Josua 1
1
1HWABAN mok a Mose athnyabai Iehova, me haba Iehova ame ha ko Josua nöku Nuna, athnyabai Mose, ka habe, 2A mokcu Mose athnyabaik; ke walang: ang todrö, he thö ka hanyâûâ Joridano eang, a u, me tavat eang hia thithö, ka hnyi hnyei oge me ham ködra, wale ka lakon Isaraela. 3Haba ta je dok hia thithö ame he ka uto ge li hnyeûcabun, me, wale oge me ham köbun, helâji me hnok hna ha ko Mose. 4Hwân hnyi hnyebuba, me Lebanona eang, ke ne o but ka hnyi wagewe ae gan, a wagewe Euferate, a hnyei hia iny at Heth, ke ne o but hnyi köiö ae gan cicö hna dit hnen seûno, wale hnyegöulöbun. 5E ba at ame he ka khana ka tot hnyi hnyimâkâm hnyi je bong bongon ânyâm möt; oge me he ka tha inya mou helâji me hnok hna tha e me Mose: ame ca he ka hiö nya unyâm me hna degeci u. 6Hwege thö, ke hnyok baga but: anyin a hamâm he ka ohuâ hnyei ka tavat eang, waleji oge me khemanyin he ka ham ka lakamödra. 7Ke so bi, hwege thö, me ti hnyok baga, mʼ u me he ka wâ wia me ânyâ hia hnanyibu a hûna köu Mose a athnyabaik: ca saû thö ûheny e ka hnyi ke keihen metâ, me me, mʼ u me he ka hu hnahic hnyi je dok hia u me he ka hnyin. 8Haba tusiny hnanyibu eang, me ame ca he ka hia ûnyi hnyi hnyimâm, ke u me be ka ûnykûme e hnyi lany me lit, me tuö me ânyâ hia helâ me hna sihnalimen hnyin: mʼ u me he ka so hnyi dem je gethen, mʼ u me he ka hnahic. 9Hawa, oge ca hûna köu? Hwege thö, ke hnyok baga but; ca ot, ke ca öbubuny bi, anyin a e bi unyâm Iehova Khongom hnyi je dok u me be ka hnyin.
10Ke haba Josua ame hûna ka je homakan ge tavat, ka habe. 11He thʼ öbun ka hnyi wanben je hna hunuma, me ha ka tavat ka habe, Bi kamejibun ju; anyin a kun biju ta bong, me öbun e he ka hanyâûâ Joridano eang, me e jio be ka hom hnyei Iehova Khongubun ame ham köbun hnân ibun.
12Ke haba Josua ame ha ka at Reubena, me Gada, me hafiny tribu Manase, ka habe, 13Ûnykûme thö hofuc waleji Mose athnyabai Iehova ame hûna köbun, ka; habe, ame he Iehova Khongubun ka omenʼ öbun, me ame he ka ham köbun hnyei ang. 14Ame he je laöiöbun, me je lakubun ae ûhnyûkong, me halebun je meno, ka laba biju hnyi hnyei Mose ame ham köbun hoton Joridano; ke so bi, öban e ne ka he me ta je ûnyi hnân vat hnyi hnyimakan je liamekeiny möbun, je hnyat hia ae hwege he ka vat, me hadruʼ ödrin, 15ke ne o but a hia but Iehova omenâ je liamekeiny möbun, helâ möbun, me ödrin e hia but hom hnyei Iehova Khongubun ame ham ködrin; ke hnyi ûen e, öbun e he ka hmetu ka hnyi ibun, me labā e, wale Mose athnyabai Iehova ame ham köbun hoton Joridano, ricö hna o hnen seûno. 16Ke ödrin e thu kö Josua, ka habe, ohmun e ha ka tha ânyâ hia hnâm hna hûna kohmun, me he ka hnyi dok u me kunʼ ohmun kâu. 17Öhmun e he ka ling u helâ me hnöhmun hna ling Mose hnyi ta je ûnyi hia thithö: ke e na tha e ju mou Iehova Khongom, helâ me hnen hna tha e me Mose. 18Ke haba at ame he ka ûkhin fuc ge ânyâm hnanyibu, me ca long hwâm hofuc hnyi ta je ûnyi hia a me he ka hûna kâu, me adre me he ka hlingâ e: ke so bi hwege thö, me hnyok baga but.
maintained by the British and Foreign Bible Society