1 Korintofɔ 5
5
Mbʋatɔ Ɩwɩ Asʋn
1Bahɩɛ bɛbla mɩ bɛɛ, mlɩtɔ akʋ bʋdɛ atsɩ mʋ́a ayin asʋn wa. Ɔmátɔfɔ kʋraa bʋmɛdɛ mʋ́ odu bwɛ. Mlɩtɔ ɔkʋ mʋ́ kʋraa laswɩɩ mʋ sɩ mʋ ka, 2ɩbʋ mlɩ ansigyi! Ɩma mlɩ awɩrɛhɔ. Pɛlɩ mɛdɛ mlɩ, mɛnɩ mlégya ɔha anfɩ odu lɛ mlɩ ɔpasuatɔ. 3Ɩnɩá mlɩmɛdɛ mɩ wun o a, mbʋ mlɩtɔ ɔŋɛtɔ. Naha ɔha anfɩ ɔbʋ tsiatɔ anfɩ odu ɩpɔn dodoodo, fɛ mbʋ ɩnʋ. 4Mlɩtɩ ɔpasua amʋ fia anɩ Wie Yesu Kristo ɩdatɔ. Nétsia mlɩtɔ ɔŋɛtɔ, anɩ Wie Yesu Kristo tumi ɛ ibétsia mlɩtɔ. 5Ɩnʋ a, mlɩpʋ mʋ wa Ɔbʋnsam ɩbɩtɔ, oyinta mʋ ɔyʋlʋ, mɛnɩ Bulu ɔbɔ́hɔ mʋ ɔkla nkpa anɩ Wie Yesu ɔbakɛ amʋ.
6Kpaalɩ mlɩdɛ ɩwɩ tsu. Mlɩmeyin ánɩ́ bodobodotu-afa kpalobi tɛha bodobodo amʋ fɛ́ɛ́ itotu? 7Ɩnɩ sʋ mlɩlɛ lalahɛ ɔbwɛpʋ anfɩ mlɩtɔ, mɛnɩ mlɩ ɩwɩ bɛ́tɩn fɛ bodobodoá bʋmɔwa afa mʋ́tɔ, tsufɛ alɩ mlɩhɩɛ mlɩgyi nɩ. Megyi bodobodoá bʋmɔwa afa mʋ́tɔ, imotu bʋtɔpʋgyi Katsʋn Nkɛ? Bamɔ anɩ Israelfɔsʋ Katsʋn Nkɛtɔ Okufabi, ogyi Kristo amʋ, lɛ anɩ nwunsʋ mbusuo ha anɩ dodoodo. 8Mʋ́ sʋ mlɩha apʋ bodobodoá imotu, igyi ɩwɩtɩn mʋ́a ɔnɔkwalɩwa gyi Katsʋn Nkɛ amʋ. Mlɩmáha apʋ bodobodoá ɩlatu, igyi tsiatɔ lalahɛ mʋ́a lakpan gyi mʋ́.
9Nɔwanlɩn wa ɔwʋlʋ kʋá nɔpʋsɩsɩ mlɩtɔ mbɛɛ, mlɩmápʋ mbʋa atɔpʋ gyi mba. 10Megyi ɔyɩtɔ mbʋa atɔpʋ, ɔnsɩpɛ awapʋ, awikplu ntɛ ɩkpɩ atswɛpʋ ɩwɩ asʋn nɛblɩ. Mʋmʋ tɛkɩ mlɛ́dalɩ ɔyɩ anfɩtɔ asa mlɩmɔ́ɔwa amʋ́ mba nɩ. 11Tɔá nɔwanlɩn sɩsɩ mlɩ gyi, mlɩmápʋ ɔha ánɩ́ ɔbɛɛ Okristoyin mʋgyi, tamɛ ɔtɔtɔ mbʋa ntɛ ɔbʋ ɔnsɩpɛ, ɔtɔtswɛ ɩkpɩ, otesia mʋ aba, ɔtɔbʋ nta ntɛ otowi atɔ gyi mba. Mlɩa ɔha amʋ nyɔ mlɩmáwa ɩbɩ gyi atɔ kʋraa.
12Ntɔ sʋ négyi aha ánɩ́ bʋma ɔpasua amʋtɔ asʋn? Megyi aha ánɩ́ bʋbʋ mʋ́tɔ, bʋdɛ lakpan anfɩ odu bwɛ mboun asʋn lehian ánɩ́ mlégyi? 13Bulu obégyi aha amʋʋ bʋma ɔpasua amʋtɔ amʋ mʋ́ asʋn. Tamɛ bɔwanlɩn wa Bulu asʋn wanlɩnhɛ amʋtɔ bɛɛ, “Mlɩ mʋ́ mlɩgya lalahɛ ɔbwɛpʋ lɛ mlɩtɔ.”
Obecnie wybrane:
1 Korintofɔ 5: nko
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation