2 Paka-aị 26
26
Juda Ḅẹ Amadaḅọ Uzaya
(2 Ama 14.21-22; 15.1-7)
1Juda ḅẹ apụ mamgba Uzaya ọkịm, oriḅe tẹ inia kụra fa si sịḅị ḅụ ḅọrọtẹ ḅọ ḅe, tẹ ọ̀ kẹ ọ̀ ḍa Amazaya kiri ḅụ amadaḅọ sọmam. 2Amadaḅọ Amazaya fịị tẹso, Uzaya nwẹnị Elatị nama tẹ anị pịkịma-ḅo Juda pịrị. 3Uzaya sịḅị inia akụra fa si ḅọrọ tẹso, ọ̀ saakị ama-dam, tẹ kụra amesi oyi finji na maa kụra na (52) kẹ Jeruselemu ḅụ ama-dam. Ọ̀ iyingi ẹrẹ Jekolaya, Jeruselemu ḅẹ ḅo. 4Ọ̀ KỊNỊNYANAḄỌ ḅe ḍiki-tọrụ ḅụ kuraye mịẹm, ọ̀ ḍa Amazaya wẹrịtẹ mịẹ ḅara. 5Zẹkaraya Tamụnọ mangịma mẹ kẹ ò toluma ḅọ ḅe ene ma ḅụ, ori ọ̀ ḅụụ kẹ Tamụnọ ḍọkị pịrịm; anịsakị ọ̀ KỊNỊNYANAḄỌ ḅe ḍọkị sakị goyegoye, Tamụnọ ọ̀ mịẹ tẹ ò lolom. 6Ọ̀ paka mu tẹ Filisiteniapụ ma na owu sọm, tẹ Gati na, Jabinẹ na, Asịdọdị na onu ma kan saram; tẹ opu ama opu ama nama-nama pakamam Asịdọdị ye-yọ na pịkị jen anga ḅụ na Filisiteniapụ ma ogboku ḅụ. 7Tamụnọ ḅarasụa ọ̀ pịrịm tẹ ò Filisiteniapụ ma na, Arabụ ḅẹ apụ ma tẹ Gọbalị ḅụ angarị apụ ma na, Mehuni apụ ma na nẹngịmam. 8Amọnị ḅẹ apụ sịẹ oso igbigi kẹ Uzaya gbẹm; ò ḅo kụrọ lamam ẹrẹsị, ori ereso mu Ijiputi akaka sọ lam. 9Anịtẹrẹmẹ Uzaya pịkị Jeruselemu ḅụ gele awarị namam ịkọlị ḅẹ ogigo-ḅọkọ mẹ na, Tụndụ ogboku ḅẹ ogigo-ḅọkọ mẹ na, Maa ịkọlị Donia anga mẹ na ḅụ, tẹ arị mịẹ kụrọma famam. 10Ọ̀ pịkị ịkpa mẹ ḅio gele awarị namam, tẹ tọnwa ḍụḅatẹ minji koko anga pẹlẹ finjim, gbala ọ̀ tọnwa ḍụḅa-ḍụḅatẹ nama ogbo nyanam ẹrẹsị, tẹịn-tẹịntẹ atụndụ ma ḅio na, ele mẹ ḅio na. Ọ̀ ḍụọ-kọrị ḅẹlẹmam ẹrẹsị ọ̀ ḍụọ ḍiḅi apụ na, kụrọ kin-kintẹ arị tẹlẹmarị apụ na nyanam tụndụ ma ḅio na, fịye pakama iḅi akiri ma ḅụ na. 11Anie sikima, Uzaya ọmụgbin ịnyọ nyana gbọrụ ọmụ-ogbo nyanam; Hananaya amadaḅọ ḅe ḅẹrẹtọn-apụ ma ḅẹ gbọrụḅọ tọn Jehẹlị ḍiri-kẹẹḅọ ḅe na, Masẹya opu fịrịmẹnjịḅọ ḅe na pịrị tẹ itu-itu ma ḅụụ in pekele-ḍiki tẹ kịẹn-aḅịḅị ma nimi ḅara ḅụ. 12Ḍa awarị-warị ma ḅẹ sịḅịdapụ tẹ ḅiokpọtẹ ọmụgbin ḅara-ḅaatẹ apụ ma bebe kịẹn-ḅịḅị anie kịnị sonio ẹndẹ oyia asi finji (2,600). 13Ịna suku-ḅio in ḅẹrẹtọn pịrịarị ọmụ-ogbo mẹ ḅẹ apụ anie kịnị maa puku ofori puku amesi, ninea ẹndẹ finji na kịnị jeia si na (307,500), tẹ ḅarasụa amadaḅọ ḅe pịrị ḅarị apụ. 14Uzaya ekpeke na, sụḅa na, ikulele okpoko-sun na, ikulele ọmụgbin-akapa na, iboli na, ḍiki ḅụ fangala tẹ kẹ ye gbin aḍụḅarị na kẹ ọmụ-ogbo mẹmgba pịrị famam. 15Jeruselemu ḅụ ò ye-nimi tẹ ḅara kẹ ye mịẹ ḍin apụ mịẹ pakama wararị, injini kẹ okoro-ḍiein tẹịn na, ḍụḅa-ḍụḅatẹ aḍụḅarị gbin pakama na, kẹ gele awarị ma na, ịkọlị-ịkọlị ma na ḅụ wẹrịm. Ori ereso nwẹnị wasama mu ala-jụjụ-ḅio la, ọ̀ gbala ḅụụ-buama ḅara kẹ ḅarasụa nyana nwenii ọ̀ kụrọm.
