Makị 2
2
Jizọsị Ngụrọ-kọn Owiḅọ Gwọm
(Mat 9.1-8; Luk 5.17-26)
1Boowa aḍin ḅọrọ tẹso, Jizọsị pịkị-so Kepanọmụ mum, tẹ anị ḅẹ ịba ama ḅọrọm mịnẹ ò ḅo warị la tẹ. 2Anie gotẹ tọnwa-apụ ḅo warị mẹ sọ ḅinm, tẹ ḅụọ ḅọrọma ḅọrọma kala anga sọ ḅarị paka-a, nụngọ ḅụ ḅọkọ mẹ tọrọkọ sọ ḅọrọ-a. Jizọsị Oku mẹ ḍuko ịn pịrịarị ogbo 3inia owiapụ ḅo lam, ini ngụrọ-kọnḅọ dogi Jizọsị dama-ḅom. 4Tomina-ogbo mẹ la ḅara ẹrẹsị ini inetẹ tomḅọ ḅe kẹ sọ mu Jizọsị la-a. Anie ḅụ ịn warị isun mẹ kpọlị tẹ Jizọsị na karakara anga mẹ kan finjim. Ini ọkọ kẹ kan finji tẹso ịn nwẹnị tomḅọ ḅe na iḅila na toluma koroma. 5Jizọsị ịn nyana minini kụrọ la ḅara ẹrị tẹ ngụrọ-kọnḅọ ḅe ḅẹẹm, “Ị̀ tụḅọọ ị́ asi ma ịn wẹrịso ị́ pịrị tẹ.”
6Anịanga lẹgị-sime Oloko toluma apụ ma ḅẹ ja apụ nwẹnị kuroma ịna ḅụụ pịrị tẹ ḅẹẹ, 7“Ndẹẹ ò ḅiokpọ tẹ nwẹn ẹkwẹn ḅara? Mie Tamụnọ fie-sima ẹkwẹn! Tamụnọ kịngẹ mie inetẹ tomina asi wẹrịso ḅarịye!”
8Anị gbọrụ kiri Jizọsị in kuroma sime ye mẹ nimim, anie ḅụ ọ̀ nwẹnị ịn ḅẹẹ, “Tiye ẹrẹsị ọ́ nwẹn sime aị kuromarị? 9Ndẹẹ maaịn ma ḅụ sarasara osi ye nẹngị ye, kẹ ngụrọ-kọnḅọ ḅe ḅẹẹ, ‘Ị́ asi ịn wẹrịso ị́ pịrị tẹ,’ anịanịa ḅẹẹ, ‘Saakị sịẹ, ị́ akpalị iko ọkị, tẹ mẹnjịị?’ 10Mịọkụ à kẹ ó ḍie ḅa mịnẹ Tomḅọ Tụḅọ ḅe tomikiri ḅụ ò tomina asi wẹrịso kụrọ nyana wararị.” Mie ḅụ ori ngụrọ-kọnḅọ ḅe ḅẹẹm, 11“Yẹrị ị́ ḅẹẹarị, saakị sịẹ, ị́ akpalị iko ọkị tẹ so warị muu!”
12Inimgba paka ḅẹ ye ḍikiarị ogbo, tomḅọ ḅe saakị sịẹ tẹ amịna akpalị iko ọkị tẹ fọnya, fọnya som. Ye mẹ kẹ inimgba ḅụụ-buama ḅaka ḅara ḅụ ịn Tamụnọ tokini tẹ ḅẹẹm, “Gbala-gbala nwẹn sime ye amụ wa ẹrị-a!”
Jizọsị Livayị Sịn Ọkịm
(Mat 9.9-13; Luk 5.27-32)
13Jizọsị nwẹnị sin pịkịma Galili tọrụ akaka mu. Tomi ogbo ọ̀ dama-ḅo tẹ ọ̀ saakị ye kẹ in tolumam. 14Ọ̀ mẹnjị-ḅọrọarị ogbo, ọ̀ nwẹnị ama-igbigi da ḅọ, Alịfịyọsị owiḅọtụḅọ Livayị nwẹn-sịn ḅọ, ẹrị ori ọ̀ fịrị kiri ḅụ lẹgị wararị. Jizọsị nwẹnị ọ̀ ḅẹẹ, “Ì ḍuka ḅoo.” Livayị nwẹnị saakị tẹ ò ḍuka mu.
15Sakị ḅọrọ tẹso, Livayị fịye mịẹ tẹ Jizọsị sịn tẹ ò Livayị warị ye fị simem. Tọnwa ama igbigi oso apụ na, ama sịkịtẹ apụ na sọ Jizọsị ḍuka-mum, tẹ ini ḅẹ tọnwa-apụ ori na ò ḍukamẹnjịapụ ma na sọ tẹ ye mẹ fịm. 16Farịsiiapụ ma ḅẹ ja apụ tẹ Oloko mẹ Tolumarị apụ Jizọsị ẹrịm mịnẹ ori ama sịkịtẹ apụ na, ama-igbigi da apụ na ye fị gbolomarị ḅẹ ye ḅụ ini ò ḍukamẹnjịapụ ma gbelam, “Ò tiegotẹ ọkọ sime apụ na ye fịarị?”
