Ta je Vejec 24
24
1CA he ka behnyekom tavat ae kong,
Ke ca wem bi he ka tha u mödra:
2Anyin a je hnyekudra adre me ûnykûme he ka oseda,
Ke je esongodidra ame ha ûkonguny.
3Adre me op uma ûnyi ge metâ,
Kʼ adre me otethmâ e ge wâ ûnykûme.
4Ke ûnyi ge wâhmakhmeto adre me öunöngötâ je hnyeuleny
Ge ta je omjeû ae ûnyi hnathu me kese hia thithö.
5E hwege at ae metâ;
Eke, haba at wâhmakhmeto e ame ohwegiâ man.
6Anyin a u me he ka vak wia ânyâm vat hoton hna ûhnenamö wia:
Ke adre me he ka laba khötkic hnen tavat ûhnenamö ae se hia.
7E ti gorany hmonyin metâ ka at ae monu:
E ame ca hnyi ha hofuc hnyi homagöule.
8Haba at ame vak monu,
Me ame he tavat ka hâiâ e me at ame ânyâ hwali.
9Haba hna ûnykûme hnen at ae monu, me wale hulo:
Ke hûkötö tavat ge at ame ûhiö.
10U ka sënyin hnyi bonginy vec,
E ûhnûkong bi tang hewegiâm.
11Omeli ödra thö tavat adre me hom he ka mok,
Ke behanʼ ödra ju tavat adre hia but penapena he ka hlingʼ ödra.
12U ka ha, ka habe, Wâ bi, e ca khanʼ ohmun e:
Hawa, ame ca he ka ûnykûme e ge at ame tululo hnyok?
Ke hawa, e ca khana e hnen at ame tuö hanom?
Ke hawa, ame ca he bi e ka bi hwaban ka at hoton anyin ta je huliwa?
13Nokuk lö, han dö hani, anyin ae so e;
Me hani adre tiga ca hlec ae hnebwia ka hnyi hnyimâm:
14Helâe, u ma he ka wâ metâ ka hnyi hnyekom:
U je ne wâ e, awe, ame he ka hu hwaban,
Ke adre me ca he ka subâ degecâ ânyâm geju.
15At ae kong lö, ca mokulec ecmâkâ hnyaban at ae wisa;
Ca ohia hnen hna menâ hnyin.
16Anyin ame oseven ta ju at ae wisa, kʼ ame tot hmetu:
Ke ame he bi tavat ae monu ka hia hnen vec.
17E ka ta iwahnaihmiony möu, ca he ka senyin,
Ke adre ne hagutâ e, ca he ka hobâ hnyekom:
18Wâ e nye wâ Iehova, me e ame hmönyin,
Me ame wia anyin wathethot ûnyi gan.
19Ca he ka hmak hnyekom ge tavat ânyâ hulo;
Ke ca behnyekom tavat ae kong:
20Anyin ame ca he ka hu troban ka at ae kong;
Adre me he ka ume lamepa anyin tavat ae monu.
21Nokuk lö, outö Iehova ju me than:
Ca tha e me tavat adre me hwihwiö:
22Anyin ame he ka ie o kodra anyidra vec;
Ke ie at ae khana ge ûhnaûhangöiny je hunaidra.
23Walang ke je hofuc hwan tavat metâ.
E ca so he ka wâhmakhmetoâ at hnyi hna owisa.
24Haba at ame ha ka at ae kong, ka habe, U wisa;
Me ame he je at ka hangâ e, me ikikiâ e hnen je hnyei:
25Ke ame he ka hu senyin ge tavat adre me thawâ e,
Ke ame he ka o kodra hnahic ae ûnyi hnathu.
26Haba at ame thu wisa
Helâke e ame ûcimhnyimak.
27Penapena ju ânyâm huliwa eû,
Ke hnakânâ wia e hobi köu bi hnyi hnyot;
Ke hwaban e, u me he ka op umâm uma.
28U ma ca he ka hnyi ha a ga monu ke at, ke ba can;
Ke u me ca he ka iyawo ge li esongodâm.
29Ca ha bi, ka habe, Oge me he ka ânyâ kâu helâ me hnen hna mâdrâ könya;
Ke oge me he ka bi hwaban ka at helâ me anyin huliwa.
30Inya oge me he ka hnyi ta hnyei iny ūsēnyin,
Ke hnyi hnyei vine iny at ae ba hnyekon;
31Ke wâ bi, i watetaföcö but e,
Kʼ ame kû takoû e ge vhat,
Ke kong ut hak vetoiny.
32Me oge me wâ, me ûnykûme wia:
Oge me wâ me kap hna ûne.
33Më na mokut, më na ta mokut,
Më na hûkâlâ li hnyam me mokut leleû.
34Me ame he ka o köu theduoc helâ me at ame venöu;
Me ba han, helâ me at ame khavâ ûkhaûen vat.
maintained by the British and Foreign Bible Society