In Uzaya Fomum Ori Opu-Amịẹaị Gotẹ
16Kụma ọ̀ kụrọ tẹso, ọ̀ nwẹnị saakị opu amịẹaị mịẹ ọ̀ ḅaa ḅe ye pịrị. Ọ̀ gbala papaaye mịẹm KỊNỊNYANAḄỌ ọ̀ Tamụnọ ḅe ḅụụ, tẹ kụnụaị kẹ KỊNỊNYANAḄỌ ḅe Tẹkẹ-warị mẹ ḅio sọ-mu kụnụaị dọkịma edeni mẹ ọgọnọ dọkịma ḅẹ mum. 17Kụma Azaraya agbamịẹḅọ ḅe ò sọ-mu tẹso, sọ-mum, tẹ ḅiokpọtẹ kụrọ-kụrọtẹ agbamịẹapụ inia si nwẹnị pịkị ori na mu; 18#Pks 30.7,8; Kịẹ 3.10tẹ ịn nwẹnị Amadaḅọ Uzaya dasịẹma tẹ ọ̀ ḅẹẹ, “Uzaya kụnụaị dọkịma KỊNỊNYANAḄỌ ḅe pịrị mẹ sime ị́ pịrị-a, kụma anị sime agbamịẹapụ ma Erọnị owiapụ-awọmẹ ma pịrịm, inima tẹ in mịẹ fịafịama kẹ kụnụaị dọkịma pịrị apụ ma. Pakaa, fịafịa yọ mẹ ḅụ; gbala ị́ mịẹ-irima tẹ ẹrẹsị, anịsakị anị KỊNỊNYANA-TAMỤNỌ ḅe ḅụụ gbọrụ kụn sọ ọkị-ḅo ị́ pịrị ḅịa” 19Anịtẹso anị nwẹnị Uzaya ḅụụ-ḅẹsọọ. Mịọkụ kụnụaị dọkịma ẹfẹrẹ tẹ ọ̀ kẹ kụnụaị dọkịma ḅarịye ọ̀ ḅara-ḅio emi, tẹ ò ḅo ịganị nyana agbamịẹapụ ma pịrị tẹso, sofịnị-obi nwẹnị ọ̀ fụḅara ḅụ kaan-paka agbamịẹapụ ma tọrọkọ, KỊNỊNYANAḄỌ ḅe warị mẹ ḅio, kụnụaị dọkịma edeni mẹ akaka ḅụ. 20Azaraya sịḅịda agbamịẹḅọ ḅe na, agbamịẹapụ mamgba na, ḅọị-ḅọịma ò ḍikim, tẹ ḍikii, ọ̀ fụḅara ḅụ sofịnị-obi paka tẹ! In nwẹnị fọnya ò sukuruma pakama, tẹ oriḅe sọ nwẹnị ḅụụ pụrụ-pụrụ kẹ fọnya paka, gbala KỊNỊNYANAḄỌ ḅe ò fomu tẹ ẹrẹsị. 21Amadaḅọ Uzaya sofịnị-obi kọn mu ọ̀ fịị ene lam; sofịnị-obi-kọnḅọ ḅụ sikima wararị warị ḅio ori angam, gbala in KỊNỊNYANAḄỌ ḅe warị mẹ ḅụ ò ḅelemam ẹrẹsị. Ori owiḅọtụḅọ Jotamụ nwẹnị amadaḅọ ḅe warị-kpo mẹ ḍikiḍiki tẹ ḅẹrẹtọn ama mẹ ḅio ḅẹ apụ ma pịrị. 22Mịọkụ Uzaya amịẹaị tarịye ḅụ ọkị mu kunomaye la kirikọntẹ Ayịzaya ịkịankoroḅọ, Emọzị owiḅọtụḅọ ḅe kẹẹ-a ye ofori. 23#Ayị 6.1Uzaya fịịm, tẹ ịn nwẹnị sime kẹ amadapụ ḍiḅi piri mẹ akaka ò ḍiḅi, gbala ịn ḅẹẹm, “ori sofịnị-obi-kọnḅọ” ẹrẹsị. Ori owiḅọtụḅọ Jotamụ nwẹnị ò kiri ḅụ ama-da.
(C) The Bible Society of Nigeria