Isaia 22
22
1HOK honen hnyigöulen bucen adre me omanenâ hnyin.
Ieû gam walang ang a u je tha ölö ka hnyi hon je ban uma me je âtâm hia? 2U at ae unöngöt ge hwan kuku, taun ae mede, taun ae senyin; haba je kokâm me adre me ca hlingâ ge hele vat, kʼ adre me ca mok hnyi vat. 3Adre tha kec hia latuhâm, adre cʼ ödra ge tavat hlic fana: adre tha cʼ ödra hia adre me wâ gam, adre kec sâkâû ai. 4Anyin a wale, haingök, Hwio thö gak, oge me he ka tenge hwege; ca huliwa bi he ka otubweli nya, can hna okongoâ hluiny ik hnyei. 5Anyin a bonginy hmak eling, me iututi, me monumonu ûnyi ge Than, Iehova tuhan sabaoth, hnyi hnyigöulen bucen hna omanenâ; adre me kia je hak veto, me tenge ka je bucen. 6Ke Elama ame hom thi fana, me je kariota me tavat tabö hors: ke Kira ame uny ju hna tube bec. 7Ke ame unöngöt ge je kariota je hnyigöulen bucen ae ti so hnyi em hnyei, kʼ ame tot metâ tavat tabö hors hnyi homagöule. 8Me e ame hom degec hna tube Juda; ke hnyi bong eling u me ûnykûme ge ta je omjehen vat eio hnyin uma hnyi wanben hnyot. 9Ke öbun e wâ je dok a hmoucainy taun anyi Davita, ae se hia: ke öbun e ûkhacaköuâ je köiö hnyi an eû. 10Ke öbun e aû je umainy Jerusalema, me kia je uma mʼ adre me op hmetu hak. 11Öbun e op minya an wanben li hna up veto hobi kâu köiöiny an a kâû adrem: ke öbun e ca ûnykûme ge at a ânyâ, me ca ûnykûme wia ge at tibet e kâû adrem. 12Ke hnyi bong eling Than, Iehova tuhan sabaoth ame hawâ he ka tenge, me tenge thungaû, me hadreû, me weikâ mano ae gan nân: 13ke wâ bi, adre me senyin me hobâ, adre me khuc bolok, me hlingö mamoe, me han ûtiö, me ic waina: ate me he ka han me ic, anyin a nyi ate me he ka mok. 14Ke haba Iehova tuhan sabaoth ame omamenâ ka hnyi li hnyikönyök, ka habe, E hnathu adre me ca he ka hna köbun hulo eang ke ne o but öbun e mokcu, ame ha Iehova tuhan sabaoth.
15Walang hna ha ge Than, Iehova tuhan sabaoth, ka habe, He thö, didro ka at tuö tang omjeû eang jia Sebena, at ame muso uma me ha, ka habe, 16Ieû u je ânyâ eang? ke ie at e unyâm, anyin a u me thu op hnân erkemok? u je thu opiny erkemok ethö hobi kâu, me kave umen bi hnyi kic! 17Wâ bi, ame he Iehova ka ti khûâ hwegiö u, helâ me at ae hwege; eke, e ame he ka lan hwegiö u. 18E hnathu e ame he ka hwio me khuö u ka hnyi hnyei ae gan helâ me wâthâ; u me he ka mokcu eling, ke ame he ka e eling je kariotainy ânyâm hmanenang, u at ame hi hmehma hnyaban tuhâm. 19Ke oge me he ka obö u ûnyi hnyi hanymâm, me hagutö u ûnyi hnyi hnâm hna tot gorany hnyin. 20Ke hnyi bong eling oge me he ka hawâ athnyabaik jia Eliakima nöku Hilekia: 21ke oge me he ka okhavâ e ge ânyâm ûkhaû, me ohwegiâ e ge wen hnyekom, ke oge me he ka hna ânyâm musi ka hnyi hnyamen: ke e ame he ka kamen ka tavat adre me laba hnyi Jerusalema, me lap anyi Juda. 22Ke oge me he ka ip kiiny lap anyi Davita hon bajebenyin; ke e ame he ka khong ke ba at ame he ka hlöng, ke e ame he ka hlöng ke ba bi at ame he ka khong. 23Ke oge me he ka ohmâ e helâ me fao hnyi dok ae hwege; ke e ame he ka hnân theron ae hmanenang hnyi lap anyin kamen. 24Ke adre me he ka uhno hon e hmanenanginy hia lap anyin kamen, wale ta je mâtrân, me ta je wan, me ta je kaia hia ae ûhnyûkong, hwân ge je utkaia ke ne o but ta je kaia hia ae gan. 25Ke haingö Iehova tuhan sabaoth, ka habe, Hnyi bong eling ame he ka kong ut fao adre ohmâ hnyi dok ae hwege; ke adre me ho ka sö degecâ me me kolu but, kʼ adre me he ka subâ degecâ hok a honen; anyin ame ha Iehova.
maintained by the British and Foreign Bible Society