II. Samuela 7
7
1KE ame laba than hnyi umen uma, ke a hia but Iehova omenâ e ûnyi ge ta je iwahnaihmiony mē hia igigilo, 2me haba than ame ha kö Nathana perofeta, ka habe, Wa bi inya oge me laba hnyi uma arasi, ke haba tang tangen Khong ame laba hnyi wanben je tubwiny mano. 3Ke Nathana ame ha ka than, ka habe, He thö, ânyâ ju ta je ûnyi hia eû hnyi hnyekom; anyin a tha unyâm Iehova. 4Ke haba hnyi lit eling, me ame o but hofuc ho Iehova kö Nathana, ka habe, 5He thö me ha kö Davita athnyabaik, ka habe, Walang hofuc ho Iehova, ka habe, Hawa u me he ka up uma me hnyabak? 6Anyin oge me ca laba eiö hnyin uma hwân hnyi bong oge me hom jem hnyin lakon Isaraela ûheny Aigupito keneo but hnyi bong ang; ke oge me hia but laba hnyi uma mano ame ne uma menâ. 7Ke hnyi ta je hnyei hia waleji oge me tha he me lakon Isaraela hia ka hnyin, hawa, e hu ke ong hofuc oge me ha ka ke tribu Isaraela, waleji oge me hûna he ka han lakeik a at Isaraela, me ha, ka habe, Ieû gabun öbun e ca up umök uma arasi? 8Ke haba walang u me he ka ha helâe kö Davita athnyabaik, ka habe, Walang hofuc ho Iehova tuhan sabaoth, ka habe, Oge me hum u ûnyi hnyi haginy mamoe, a ûnyi hnyi hna tuö je mamoe, mʼ u me he ka musö lakeik a at Isaraela: 9ke oge me tha he möu waleji hnyi hnâm hna he ka hnyin, me subâ degecâ je iwahnaihmiony möu hnyi hnyimâkâm; ke oge me he ka olungâ iâm helâ me ien tavat ae gan eang hmelen. 10Ke oge me he ka ûca dok hobi kâu lakeik a at Isaraela, me otilʼ ödra, mʼadre me he ka laba hnyi idrin bi, kʼ adre me ca he hmetu ka bwebweli ödra; ke haba khaca, ame ca he hmetu tavat ae kong ka oveci ödra helâji me ehac, 11me helâji me ûen oge hwân ka kunâ hnyat owisa he ka musi ka lakeik a at Isaraela; ke oge me he ka omeno u ûnyi ge ta je iwahnaihmiony möu hia thithö. Ke haba khaca, Iehova ame thumetu u a gʼ ame he Iehova ka otilâ ânyâm lap. 12Ke e ka bekhöt ut bongom ta je bong, ke u ka mokut ut unyin lakâmâm, me oge me he ka otilâ mâtrânâm hwabâm, wale at a hing nokom bi, ke oge me he bi nya ka ohmâ dokhon dökhu. 13Me e ame he ka otilâ uma hobi kâu iök, me oge me he bi nya ka ohmâ theroniny dokhon dökhu nyiele balua. 14Oge me be ka kamen bi, ke e ame he ka nökuk: kʼ ame ne ânyâ hulö, me oge me he ka kot ge osö hnân kot at, a unyi adre kot kâu lakon at; 15kʼ ame ca he ka hia anyik ibetengiö unyin bi, helâji me hnok hna hûgûnâ e ûnyi ga Saulo, wale oge me ohia hnyi hnyimâkâm, 16Ke adre me he ka otilâ hmâ ânyâm lap me dokhom dökhu hnyi hnyimâkâm nyiele balua: adre me he ka ohmâ ânyâm theron nyiele balua. 17Helâ me ta je ûnyi hia eling me ta je hna omanenâ hia eling a ha Nathana kö Davita. 18Haba Davita than ame didro me laba ju hnyi hnyimakö Iehova; me haingen, ka habe, Iny ia Than Iehova, ke ieû anyik lap mʼ u je hum nya ke ne o but walang ang? 19Ke ûnyi ae ûhnyûkong e hnyi hnyimâkâm, Than Iehova; ke so bi u je hia but ha ge lap anyin athnyabaem hobi kâu nyiele; ke hoton hwakecin at eling, Than Iehova! 20Ke ieû hmetu ame he Davita ka ha köu? anyin a u je wâhmakhmeto athnyabaem, Than Iehova. 21Ûnyi hnyi hwâm hofuc, ke helâ mo hnyekom, u je hia but ânyâ ta je ûnyi hia ae gan eling, he ka owâhmakhmeto athnyabaem. 22Anyin a wale u gan Iehova Khong: anyin ae ba at ae ûcû möu, ke ba ju ke Khong, ke hake u thibi, helâ me hnöhmun hna long ge je hnyikönyöhmun. 23Ke ewa ke hnyei eang hmeledrany ae ûcû me em hnyei, a Isaraela, wale ame he Khong ka omelö kân bi hnân iny, me otilâ ien bi, me ânyâ hobi köbun je ûnyi ae gan me hnân outen hobi kâu em hnyei, hnyi hnyimakan lakem, waleji u je omelö köu bi ûheny Aigupito, ûnyi ge ta je hnyei me je khongudrin! 24Ke u je ohmâ em hnyei a at Isaraela hobi köu, hnân em hnyei nyiele balua; ke haba u Iehova, u je bi Khongudrin. 25Ke walang ang, Iehova Khong lö, otilâ hmâ ju hofuc u je ha hobi kâu athnyabaem, me anyin lap nyiele balua, me ânyâ helâ me hnâm hna ha. 26Ke e so he ka ogânâ iâm nyiele balua, me ha, ka habe, Iehova tuhan sabaoth e thibi Khongu Isaraela: ke adre me he ka ohmâ lap anyi Davita athnyabaem hnyi hnyimâkâm. 27Anyin a u, Iehova tuhan sabaoth, Khongu Isaraela, a hia but omanenâ ka athnyabaem, ka habe, Oge me he ka op ânyâm lap: anyin a wale haba athnyabaem ame wâ eû hnyi hnyekon he ka hijü köu hic eling. 28Ke walang ang, Than Iehova lo, u thibi Khong, ke hnathu hwâm hofuc, ke u je hia but ha bânâ ka athnyabaem ûnyi eling ae so: 29ke walang ang, e na wem bi he ka ohnahicâ lap anyin athnyabaem, me me e bi nyiele balua hnyi hnyimâkâm: anyin a u at ame ha, Than Iehova: me ö u ohnahicâ lap anyin athnyabaem ge hnahic ûnyi gam nyiele balua.
maintained by the British and Foreign Bible Society