Romafɔ 7
7
Mbla Amʋ Ɩtra ma Tumi Akristofɔsʋ
1Mɩ apio, mlɩ fɛ́ɛ́ mlɩyin Mose Mbla amʋ. Mlɩyin ánɩ́ brɛá ɔha tsie nkpa a, ɔbʋ mbla asɩ. 2Fɛ nɩ ɔtsɩ tsia oklu, mʋ klu amʋ mɔkʋwu a, ɔbʋ mʋ klu amʋ asɩ. Tamɛ nɩ mʋ klu amʋ owu a, alagyi ɩwɩ, oklu woyi mbla kʋkʋ ɩtra mɛdɛ mʋ. 3Mʋ́ alɩ sʋ nɩ mʋ klu amʋ mɔkʋnya wu, ɔdalɩ mʋ ɔma a, alatɔ mbʋa. Tamɛ nɩ mʋ klu amʋ owú mʋ́ a, ɔtra ɔma oklu woyi mbla asɩ. Mʋ́ sʋ nɩ ɔlayetsia oyin bamba a, ɔmɔkʋtɔ mbʋa. 4Mɩ apio, alɩ kɛn igyi ha mlɩ nɩ. Mlɩ ɛ brɛá mlɩlɔhɔ Kristo gyi a, mlɩa mʋnyɔ mlɩlowu. Mʋ́ sʋ mlɩtra mlɩmá Mose Mbla asɩ. Sei a, mlɩlabwɛ ɔha amʋʋ Bulu lɔkʋsʋa tsu afulitɔ amʋ klɛ, mɛnɩ mlɔ́bwɛ yile ha Bulu. 5Tsufɛ brɛá anɩbʋ anɩ tsiatɔ dada amʋtɔ a, mbla amʋ lɛha anɩ ɔwɔlɩ lalahɛ legyi anɩsʋ. Mʋ́ sʋ anɩlɔbwɛ tɔá ɩtɔpʋ lowu ba. 6Tamɛ sei mʋ́ a, Bulu laha anɩlagyi ɩwɩ tsu mbla amʋʋ tɛkɩ anɩbʋ mʋ́ asɩ amʋ ɩbɩtɔ. Anɩa Kristonyɔ lowu. Mʋ́ sʋ mbla amʋ ɩtra ma tumi anɩsʋ. Anɩlagyi ɩwɩ, anɩdɛ Bulu sum tsʋn ɔkpa pɔpwɛá Ɔŋɛ Wankɩhɛ dɛ anɩ sunasʋ. Megyi ɔkpa ánɩ́ mbla wanlɩnhɛ amʋ losuna anɩsʋ.
Mbla Amʋ Mʋ́a Lakpanbwɛ
7Mʋ́ sʋ anɩdɛblɩ anɩaa, ɩtɔ lalahɛ Mose Mbla amʋ gyi? Ɛkɛkɛɛkɛ! Mbla amʋ ɩbɛ́ha abɛ́bɩ tɔá lakpan gyi. Tɛkɩ nɩ mbla amʋ ɩmɛblɩ ɔbɛɛ, “Mápɛ ansɩ fʋ ba atɔsʋ” a, tɛkɩ mmɛbɩ tɔá gyi ɔnsɩpɛ. 8Ɩna alɩ mbla anfɩ sʋ lakpan lenya ɔkpa pʋ ɔnsɩpɛ kugyikʋ wa mɩtɔ. Tsufɛ nɩ mbla amʋ má ɩnʋ a, tɛkɩ lakpan má tumi mɩsʋ. 9Mɩ onuto netsia brɛ kʋtɔ, mmɛbɩ mbla amʋ. Tamɛ brɛá nɛbɛbɩ mʋ́ a, nowun ánɩ́ napan mʋ́sʋ. Lakpan ɔbwɛpʋ ngyi. Mʋ́ sʋ nówu. 10Nowun ánɩ́ mbla amʋʋ nkɩ mbɛɛ, ɩbɛ́ha mɩ nkpa amʋ lɔpʋ lowu ba mɩ. 11Tsufɛ lakpan lenya ɔkpa tsʋn mbla amʋsʋ mlɛ mɩ, mɔ mɩ.
