Romafɔ 14
14
Akristofɔ Ɩlalɛ Ɔkpa Lalahɛsʋ
1Mlɩhɔ mlɩ aba Akristofɔá bʋma ɔwʋnlɩn hogyitɔ wa mlɩtɔ. Nɩ bɛɛ, tɔkʋ bʋ alɛ ntɛ ɩma alɛ a, mlɩmágyi amʋ́ nwɛn. 2Ɔkʋ lohogyiá ɔbʋ ɔkpa gyi togyitɔ, tamɛ ɔkʋ ɛ hogyi ɔnɔ ɩma ɔnlɩn. Mʋ́ sʋ ɔtamagyi iye. 3Ɔkpa má ɩnʋá ɔha ánɩ́ otegyi togyitɔ ɔbɛ́lɛ ɔha ánɩ́ ɔtamagyi tɔkʋ ɩla. Alɩ kɛn ɔha ánɩ́ ɔtamagyi tɔkʋ ɛ ɔmálɛ ɔha ánɩ́ otegyi togyitɔ ɩla nɩ. Tsufɛ Bulu lahɔ amʋ́. 4Fʋgyi ma ánɩ́ fɛ́ha ɔkʋ osumbi pɔn? Mʋ wie nkʋlɛ pɛ bʋ ɔkpa blɩ ɔbɛɛ, otsie wanklaan ntɛ ometsie wanklaan. Ɔbɛ́talɩ tsia wanklaan, tsufɛ Bulu ɔbɛ́talɩ ha mʋ obétsia wanklaan.
5Ɔkʋ ɔbɛ́talɩ blɩ ɔbɛɛ, ɛkɛ kʋ dʋn mʋ́ aba, ɔkʋ ɛ ɔbɛ́blɩ ɔbɛɛ, nkɛ amʋ fɛ́ɛ́ igyi kʋlɛ. Ɔhagyiɔha ɔyɔ mʋ klʋntɔ wanklaan, otsu mʋ́á ɩbʋ alɛ. 6Nɩ ɔkʋ ɔlɛ ɛkɛ ɔkʋ ɔbɛɛ igyi ɛkɛ yile a, ɔdɛ mʋ́sʋ gyi pʋtsu Bulu fʋa. Nɩ ɔkʋ ɛ tegyi togyitɔ a, ɔdɛ mʋ́ gyi pʋtsu anɩ Wie fʋa. Nɩ ɔkʋ ɛ tamagyi iye a, mʋ ɛ ɔdɛ mʋ́ kisi pʋtsu anɩ Wie fʋa. Tsufɛ amʋ́ fɛ́ɛ́ bʋtɛda Bulu ɩpan mʋ́sʋ. 7Anɩtɔ ɔhaa metsie nkpa ha mʋ ɩwɩ, anɩtɔ ɔkʋkʋ ɛ móowu ha mʋ ɩwɩ. 8Nɩ anɩtsie nkpa a, anɩtsie ha anɩ Wie. Awu ɛ a, anɩlawu ha mʋ. Mʋ́ sʋ nɩ anɩlawu o, anɩtsie nkpa o, anɩ Wie bʋ anɩ. 9Tsufɛ Kristo lowu, yinki kʋsʋ ba nkpatɔ, mɛnɩ ɔbɔ́bwɛ akɩankpapʋ pʋ́ awupʋ fɛ́ɛ́ Owie. 10Ɩnɩ sʋ imehian ánɩ́ fɛ́ha fʋ ba ɩpɔn ntɛ fɛ́kɩ fʋ ba ansɩtɔ kotikoti. Tsufɛ anɩ fɛ́ɛ́ abɛ́yɛlɩɩ Bulu ansɩtɔ, obégyi anɩtɔ okugyiɔkʋ asʋn. 11Bɔwanlɩn wa Bulu asʋn amʋtɔ bɛɛ, “Anɩ Wie Bulu ɔbɛɛ,
‘Nanya mbʋ nkpa anfɩ a,
ɔhagyiɔha ɔbɛ́da akpawunu mɩ ansɩtɔ;
ɔhagyiɔha ɔbɛ́lɛ blɩ ɔbɛɛ, Bulu ngyi.> ”
12Mʋ́ sʋ anɩtɔ okugyiɔkʋ ɔbɛ́lɛ mʋ asʋn ɔnɔ Bulu ansɩtɔ.
