Ayịzaya 61
61
Ḍụa-ḅọrọma Iḅi-Oku Mẹ
1 #
Mat 11.5; Luk 7.22 #
Luk 4.18,19 Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe
Ọ̀ tẹmẹ kẹ ị̀ ḅụụ ḅio suu ḅinma tẹẹ.
Ori ị̀ sẹlẹ ọkị tẹ ị̀ kẹ fịrịma tẹ
Iḅi-oku kẹ mu igoin-apụ ma pịrị ḅẹ ḅara,
Ḅioḅẹngbọ kaan-sara tẹ apụ ma gwọ,
Ḍuko kun-ḅara ḅio simearị apụ ma pịrị ịn paka-ḅo ḅa, pịkị ikoli ḅio simearị apụ ma ḅẹẹ ini ịna sịḅị atomi sọ ḅa.
2 #
Mat 5.4
Ori ị̀ fịrịmam à mu ḍuko wasama
Mịnẹ sakị mẹ ḅo la tẹ
KỊNỊNYANAḄỌ ḅe ori atomi ḅọrọma ḅẹ sakị mẹ
Tẹ si kẹ ịn tọn apụ ma nẹngịma.
Ori ị̀ fịrịma tẹ à mu kururuarị apụ mamgba dedema.
3Kẹ Zayọnị ḅụ kururuarị apụ ma pịrị
Ḍereku na ḅioḅẹlẹ na, ḅioḅẹngbọ-si nakara,
Tokini nume-su, kururu nakara.
Ini opu asịn kịka ḅa
Anie KỊNỊNYANAḄỌ ḅe ḅarana ḍiḅi aị.
Inimgba kuraye mịẹ ḅa,
Tẹ Tamụnọ tokini ḅa ọ̀ kọrị tẹ ye gotẹ.
4In siin iḅere-iḅerea kụra ḅio kan-sara sime opu ama ma nama ḅa.
5Ị̀ atomi, jen asịẹ ḅẹ apụ fịrịmẹnjị ọ́ pịrị ḅa
Ini ọmịna anana ogbo-ogbo ma ḍikiḍiki ḅa.
Tẹ ọmịna ḍụọ kọrị tẹ ọmịna kụrọ aḍụọ ma tẹlẹma ḅa.
6Tẹ ọmịnị KỊNỊNYANAḄỌ ḅe agbamịẹapụ ḅara
mie ịn kẹ ó nimi ḅarịye,
Wamịna Tamụnọ fịrịmẹnjịapụ.
Ọ́ sịẹ-sịẹ ma ḅẹ ngọ mẹ fị ḅa
Tẹ kẹ ḅụụ-tọn ḅa mịnẹ anị ọmịna nye sọ tẹẹ.
7Ọmịna ḅụụ-jịrị na tọrụ-tuu na kuno tẹẹ.
Ọmịnị ọmịna amakiri ḅụ anga ḅa
Tẹ ọmịna ngọ maa kiri paka ḅa
Ọmịna ḍereku sime mu ḅẹẹ-sakị ḅẹẹ-sakị la ḅa.
8KỊNỊNYANAḄỌ ḅe mẹẹ,
“À tomḅọ la kiri kẹ mḅọ pịrị ḅẹlẹma tẹ kịnị
ponoma na si mịẹ na ḍiki ḅioḅuarị.
À karakara ḅara kẹ gbẹẹ-ye kẹ ị̀ atomi pịrị ḅa
tẹ sime-gbamaso ọḅọkụ kẹ ini na fị ḅa.
9Sịẹ-sịẹ ma ogboku ḅụ ini ereso ḅa
Sịẹ-sịẹ ma ogboku ḅụ ini ereso ḅa
Ini ẹrịḅọ-ẹrịḅọ nimi ḅa
Mịnẹ ini ma anie à bomatẹ apụụ.”
10 #
Mịẹ 21.2
Jeruselemu ḍerekuarị KỊNỊNYANAḄỌ ḅe kọrị tẹ ye mẹ ẹrẹsị.
Á kịkarị ye owiḅọ sime ḅẹ tẹ ḅirima ẹrẹḅọ.
Tamụnọ ḅọrọma na owu-ḅara-iḅi na kẹ kapa sọma tẹ kẹ á sụa tẹẹ.
11Kiri ḅio ḍiḅi sịn mgbọlị piki-pikiye-ofori
ḅara kẹ so-pakarị gbọrụ ḅara mẹ
Mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe
ori atomi ḅọrọma ḅarị ḅara,
tẹ sịẹ mamgba ò tokini ḅa.
(C) The Bible Society of Nigeria