17Jizọsị ịn ḍuko ye naa tẹ ịn pakịrịm, “Ḅụụ iḅi wararị apụ ḅịrịḅọ ḍọkị ḍọkị-a, kụma obi apụ ngẹrị. À karakara apụ gotẹ ḅo-a, kụma ama sịkịtẹ apụ.”
Tomi Ḅuru-ịmọ Gboloma Ḅii-ḅịḅị Kẹ Jizọsị Gbelam
(Mat 9.14-17; Luk 5.33-39)
18Gbọrụ sakị ḅụ Minji-sara Jọnị ḍukamẹnjịapụ na Farịsiiapụ ma na ḅuru-ịmọ simem. Tomi nwẹnị Jizọsị dama-mu tẹ ò gbela, “Tiye ẹrẹsị Minji Sara Jọnị ḍukamẹnjịapụ ma na Farịsiiapụ ma ḍukamẹnjịapụ ma na ḅuru-ịmọarị, kụma í ḍukamẹnjịapụ ma ọkọ mịẹ-a?”
19Jizọsị nwẹnị pakịrị, “Ọ́ sịn-arị ịn sịn ere-ịya mu apụ fịye fị-a ḅara kẹ sime ḅẹ? Ọkọsime ye paka-paka-a! Ere-ịyaḅọ ḅe ini na emi ogbo, ini anie mịẹ ḅịa. 20Kụma gbọrụ ene ḅụ, kịnị ịna ḅara ere-ịyaḅọ ḅe ọkị so ḅa; anị sakị rẹ mie in ḅuru-ịmọ ḅarịye.
21“Gbọrụḅọ-sọ ịwọ ḅịtẹ pakịrị kẹ ḅuutẹ kaan wararị kapa gbin gbaịn gbaịn-a, anị ịwọ ḅịtẹ mẹ minji ḅio sịkịrị sakị anị kpootẹ nwẹnị ḅuutẹ kapa mẹ kan ḅaka ḅa ẹrẹsị. 22Pịkị ịwọ ḍarịarị tomina iru kẹ ḅuutẹ ḅaḅa ḅio sụa sụa-a, anị ịwọ iru mẹ ḅaḅa ma puu tẹ iru mẹ na ḅaḅa ma na papaa fa ḅẹ ẹrẹsị. Anie nakara ịwọ iru mẹ ịwọ ḅaḅa ḅio kịngẹ mie ịn kẹ sụa, sụa ye.”
Tomi Ịnyọsara-Ene Mẹ Gboloma Ḅii-ḅịḅị Kẹ Jizọsị Gbelam
(Mat 12.1-8; Luk 6.1-5)
23 #
Dit 23.25
Gbọrụ Ịnyọsara-Ene ḅụ Jizọsị na ò ḍukamẹnjịapụ na mbịaka ḍụọ ḅio mẹnjị-ḅọrọarị ogbo, ò ḍukamẹnjịapụ ma nwẹnị kpọọtẹ mbịaka ma anyịma, anyịma ọkị. 24Anie gotẹ Farịsiiapụ ma Jizọsị ḅẹẹm, “Ḍikii, wamịna Oloko ḅụ í ḍukamẹnjịapụ ma Ịnyọsara-Ene mẹ ḅụ mịẹarị ye mẹ tọn-tọnm!”
25Jizọsị nwẹnị in gbela, “Gbala-gbala Devidi ọ̀ fị ḅẹ ye ḍọkịarị sakị ḅụ mịẹ ye gbolomaye amụ ó go-a? Ḅuru ori na ori atomi na tarịm, 26#Lẹv 24.9#1 Sam 21.1-6mie ḅụ ọ̀ Tamụnọ-warị mẹ sọ-mu tẹ ịn kẹ koroma Tamụnọ pịrị tẹ fịturu mẹ ọkị fịm. Abịyata Sịḅịda-Agbamịẹḅọ mịẹarị sakị mie aniemẹ paka ye. Wamịna Oloko sime-ḅara ḅụ agbamịẹapụ kịngẹ anie inetẹ mị fịturu mẹ fị ḅẹ ye, kụma Devidi anị fị tẹ pịkị kẹ ori atomi sọ pịrị fịm.”
27Tẹ ẹkwẹn gbaịn ḅụ Jizọsị nwẹnị ḅẹẹ, “Tomina iḅi anie Tamụnọ gotẹ Ịnyọsara-Ene mẹ tọn pakama yee, ò tomi tẹmẹ tẹ kẹ Ịnyọsara-Ene mẹ pịrị-a. 28Ọkọẹrẹsị Tomḅọ Tụḅọ ḅe anie Ịnyọsara-Ene mẹ sọ Nyanaḅọ.”
(C) The Bible Society of Nigeria