1 Korintofɔ 6
6
Bulu Aha Wʋlɛwʋlɛ Nsɩnɛ Asʋngyi
1Nɩ mlɩtɔ ɔkʋ mʋa mʋ ba Okristoyin benya a, ntogyi sʋ mlɩtɔwa klʋn pʋya ɔmátɔfɔ asʋn ogyikpa, mlɩtamapʋ ya Bulu aha abʋblɩ mʋ́? 2Mlɩmeyin ánɩ́ Bulu aha obégyi ɔyɩtɔ aha fɛ́ɛ́ asʋn? Nɩ mlɩ obégyi ɔyɩtɔ aha asʋn a, mʋ́ ntogyi sʋ mlɩmɛ́ɛtalɩ gyi mlɩ wʋlɛwʋlɛ nsɩnɛ asʋn? 3Ntɛ mlɩmeyin ánɩ́ anɩ obégyi Bulu-abɔpʋ ɛ asʋn? Ntogyi sʋ anɩmɛ́ɛtalɩ gyi ekekegyiɛkɛ asʋn mʋ́? 4Nɩ asʋn ɩda mlɩ nsɩnɛ a, ntogyi sʋ mlɩtɔpʋya ɔmátɔfɔ asʋn agyipʋ amʋʋ mlɩ ɔpasuafɔ bʋtamabu amʋ? 5Ndɛ asʋn anfɩ wanlɩn sɩsɩ pʋsʋpa mlɩ. Mʋ́ sʋ ɔtɩansɩpʋ ɔkʋlɛ kʋraa má mlɩ ɔpasuatɔá ɔbɛ́talɩ gyi mʋ aba nsɩnɛ asʋn? 6Ntogyi sʋ ohogyipʋ ɔbɛ́sama mʋ ba, mʋ́á ɩdʋn kʋraa pʋ mʋ yɛlɩɩ ɔmátɔfɔ ansɩtɔ?
7Alɩ amʋʋ asʋn ɩbʋ mlɩ Akristofɔ wʋlɛwʋlɛ nsɩnɛ amʋ kʋraa ilosuna ánɩ́ mlɩlagyi pɔn dodo. Ntogyi sʋ mlɩ ba ɔpʋ ɩla gyi mlɩ, ntɛ osisi mlɩ mlɩméesikie? 8Mlɩ mboun latsʋn gyankpa mlɩdɛ mlɩ aba sisi, mlɩdɛ lalahɛ pʋgyi mlɩ aba? 9Ntɛ mlɩmeyin ánɩ́ aha lalahɛ bʋmóowie Bulu iwiegyi amʋtɔ? Mlɩmámlɛ mlɩ ɩwɩ. Aha ánɩ́ bʋtɔwa atsɩ mʋa ayin asʋn, ɩkpɩ atswɛpʋ, mbʋa atɔpʋ, ayin ánɩ́ bʋtekle amʋ́ aba ayin, 10awikplu, ɔnsɩpɛ awapʋ, nta abʋpʋ, aha asiapʋ pʋ́ aha asisipʋ bʋméenya ogyikpa Bulu iwiegyi amʋtɔ. 11Tɛkɩ brɛ amʋ a, alɩ mlɩtɔ akʋ mlɩgyi nɩ. Tamɛ Bulu labie mlɩ ntsu, alabwɛ mlɩ mʋ aha. Alatsʋn mʋ Ɔŋɛ amʋ pʋ́ anɩ Wie Yesu Kristosʋ tsu mlɩá mlɩ asʋn da ɔkpa mʋ ansɩtɔ.
Mlɩ Ɔyʋlʋ Pʋwa Bulu Numnyam
12Mlɩtɔ ɔkʋ ɔbɛ́talɩ blɩ ɔbɛɛ, “Mbʋ ɔkpa bwɛ totogyitɔ.” Ee! Tamɛ ndɛ mlɩ bla mbɛɛ, “Megyi mʋ́ fɛ́ɛ́ ɔbɔ́wa labi.” Ɔkʋ ɛ ɔbɛ́blɩ ɔbɛɛ, “Mbʋ ɔkpa bwɛ totogyitɔ, tamɛ mmɛ́ɛha tɔtɔ méegyi mɩsʋ.” 13Ɩbʋ mʋ́tɔá ɔkʋ ɔbɛ́talɩ blɩ ɔbɛɛ, “Atogyihɛ bʋ ɩnʋ ha ipu, ipu ɛ bʋ ɩnʋ ha atogyihɛ.” Ee! Tamɛ mʋ́ fɛ́ɛ́ ɩbɛ́hɩ ɛkɛkʋ. Bulu mɔbwɛ nyankpʋsa ha atsɩ mʋ́a ayin asʋn wa. Mboun anɩ Wie bʋ anɩ ɔyʋlʋ, anɩ ɔyʋlʋ ɛ bʋ anɩ Wie. 14Bulu lɔkʋsʋa anɩ Wie Yesu tsu afulitɔ. Ɔbɔ́pʋ mʋ tumi amʋ kʋsʋa anɩ ɛ.
15Ntɛ mlɩmeyin mlɩaa, mlɩ ɔyʋlʋ igyi Kristo nyankpʋsa-oyi amʋ ɩwɩ atɔ? Mʋ́ nkalɩ sʋ mpʋ Kristo ɔyʋlʋ yɛda obu-ɔnɔ otsiapʋ ɔyʋlʋ? Ɩtsʋn mɩsʋ! 16Ntɛ mlɩmeyin mlɩaa, nɩ ɔkʋ ɔpʋ ɩbɩ da obu-ɔnɔ otsiapʋ a, mʋa mʋnyɔ ɔyʋlʋ labwɛ kʋlɛ? Tsufɛ Bulu asʋn wanlɩnhɛ amʋ lɛblɩ ɔbɛɛ, “Oyin amʋ mʋa ɔtsɩ amʋ babwɛ ɔyʋlʋ kʋlɛ.” 17Tamɛ nɩ ɔkʋ mʋa Kristo bɔbwɛ kʋlɛ a, mʋa mʋnyɔ babwɛ ɩkʋlɛ ɔŋɛtɔ ɛ.
18Mlɩmáplei atsɩ ntɛ ayintɔ. Lakpan kugyikʋá ɔha tɔbwɛ tamakʋsʋ lɩɩ mʋ ɔyʋlʋsʋ. Tamɛ nɩ ɔkʋ ɔwa atsɩ mʋ́a ayin asʋn mʋ́ a, alabwɛ lakpan ánɩ́ ɩlɔkʋsʋ lɩɩ mʋ onuto ɔyʋlʋsʋ. 19Ntɛ mlɩmeyin mlɩaa, mlɩ ɔyʋlʋ gyi Ɔŋɛ Wankɩhɛ amʋ ɔtswɛkpa obu? Bulu lɔpʋ mʋ ha mlɩ, otsie mlɩtɔ. Mʋ́ sʋ megyi mlɩbʋ mlɩ ɩwɩ. 20Ibia kpekplekpe Bulu lɔhɔ mlɩ. Mʋ́ sʋ mlɩpʋ mlɩ ɔyʋlʋ wa mʋ numnyam.
Obecnie wybrane:
1 Korintofɔ 6: nko
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation