Isaia 48
48
1LAP anyi Jekob lö, long ju ang, öbun tavat adre hwenyi iödra hoton iö Isaraela, a tavat adre me o but ûnyi hnyi je köien Juda; a tavat adre me khemanyin hnyi iö Iehova, me ha ge Khongon Isaraela, ke ca hnathu bi me wisa. 2Anyin a adre me ka hawʼ ödra a hanen taun ae kap, ke adre me ka laba kece ka Khongu Isaraela; Iehova tuhan sabaoth ien. 3Oge me bok ka ha ta je hofuc kâû adrem: eke, ame he but ûnyi hnyi hnyimök, me oge me omanenâ: oge me ie ânyâ, me adre me ohwâdâ bi. 4E khanö nya a u at ûjöng, ke toiny fao nyem, ke bras barem; 5anyin a wale, oge hia but haimemenâ e köu ûnyi adrem; oge me omanenâ köu ke tiga ca hwâdâ but: wâ u nye he ka ha, ka habe, Hnen anyik idola hna ânyâ, ke hnen anyik hnatheat, ke anyik hnatheat adre me okoiâ hna hûna kodra. 6U je hia but long; wâ ju ta je ûnyi hia e; ke hawa gabun, öbun e ca he bi ka haimemenâ e? hwân hnyi ûen ang oge hia but omanenâ köu ta je ûnyi ae teb ûnyi, waleji ta je ûnyi ae iyong, ae ca khanö u. 7Adre op ta je ûnyi e walang ang, ke ca ehac; ke e hia bong ang u je ca long ta je ûnyi e; wâ u nye ha, ka habe, Wâ bi, e khanö nya ta je ûnyi e. 8Eke, u je ca long; eke, e ca khatö u, eke, adre ca khong li hnyikönyâm hwân ehac: anyin ae khanö nya a u at iyawo gan hmâ, ke u at hanyâûâ hwân hnyi hnyekon hinyâm. 9Can iök bi, oge me he ka obecâ anyik hmonyin, ke can hna oganö nya oge me he ka hokhnyok gam, mʼ o ge me ca he ka subâ degeci u. 10Wâ bi, oge hia but cubic u, ke ca helâ me sileva; oge ûco u hnyi hna meicin seda. 11Gak, gak bi, oge me he ka ûnyâ e; anyin a ieû adre me he ka haikongoâ iök î ke oge me ca he ka ham anyik hmanenang ka ke at.
12Ling nya ju Jekob me Isaraela waleji oge ûca: inya thibi; inya ang at a bân, ke inya minya ang at a biliny. 13Eke, hnen hnyamok hna bi taben hmeledrany, ke hnen hnyamok a metök hna ulolo je drany: oge me hawâ ta je ûnyi e, me adre me tha tot. 14Ûkhacaköu thʼ öbun hia thithö me long; ie at gadra ame haimemenâ ta je ûnyi e? Iehova ame betenge gan, e ame he ka ânyâ weny ka Babulona, ke ame he benyin ka e hon at Kaledaia. 15Inya, inya at ame ha; eke, oge hia but hawâ e: oge hia but hom e, ke e ame bi sot hnyi deny bi gethen. 16Hok ju jem könya, long ju ang; oge ca fuc hnyi dok ae iyong hwân hnyi can; hnyi ûen eji, inya ling: ke walang ang Iehova Than ame kunö nya, me hanon. 17Walang hna ha hnö Iehova at ame ûcû melâm, Kabi Isaraela: Inya Iehova Khongom, at ame nö u he ka hu troban, at ame su u hnyi gethen u me be ka vheno. 18Nakaem, u je ne long anyik ta je hnanyibu me me helâ me wagewe ânyâm hnahic, ke helâ me je waköiöiny köiö hwakecâm ae wisa: 19ke helâ me öny ta je mâtrânâm, ke haba wan hnyekom me helâ me ûseiny je waöny: adre me ca he ka subâ degecâ me ohia ien hnyi hnyimakök.
20He but ûheny Babulona, kec dʼ öbun ge at Kaledaia; haimemenâ thö ge hwan khumöng, thumeto ju e, ha ju e ke ne o but hnyi can hmeledrany: ha thö, ka habe, A hia but Iehova ûcû melen athnyabainy a Jekob. 21Ke adre me ca beic hnyi ûen e ame su ödra hnyi hnyebuba: e ame oi köiö ûnyi hnyi kic hobi kodra: kʼ ame so kic me ame patrutrua but köiö. 22Haingö Iehova, ka habe, E ba hnahic ge tavat ae kong.
maintained by the British and Foreign Bible Society