Máha Fʋ Ba Ɔdɩda Mʋ Hogyitɔ
13Mʋ́ sʋ mlɩha asi aba ɩla lɛ. Mboun abwɛ agywɩɩn ánɩ́ anɩmɔ́ɔbwɛ tɔtɔá ɩbɛ́ha anɩ ba ɔkʋkʋ mɛ́ɛsrɛɩ ntɛ dɩda. 14Sei ɩnɩá namli Okristoyin sʋ nabɩá atogyihɛ kʋkʋ má ɩnʋá mʋ́ ɩwɩ mɛtɩn. Tamɛ nɩ Kristoyin ɔkʋ lohogyiá tɔkʋ ɩwɩ mɛtɩn a, mʋmʋ mʋ wa mʋ́ ɩwɩ mɛtɩn. 15Nɩ fʋtegyi tɔkʋ, ɩdɛ fʋ ba han a, mʋmʋ fʋ bwɛhɛ mɛdɛ ɔdwɛ suna. Máha fʋ atogyihɛ ɩha fʋ ba ánɩ́ Kristo lowu ha mʋ ɔfwɩ. 16Mʋ́ sʋ máha tɔá fʋyin ánɩ́ ɩbʋ alɛ ɩbwɛ tsitsa aha ansɩtɔ. 17Tsufɛ Bulu iwiegyi amʋ imegyi atogyihɛ ntɛ atonunhɛ asʋn, mboun yilebwɛ, iwilwii pʋ́ ansigyi ánɩ́ itsu Ɔŋɛ Wankɩhɛ amʋtɔ asʋn igyi. 18Ɔhagyiɔha ánɩ́ otosum Kristo ɔkpa anfɩsʋ a, mʋ asʋn tegyi Bulu ansɩ. Aha ɛ bʋtobu mʋ.
19Ɩnɩ sʋ mlɩha anɩ ansɩ ɩpɛ tɔá ɩbɔ́pʋ iwilwii ba, ɩbɔ́wa apio aba ɔwʋnlɩn hogyitɔsʋ bregyibrɛ. 20Máyinta Bulu gyumagyihɛ fʋ atogyihɛ sʋ. Ɔkpa bʋ ɩnʋá abɛ́talɩ gyi togyitɔ, tamɛ nɩ ɔkʋ dɛ tɔá ɩbɛ́ha mʋ ba ɔbɔ́bwɛ lakpan bwɛ mʋ́ a, ɩma alɛ. 21Nɩ ɔkʋ tamagyi iye kʋ, ntɛ nun nta ntɛ bwɛ tɔá ɩbɛ́ha mʋ ba ɔbɛ́dɩda a, ɩbʋ alɛ. 22Mʋ́ sʋ togyitɔá fohogyi tsu ntobi anfɩ ɩwɩ a, ha mʋ́ ɩbwɛ fʋa fʋ Bulunyɔ nsɩnɛ asʋn. Nɩ ɔkʋ opuni mɛdɛ mʋ tsii mʋ bwɛhɛsʋ a, mʋmʋ ɔkla lawa mʋ ogya. 23Tamɛ nɩ mʋ klʋn mɛdɩ mʋ asɩ mʋ atogyihɛ kʋ gyi sʋ, ogyi mʋ́ a, Bulu laha mʋ ɩpɔn dodoodo. Tsufɛ mʋ atɔ amʋ gyi mɛlɩɩ hogyisʋ. Togyitɔá ɔha mɔpʋ hogyi bwɛ igyi lakpan.
Obecnie wybrane:
Romafɔ 14: nko
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
