Devidi-Anume 76
76
Tamụnọ Anie Owu-kụrọnịḅọ Ḅe
1Juda ḅụ ịn Tamụnọ nimi wararị;
tomi ori ẹrẹ kụn-arị Izirẹlị ḅụ.
2Jeruselemu anie ò sime-yọ;
Zayọnị Tụndụ ọgọnọ anie ori angarị.
3Anịanga ò si kẹ ọ̀ tọn apụ ma aḍịẹịn ma anyịmam,
karakara-ḅara-ḅụ ịna ekpeke ma na okologie ma na,
pịkị ịna owuna-aị mamgba sọ.
4Yei Tamụnọ, í ebube nyana la ḅara ḍikii!
Í tụndụ ma ọgọnọ sime tẹ pịkị ḅoarị sakị í opu mẹ ebube nyana ḅara ḍikii,
í owu kẹ ị́ na sọ apụ ma nẹngịma anga mẹ.
5Ịna ọmụapụ ma ḅẹ ḅiokpọ apụ ma ḅara ḅụ sime
owuna-aị mamgba ị́ kprọnị sara fama
tẹ mịọkụ in fịị mono kọn-arị;
ịna ịnyọ na ọmụ aka mẹmgba ḅo ye ḅụụ sọ-a aị sọm.
6Yei Jekọbụ Tamụnọ, í ini ẹrẹma sakị,
ịna asụ ma na arị dọkụapụ ma na ḅịkị tẹ fịịm.
7KỊNỊNYANAḄỌ, kụma kịnị mamgba í ḍiki-ḅalafaam.
Ị́ ịganịarị sakị gbọrụḅọ-sọ inetẹ ị́ tọrọkọ sịẹ-sịẹ-a.
8So-ḅio mie í sime tẹ ị́ ḅẹrẹkọn mẹ mịẹ tẹ tomi nimi ye;
tomikiri ḅẹ atomi nwẹnị ḅalafa tẹ gbọsime,
9ị́ ḅẹrẹ-pẹlẹ ḅẹ tẹ saakị sịẹ sakị,
í tomikiri ḅụ tomi ponomarị apụ mamgba ḅọrọma ḅẹ ḅara.
10Tomi kọn-arị ịganị mẹ jen tokini kịngẹ mie anị dogi-ḅo ị́ pịrịarị;
ọmụ ḅio fa-a apụ ma ị́ alalị ma fị ḅa.
11Ị́ minini KỊNỊNYANAḄỌ ị́ Tamụnọ ḅe pịrịye kẹ ọ̀ pịrị;
ọmịnị kpeki anga simearị asịẹ mamgba ò ḍiepịrị-aị ọkị-ḅo ọ̀ pịrị.
Tamụnọ mịẹ tẹ tomi ò ḍiki-ḅalafarị;
12ọ̀ ḅụụ-gelemarị amadapụ awọmẹ ma siin iderima
tẹ opu amadapụ ma tẹmẹ-naịn-naịnmarị.
(C) The Bible Society of Nigeria