Mayịka 5
5
1Mịọkụ ini onu kẹ ó gbori-ikelemakoro tẹ,
ini owu kẹ wa paka ḅẹ wa gbaịn-koro tẹ!
Jeruselemu ḅẹ apụ ọmịnị ọmịna ọmụ-ogbo ma kobirii,
ịn fomuye kẹ ḅẹrẹtọn Izirẹlị pịrịarị ḅọ ḅe
amgba fomu tẹ!
Tamụnọ Bẹtịlịhẹmụ Ḅụ Ḅo Ḅọ Gbọrụ Ḅẹrẹtọnḅọ Kẹ Izirẹlị Karịmam
2 #
Mat 2.6; Jọn 7.42 KỊNỊNYANAḄỌ ḅe mẹẹ,
“Kụma yei Ị́yẹrị Bẹtịlịhẹmụ,
Ẹfịrata ḅẹ kala-ama,
Juda opu sịẹ mẹ ḅụ ị́yẹrị ịrụ tẹịnm,
kụma í ḅio mie gbọrụḅọ tẹ Izirẹlị ḅụ ḅẹrẹtọn
ḅarị ḅọ ḅe paka-ḅo ị̀ pịrị ḅarịye;
ori atẹngịapụ ma elemu aḍapụ ma ḅụụ
saakịm elemu sakị ḅụ.”
3Anịẹrẹsị ori ịna aḅụụ ḅara-siin ini na fịya-a apụ
pịrị nwenii anị sakị mẹ tẹ,
arị ma tẹ iyiarị ḅọ ma iyi koroma ḅa,
anị tẹrẹmẹ ori amịnapụ omoni ḅara-ḅio simearị apụ ma,
pịkịma kọn wararị Izirẹlịapụ ma ḍọkụma-ḅo ḅa.
4Ò ḅo sakị, KỊNỊNYANAḄỌ ḅe ịnyọ mẹ ḅụ,
KỊNỊNYANAḄỌ ọ̀ Tamụnọ ḅe ẹrẹ mẹ ḅẹ ama-da opu mẹ ḅụ,
ọ̀ sịẹ sime tẹ ḅẹrẹtọn ori atomi pịrị ḅa.
Anịsakị mị sakị mẹ, ò gburo-gburo mu
tomikiri mẹ ḅẹ akunoma ma la ḅa,
tẹ ori atomi kpaịn tẹ gberie-sọ ḅụụ la-a
ḅara kẹ anga ḅa.
5Tẹ ò dein kẹ ḅo tomikiri mẹ pịrị ḅa.
Tamụnọ Ori Atomi Ḅọrọma Tẹ Ini Na Fịya-a Apụ Ma Fomu Ḅa
Asiriya ḅẹ apụ ḅo wamịna opu sịẹ gbaịn,
tẹ wa kikima onu mẹ kan sakị,
wa wamịna kụrọ tẹịn tọrọkọ-tarịapụ ma
fịrịma mu inina owu sọ ḅa.
6 #
Suk 10.8-11
Okologie ḅụ ini Asiriya nẹngịma ḅa,
tẹ lubulu ḅio nụnụ paka-ḅo okologie kẹ
Nimirọdị nẹngịma ḅa;
anịsakị ini Asiriya ḅẹ apụ ḅara ḅụ wa ḅọrọma ḅa,
Nimirọdị wamịna ama ḅio sọ ḅo tẹ
wamịna ama agara mẹnjị sakị.
7Anịtẹso Izirẹlị ḅụ fịị-a tẹ kọn apụ ma,
tọnwa tomi-kụlọkụlọ ogbo-ḅio,
KỊNỊNYANAḄỌ ḅe fịrịma ye mịẹ iwomarị igirigi na,
osuka ọgọnọ sịrarị nwẹịn-nwẹịn eene
na sime-ḅara sime ḅa,
Anịsakị ịn Tamụnọ ḅụụ ḅụ sịrẹrẹ ḅa, tomi ḅụ-a.
8Izirẹlị ḅụ kirikọn-apụ ma,
opu asịẹ ma ogbo-ḅio ḅụ,
tọnwa tomi-kụlọkụlọ ma ogboku,
ọkụkụ opu piri-ḅio-ḅẹ anama ogboku sime-ḅara sime ḅa,
asambịrịma ọkụkụ tọnwa anana ogbo ḅio sime-ḅara,
tẹ saakị tẹso, ọkụma nwẹnị ịna ogboku mẹnjị ḅọrọ,
tẹ ịn ḍụa ḅẹ gbọrụḅọ-sọ ofori ḅara kẹ ịn kẹ
pakịrị-pakịrị puu ḅa.
9Ị́ ḅara saakị gele ḅa í ḍiki-ḅioḅẹlẹ-a apụ ọgọnọ,
tẹ ị́ na fịya-a apụ mamgba pẹlẹ-pẹlẹ-siin ḅa.
10Anị ene mẹ ḅụ, yẹrị KỊNỊNYANAḄỌ ḅe
ọmịna asụ ma pẹlẹ-siin ḅa ọmịna ogbo-ḅio
tẹ ọmịna kirimẹnjị-ọmụarụ ma sima ḅa.
11Àrị ọmịna ama mẹ ḅẹ opu ama ma pẹlẹ-siin ḅa,
tẹ kụrọtẹ ọmịna ḅiokpọmarị anga ma sukuruma-gbin ḅa.
12Àrị ọmịna ḅara ḅụ ó pilearị ibiam ma sima fama ḅa,
anịsakị ọ́ ḅarị jen-maaịn kẹ tọrụ-tolu tẹ ye ẹrịarị apụ nyana ḅịa.
13Àrị ọ́ kẹ ye kịkama mịẹ aị ma na,
ọmịna fịafịa aḍụḅarị ịḅalị ma na pẹlẹ-siin ḅa ọmịna ogboku ḅụ,
tẹ ọ́ ḅarị jen-maaịn kẹ sịḅị-tuu ọmịna aḅara
ḅẹ kọrịnama pịrị ḅịa.
14Anịsakị àrị ọmịna ogboku ḅụ Asịra, Ere oru
fụḅara mẹ soku siin,
tẹ ọmịna opu ama ma fama ḅa.
15Ye ḅụụ-ḅẹsọọ na, opu ịgbanịya na ḅụ,
à nwẹnị gbẹẹ fị ḅii ḅa
opu asịẹ mamgba tẹ ị̀ ḅịḅị poki-a
apụ ma ọgọnọ ḅụ.
(C) The Bible Society of Nigeria