II. Peteru 2
2
1KE ame o thö minya ta je perofeta thoi ehac unyin tavat, ke helâe ame he ka hu tavat ûne thoi unyibun, tavat adre me he ka okûâ duöngâ ta je imouköu ae hnaûhango, me he ka ivinoâ Than at ame ûcû ödra, adre me okûâ kodra bi hnaûhango ae logot. 2Ke se hia tavat adre me he ka hnu hoton anyidra hwen iwadedök; me adre me he ka haikongoâ hnathu ûnyi gadra. 3Ke adre me he ka ûcû öbun ge hwaban hofuc ae thoi, anyin adre me behnyekudra omjeû: ke haba hna he ka bi hwaban kodra ehac, me, ca bec bi, ke baba hnaûhango adre ip hobi ködra ame ca ta mokut bi. 4Anyin ame ne ca betenge Khong ge ta je angela hnyi ûen adre me ânyâ hulo, ke e ame khû ödra ju hnyi gena, kʼ ame hnʼ ödra but ka hnyi je thop ao menekholom, he ka tuʼ ödra ke ne o but hnyi ûhnei; 5ke ame ca betenge bi ge hmeledrany ehac, ke ame omeli Noa me hnyat minya a seven, at ame khetâ hwakecin ae wisa, hnyi ûen e ame oâ uoû ka hnyi hmeledrany ae kong; 6ke ame ohnaûhangoâ li taun Sodoma me Gomora, me ohia, me wia me hnabadröu, me e ame ip hnân haten ka tavat adre me he hmetu ka ânyâ hwakecin ae kong; 7ke ame omeli Lota at ae wisa hwakecin, ame vec hnyekon ge hwakecin tavat ae kong ae ikiki 8(anyin a haba at e ae wisa hwakecin, me ame tha laba mʼödra, me wâ, me löng, me ohmâkâ hnyekon ae wisa hnyi je bong ge anyidra ta je huliwa ame hanyâûâ hnanyibu): 9e khana Than hwakecin hna omelö tavat ae wisa hwakecidra ae ûcû me Khong ûnyi hnyi ta je ûcûbic, me he ka ip me hnân hwaban tavat ae ca wisa hwakecidra ke ne o but hnyi bong owisa; 10ke nua bi tavat adre me hnu hoton weny unyin ae kong, me oûnyibâûâ musi. Tavat adre me ca ot, ke tavat hwege ânyâ wedra, adre me ca ot he ka haikongoâ ta je musi: 11ke haba ta je angela ae nua hnyi hwege me man, me adre me ca ha hnaûhangʼ ödra bi hnyi hnyimakan Than. 12Ke haba tavat ang, me helâ me ta je meno ae ba hnyekudra, kʼ adre hnöku ödra helâ me omeno hnân noc me hlingâ, adre me haikongoâ ta je ûnyi ae ca khanʼ ödra, ke adre me he ka hamödra hia hnyi hnödra hna ohia, 13kʼ adre me he ka vec hnân bi hwaban hnödra hna ovecâ; tavat adre me ûnykûme ae so he ka mede monu hnyi selany, ödra je thatûnyi, ke hnyat ae hu hnyikongon, adre me senyinâ anyidra je thoi kʼ adre me tiga tha han mʼ öbun hnyi bijeû; 14a unöngötö je emaködra ge bi ûnyi monu, ke ca khanʼ ödra bi he ka menâ mâdrâ hulo; ke adre me iyawâ tavat adre me ca tethmâ bi; ke haba je hnyekudra, me khenen hnyi hwakecin behnyekon; ödra je hnyat ha hnaûhangoâ; 15ödra hnyat adre me hna degecâ gethen ae wisa, kʼ adre me he monu, kʼ adre me hnu hoton gethen de Balaama nöku Beora, waleji at ame hnyokâ hwaban hwakecin ae ca wisa; 16ke adre me oû e can anyin monu: ke ame fuc asina ae hum ge ifucin at, ine thawâ hwen monu anyin perofeta. 17Ödra je hna pupua köiö ae hme, ke ta je hai ame oûang dö; adre hia but ip hobi kodra lit ae menekholom. 18Anyin adre me fuc bi gan me hobelöu monu, adre me iyawâ tavat adre me hap kec dö ge tavat adre me laba hnyi monu, ge ta je weny unyin, me bi ûnyi monu; 19adre me ha bânâ kodra bi a gʼ adre me he ka hnʼ ödra bâûâ, ke so bi haba ödra, me lathnyabainy hwakecin ae ikiki; anyin a haba at ame hom ûhnyûkongoâ ke at, me wale at eling ame bâ bi kâu. 20Anyin adre ne hia but kec ûnyi hnyi ta je ûnyi ae kong hnyi hmeledrany ûnyi ge hnödra hna wâhmakhmetoâ Than At ûhomeli a Iesu Keriso, ke adre me vhet hmetu hnyin me hom ûhnyûkongo, awe, e kong obiny hynat eling hon can. 21Anyin ae so kodra adre ne ca bia but wâhmakhmetoâ getheniny hwakecin ae wisa, hon hnödra hna wâhmakhmeto, me hmetuhmetu ûnyi hnyi hnanyibu ae kap adre me ham kodra. 22Ke ame aat dö kodra helâ me ong vejec ae hnathu, ka habe, Ame hmetu thö kuli ka hnyi hnen hna hmita, kʼ ame hmetu thö buaka a ka hia but soû ka hnyi hmudra he ka seset hnyin.
maintained by the British and Foreign Bible Society