12Tsiatɔ mbla amʋ mʋ́ a, tsitsa kʋkʋ ma mʋ́ ɩwɩ. Mʋ́ nhɩhɩɛ kugyikʋ lɔwankɩ, ɩda ɔkpa, ɩbʋ alɛ ɛ. 13Mʋ́ sʋ idesuna ánɩ́ Bulu mbla anfɩ ɩbʋ alɛ anfɩ lɔpʋ lowu ba mɩ? Ɛkɛkɛɛkɛ! Megyi alɩ igyi. Lakpan lɔtsʋn ɩtɔ wanklaan amʋsʋ pʋ lowu ba mɩ. Ɩna mbla amʋsʋ lakpan lɛlɛ ɩwɩ suna ánɩ́ itepi ɩma alɛ.
Atɔá Ɩdɛkɔ Nyankpʋsatɔ
14Anɩyin ánɩ́ ɔŋɛtɔ atɔ mbla amʋ gyi, tamɛ mɩ mʋ́ a, nyankpʋsa ngyi. Nabwɛ lakpan ɔkpábi. 15Mmɛtalɩ bɩ mɩ tsiatɔ, tsufɛ megyi tɔá ndekle ntɔbwɛ. Tɔá mmedekle mboun ntɔbwɛ. 16Nɩ tɔá mmedekle ndɛbwɛ mʋ́ a, natsula ánɩ́ Mose Mbla amʋ ɩbʋ alɛ. 17Idesuna ánɩ́ megyi mɩ dɛ alɩ atɔ anfɩ bwɛ. Mboun lakpan tumiá ɩbʋ mɩsʋ tɛha ntɔbwɛ mʋ́. 18Nyin ánɩ́ brɛ anfɩ mbʋ mɩ tsiatɔ dada anfɩtɔ a, ɩtɔ wanklaan kʋkʋ ma mɩtɔ, tsufɛ nyankpʋsa ngyi. Ntekleá nɔ́bwɛ yile, tamɛ nakasian. 19Mmɛdɛ yileá ndekle bwɛ. Lalahɛ amʋʋ mmedekleá nɔ́bwɛ amʋ mboun ndɛbwɛ. 20Nɩ ndɛ lalahɛ amʋʋ mmedekleá nɔ́bwɛ amʋ bwɛ a, mʋmʋ idesuna ánɩ́ megyi mɩ onuto dɛ mʋ́ bwɛ. Mboun lakpan tumi amʋʋ ɩbʋ mɩtɔ amʋ dɛ mʋ́ bwɛ.
21Mʋ́ sʋ nawun ánɩ́ mbla anfɩ lagyi mɩsʋ. Nɩ ndekleá nɔ́bwɛ yile a, lalahɛ koun ntɔbwɛ. 22Tsufɛ nhɩɛ ndekleá négyi Bulu mbla amʋsʋ tsu mɩ klʋntɔ. 23Tamɛ ntowun ánɩ́ mbla kʋ ɩdɛ mbla amʋʋ ɩbʋ mɩ klʋntɔ amʋ ɩsa kɔ, gyi mʋ́sʋ, bwɛ mɩ lakpan ɔkpábi. Ɩlaha lakpan amʋʋ ɩbʋ mɩtɔ amʋ ɩdɛ mɩ bwɛhɛ kugyikʋsʋ gyi. 24Kɩ ipian kpɔnkpɔɔnkpɔntɩá mbʋ mʋ́tɔ! Ɩlapʋ mɩ ɩya lowutɔ. Ma ɔbɛ́lɛ mɩ tsu mʋ́tɔ? 25Tamɛ anɩ Wie Yesu Kristo sʋ ndɛ Bulu ɩpan da ánɩ́ alalɛ mɩ!
Mɩ klʋntɔ mʋ́ a, tɛkɩ ndekleá nɔ́bwɛ Bulu mbla amʋ ɔkpábi. Tamɛ tsiatɔ lalahɛ amʋʋ ɩbʋ mɩtɔ amʋ laha nabwɛ lakpan ɔkpábi mboun.
Obecnie wybrane:
Romafɔ 7: nko
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
