Isaia 43
43
1KE walang ang, walang hna ha hnö Iehova at a up u Jekob, me at a huliwön u Isaraela, ka habe, Ca ot bi, anyin a oge hia but ûcö ânyâm möt; oge hia but hawâ iâm, anyin a atök ut u. 2U ka he ka hanyâûâ je köiö, me oge me he ka tha inya möu; me je wagewe, adre me ca he ka khutukhaûö u: u ka he ka he wanben meic, ame ca he ka thung u; kʼ ame ca he bâhlân ka möt unyâm. 3Anyin a inya Iehova Khongom, Kabi Isaraela, at ame omeli u; oge hia but ham Aigupito hnân hwaban melâm, ke Aithiope me Teba hnân hwabâm. 4Anyin a u oûnykûmik, me hmanenang, me hnok hna betenge gan; awe, oge me he ka ham tavat hnân hwabâm, me je hnyei hwaban melâm. 5Ca ot bi, anyin a tha inya möu: oge me he ka hom ta je mâtrânâm ûheny jimeio, me ûkhaca-köuö u ûheny jimeû; 6oge me he ka ha ka ke keihen hwadro, ka habe, Hna but; ke ka ke keihen hwaiöu, Ca behânâ bi; hom but lakuk obaga ûhedra sâkâû, ke lakuk wahlu ûnyi hnyi je can hmeledrany; 7haba ödra hia adre ip hudra iök, waleji oge me op hnân oganö nya; me inya at a huliwön ödra; eke, oge hia but up ödra. 8Hö jem tavat ae wadröu ke hu ecmak, ke tavat ae wejiji ke hu hnyiköny. 9Ûkhacaköuâ thö ta je hnyei hia, me ame he tavat ka ûkhacaköu: ie at gadra ame he ka haimemenâ e, me omanenâ köta ta je ûnyi a bân? hamödra he ka hawâ tavat ohnatho, mʼ adre me he ka ohnathu ödra: ke adre me ne he ka long me ha, ka habe, E hnathu. 10Öbun tavat ohnathu nya, haingö Iehova, ke athnyabaik waleji oge me ûca: me me khanʼ öbun me labageju könya, me wâ ûnykûme a inya thibi; e ba ke Khong a ban ke bilik bi, ke haba khaca, me ba ke at hnyi hwabök. 11Inya thibi Iehova, ke ba ju ke at ûhomeli, ke hake inya ke. 12Oge hia but haimemenâ, ke oge hia but omelo, ke oge hia but omanenâ, ke tiga ba khong kanyua unyibun: anyin a wale haingö Iehova, öbun tavat ohnathu nya, a inya thibi Khong. 13Eke, inya but ling ke tiga ba bong; ke ba at ae khana he ka hûgûnâ ûnyi hnyi hnyamok: inya oge me he ka huliwa, ke ie at ame he ka bi ovheliny.
14Walang hna ha hnö Iehova at omeli öbun, a Kabi Isaraela, ka habe, Can gabun, oge me he ka ûkhûnöng Babulona ai, ke oge me he ka hum ödra hia thithö a je bâ, wale at Kaledia, adre me tabâ je hu adre me senyin hnyin. 15Inya Iehova, Kabibun, at a Up Isaraela, ke Tuhöbun. 16Walang hna ha hnö Iehova at ame bi gethen hnyi köiö, kʼ ame bi deny gethen hnyi wanben köiö ae gan; 17at ame hom je kariota me je hors, me utbavat me tang hwege; adre me tha mokut ju, kʼ adre me ca he ka tot hmetu bi; e hiʼ ödra but, kʼ adre me mok ut helâ me wakunenu: 18haingen, ke habe, Ca ûnykûme bi ta je ûnyi a bân, ke ca hnyok bi ka ta je ûnyi kâû adrem. 19Wâ bi, oge me he ka ânyâ ûnyi a teb ûnyi; kʼ ame he ka kû walang ang; ame ca he ka khanʼ öbun e? Oge me he ka bi gethen hnyi hnyebuba, me bi wagewe hnyi hnyei baga. 20Ke ame he ka oganö nya hnen je menoiny hnyot, je luko me je iaena: anyin oge me oâ köiö hnyi hnyebuba, me je wagewe hnyi dok ae hnyei baga, he ka habelen lakeik waleji oge ûca: 21waleji tavat oge me op hobi könya bi, mʼ adre me he ka oganö nya. 22Ke so bi u je ca hawo nya, Jekob; ke u je katebu könya Isaraela. 23U je ca hom könya halem ta je nak meno a je hudiny leû; ke u je ca oganö nya ge ânyâm ta je hut. Oge ca ohmakö u ge ta je hut, me osenyini u ge ta je ûö ae bo so. 24U je ca ûcû ûö ae hnebwia hobi könya hwaban mone, ke u je ca osekuni nya ge pipikhenyainy ânyâm ta je hut: ke u je hia but ohmaki nya ge ânyâm ta je hulo, u je hia but osenyini nya ge hwakecâm ae kong. 25Inya, inya thibi at ame kot degecâ hnâm ta je hna hanyâûâ cak bi; ke oge me ca he ka ûnykûme ânyâm ta je hulo. 26Oûnykûmi nya thö; ate me he ka tha ûhneiköu: ha thö hnâm hna ivino, mʼ adre me he ka haiwisai u. 27Ame ânyâ hulo hnen kâmâm a bân, ke ame ûkhin fuc mönya ânyâm je ûthumetu. 28Anyin a wale oge me he ka okongoâ je tuhan dok ae kap, me hnö Jekob ka hnaûhango, ke Isaraela hnân haikongoâ.
maintained by the British and Foreign Bible Society