Ayịzaya 54
54
KỊNỊNYANAḄỌ Ḅe Nyana Izirẹlị Pịrị Ḅẹlẹma
1 #
Gal 4.27
Jeruselemu, ị́ awọ iyi-a ẹrẹḅọ kịka tẹẹ,
kụma mịọkụ í inetẹ nume-su tẹ oloku ḅa ḍereku ḅụ.
Mịọkụ ị́ awọmẹ nyana amịna diḅọ gbala-gbala
amụ koroma-soa ẹrẹḅọ nẹngị ḅa!
2Ị́ angarị akpụrụ-warị mẹ mịẹ ḍụḅama
anị la ḅara nẹngị;
anị ḅẹ aḍigi ma nangwọma tẹ dọlịa ma ḅakụ kụrọmaa.
3Pakịrị-pakịrị ḅụ amakiri mẹ daasịẹ ayọ
ma ị́ saḅa ḅọrọ mu ḅa,
í atomi ma pịkị siin amakiri mẹ nyana ọkị ḅa,
mịọkụ jen asịẹ ḅẹ apụ kẹ amịna nye
sọma tẹ angarị yọ mẹ.
Tomi mangị-so famatẹ opu ama ma tomi pịkị arị ḅio ḅin ḅa.
4Ḅalafa ma! — ị́ ḅarị jen kẹ tọrụ-tuu ḅịa;
ịn ḅarị í iderima ḅịa.
Ịwọma owiḅọ sime ẹrẹḅọtụḅọ ḅara ḅụ, ị́ kọn tẹ
si mẹnjị mẹ ị́ kẹ ḅioḅọrọma ḅa,
pịkị diḅọ-fịtẹ-ẹrẹḅọ ḅara kẹ í sime
tẹ si ḅụụ-yaụ ḅara mẹ sọ.
5Ị́ Tẹmẹḅọ ḅe diḅọ ḅara sime ị́ pịrị ḅa
Kụrọmamgba nyana KỊNỊNYANAḄỌ ḅe anie ori ẹrẹ.
Izirẹlị tẹkẹarị Fịafịa Ḅọ ḅe ị́ ḅọrọma ḅa
ori anie bebe tomikiri mẹ ḅẹ ḅẹrẹtọnḅọ.
6Izirẹlị, ị́ ịwọma ịya ḅo ẹrẹḅọ kịkarị,
tẹ á di á kẹ gbin koroma-so tẹ kpọma tọrụsiẹrịarị ḅọ.
Kụma KỊNỊNYANAḄỌ ḅe ị́ sịn pịkị ọ̀ ḅụụ pịrị tẹ ḅẹẹarị:
7“Boowa kala-sakị mie à kẹ í koroma so ye;
pokolo tẹ ḅẹlẹma mie à kẹ ị́ kẹ pịkị-ḅo ḅarịye.
8Arị ọḅụ pịkị í gbinm gbọrụ sakị kịngẹ ḅụ,
kụma arị ị̀ ḅẹlẹma kẹ í ḍie gbamaso ḅa.”
Ị́ ḅọrọmarị KỊNỊNYANAḄỌ ḅe ọkọ ḅẹẹm.
9 #
Suk 9.8-17
“Noha ḅụọ ḅụ à mininim à ḅarị jen kẹ
opu minji kẹ tomikiri mẹ gbaịn ḅịa.
Mịọkụ à mininiarị à ḅarị jen kẹ í ḍiki ịganị ḅịa;
Arị í ḍiki-ịganị tẹ í fomu ḅịa.
10Tụndụ ma na gele-akiri ma na kọsị-kọsị-sara ḅarị-o,
Kụma à nyana ị́ pịrị ḅẹlẹma mẹ gbala-gbala kunoma ḅịa;
à minini dein mẹ arị anị wẹrị mu ḅẹẹ-sakị ḅẹẹ-sakị la ḅa.”
Ọkụrụkụrụ nyana ị́ pịrịarị KỊNỊNYANAḄỌ ḅe ọkọ ḅẹẹm.
Tọrọkọ-jụ Ḅẹ Jeruselemu
11 #
Mịẹ 21.18-21
KỊNỊNYANAḄỌ ḅe mẹẹ:
Yei Jeruselemu, ị́ tọrụsiẹrịarị,
ḅarasụa pịrị ḅọ nyana-a ama,
í dedema ḅẹ gbọrụḅọ-sọ pịkị ofori,
à yela aḍụḅarị kẹ siin í suku nama saakị ḅa.
12Ịn kẹ rubi sịn-arị yela aḍụḅarị mie à kẹ
ị́ gele-awarị ma nama ḅarịye,
fịnị kọrị ḅara kọrịarị aḍụḅarị nwẹnị í ogigo-aḅọkọ ma,
tẹ yela pọkọsụa-aị tẹ ịn kẹ juwẹlị sịn aị ma
kẹ í gbori-ikelema.
13 #
Jọn 6.45
Yẹrị ḅarana ye kẹ í atomi toluma ḅa,
tẹ lọkọlọkọ na dein na kẹ ịn pịrị ḅa.
14Kịnị-inoma-a na kuraye mịẹ na ị́ mịẹ kụrọma ḅa.
Ponoma na tẹmẹ-naịn-naịnma na ḅio ị́ paka-ḅo ḅa.
15Gbọrụḅọ owu kẹ ị́ pakarị ḅẹḅẹ,
ị̀ ḅịḅị-sọ-a ḅara mie ọ̀ kẹ anị mịẹarị;
ḅẹḅọ-ḅẹḅọ tẹ owu kẹ ị́ pakarị ḅọ mḅọ ḅịkị ḅa.
16“Yẹrị ikulele-tẹmẹḅọ ḅe tẹmẹm,
anie fịnị kọrịma tẹ kẹ ọmụ-aị tẹmẹarị ḅọ ḅe.
Yẹrị ọmụḅọ ḅe tẹmẹm,
ọmụ-aị ma kẹ kịnị ḅaarị ḅọ ḅe.
17Kụma inetẹ ye kẹ ị́ lama ḅẹ ọmụ ye ofori;
ḅẹrẹ kẹ ị́ sịḅị-sẹịnḅọ-sẹịnḅọ
ị́ ị́ kẹ mḅọ pakịrị ḅẹ ye nyana ḅa.
Àrị ị̀ afịrịmẹnjịapụ ma ḍụa
tẹ owu-ḅara-iḅi kẹ ịn pịrị ḅa.”
KỊNỊNYANAḄỌ ḅe ọkọ ḅẹẹm.
(C) The Bible Society of Nigeria