Levitiko 22
22
1KE Iehova ame ha kö Mose, ka habe, 2Ha thö kö Arona me lakon, a gʼ adre me he ka ûsâkâûö me je ûnyi ae kap anyin lakon Isaraela, wale adre me okabâ könya, mʼ odrin e ca he ka okongoâ iök ae kap: Inya Iehova. 3Ha thö ködrin, ka habe, Haba at hnyi mâtrânibun hia hnyi anyibun ta je dö ame hakekenyâ ta je ûnyi ae kap, wale hnen lakon Isaraela hna okabâ kö Iehova, kʼ ame bo kong ut, me adre me he ka subâ degecâ at eling hnyi hnyimakök: Inya Iehova. 4Ame ne lepera ke at hnyi mâtrâni Arona, ame ne hingölö dân unyin; me e ame ca he ka hnyi han je ûnyi ae kap, ke ne o but e ame bo so bi. Ke ame ne hu ke at ame kâlâ ke ûnyi ae bo kong hnen unyin ae mok, ke ame ne at ame hingölö sin unyin; 5ke ame ne ke at ame kâlâ ûnyi ame iyâû, wale ame obokongoâ e, ke ame ne ke at ame obokongoâ e hnen ke ûnyi ae bo kong unyin; 6haba at ame kâlâ ta je ûnyi helâe, me e ame he ka bo kong ke ne o but sahac, kʼ ame ca he ka hnyi han ta je ûnyi ae kap, e ka tiga ca sûâ unyin hnyi köiö. 7Ke e ka didrut seûno, me e ame he ka bo so; ke hwaban e, e ame he ka hnyi han je ûnyi ae kap, anyin a wale an. 8Haba ûnyi a mok hwege, me hna kia hnen meno, e ame ca he ka hnyi han, wâ e nye bo kong hnen e. Inya Iehova. 9Anyin a wale odrin e he ka tuö hnok je hna hûna, me me ca takû odrin hnen hulö, me mok can e, odrin ka he ka okongoâ: Inya Iehova at ame okabi odrin. 10Ame ca he atkanyua ka hnyi han ûnyi ae kap: haba at ame tha laba me at bihut, me athnyabainy adre hawâ, ame ca he ka hnyi han ûnyi ae kap. 11Ke ame ne he at bihut ka ûco ke at ge mone, me e ame he ka hnyi han; helâ minya hnyat adre hnokoâ hnyi hnyaban, odrin e he ka hnyi han an. 12Ke ame ne faipoipo me atkanyua nokon at bihut a hlu, e ame ca he ka hnyi han je ûnyi ae kap adre hudo hnân hudiny kap goranyai. 13Ke ame ne safac nokon at bihut, ame ne thang faipoipo, me ba nokon, kʼ ame hmetu ka hnyi hnyaban kamen, helâ ke me tiga hlu bi, me e ame he ka hnyi han an kamen: ke ame ca he ka atkanyua ka hnyi han. 14Ke ame ne han monoâ hnen ke at ûnyi ae kap, me hamen he ka bi hwaban, me bi hanen ke keihen a thabûnginy me ham ka at bihut ûnyi ae kap. 15Ke ca he odrin ka okongoâ je ûnyi ae kap unyin lakon Isaraela wale odrin e hudo kö Iehova; 16me takû odrin hulöinyanyidra monu, odrin ka he ka hnyi han anyidrin je ûnyi ae kap anyin a inya Iehova at ame okabâ ta je ûnyi eling.
17Ke Iehova ame ha kö Mose, ka habe, 18Ha thö kö Arona, me lakon, me lakon Isaraela hia, me ha ködra, ka habe, E ka he ke at Isaraela, ame ne atkanyua unyin at Isaraela ka hudo anyin hut, ame ne hobi kâu anyidra ke je khöbi, ame ne hobi kâu anyidra hut ae betenge, wale adre me be ka hudo kö Iehova hnân hudiny leû: 19hamöbun he ka hudo baga ae ba hnyikongon ûnyi hnyi je bolok, ame ne mamoe, ame ne got, me me he ka kap soi öbun. 20Ke haba at ae hu hnyikongon, ca he öbun ka hudo: anyin a ca hnân kap soi öbun hnyin. 21Ke e ka he ke at ka hudo hudiny ûsoköu kö Iehova, me thamuâ khöbi, ame ne hut ae betenge, ame ne bolok, ame ne mamoe, me e so e ame bekhöt, mʼ adre me he ka kap soâ; ame ca he ka hu hnyikongon. 22Haba wadröu, me at ae hmetro jeien, me bâbu, me anyû, me at ae huje unyin, me ûhölök, ca he öbun ka hudi odrin ko Iehova, me ca hudi odrin hnân hut a an ge meic hon taben hut kö Iehova. 23Ame ne bolok, ame ne nokon mamoe ae hu ovejien, ame hia ke keihen unyin, me u me he ka hudi odrin hnân hut betenge; ke adre me ca he ka kap soâ hobi kâu khöbi. 24Ca he öbun ka hudo kö Iehova ûnyi adre okongoâ wakunyin, ame ne hmouca, ame ne khekhe, ame ne kave; ke ca he öbun ka ânyâ helâe hnyi ibun hnyei. 25Ke ca he öbun ka hudi odrin hnân an Khongubun ûnyi ge aten ke hnyei bi; anyin a e unyidrin hulö me hnyikongon: adre me ca he ka kap soi öbun hnyin.
26Ke Iehova ame ha kö Mose, ka habe, 27Adre me ne hnokoâ bolok, ame ne mamoe, ame ne got, me e ame he ka tha laba me hinyen hnyi je bong a seven: ke hwân hnyi bong a eitiny adre me he ka hap hnân hut a an ge meic kö Iehova. 28Ke ame ne kau, ame ne mamoe, me öbun e ca he ka tha hlingâ e me nokon hnyi bong a khaca. 29Ke öbun ka he ka hudo hudiny ole kö Iehova, hudo thö e me me kap soi öbun hnyin. 30Hnyi bong a khaca adre me he ka an e; ca he öbun ka ip kolon ke ne o but nyi: Inya Iehova. 31Anyin a wale hamöbun he ka tuö anyik je hnanyibu me ânyâ: Inya Iehova. 32Ke ca he öbun ka okongoâ iök ae kap; ke adre me he ka okabi nya wanben lakon Isaraela: Inya Iehova at ame okabi öbun, 33wale at ame hum öbun ûnyi hnyi hnyei Aigupito, me me Khongubun: Inya Iehova.
maintained by the British and Foreign Bible Society