaûhango;
Ke haba khaca, ame ca sekon li emakan at.
21Hnân leû sileva öt, ke hnân leû gol meic,
Ke adre tuluto at ge hna ogânâ e.
22U je ne oamemâ at ae monu ge utö tha e me hwit hnyi hnyin kumete,
Me ame ca he ka hia gan anyin hwen monu.
23U ma labö ie wâhmakhmetoâ halem ta ja mamoe;
Me tuö wia ju je hnahat meno a halem:
24Anyin ame ca tethmâ nyiele balua je omjeû;
Ke hawa, e bi korona ke ne o but ke dö me ke dö?
25Adre hom hna önying me ame manen dut je bâtân ae hât,
Ke adre ûkhacaköuâ je khölakiny ta je bucen.
26Je nokon mamoe hnân ûkhaûâm,
Ke je nokon got hnân bi hwaban hnyei:
27Ke ame he ka ûcû dân basin got hnân âm, me ânyâm lap;
Me hnân melen je athnyabaem a je hlu.
maintained by the British and Foreign Bible Society