भजनमैं 144
144
ङ रक्षा लमिंबै पारा नेरो ङए किल्ला
दाऊदए भजन।
1याहवेह ङ रक्षा लमिंबै पारा ग, छतसि ङ खीए मिं थेब् लब्मुँ।
ङए योमैं नेबर,
नेरो ङए योरिंमैं ल्हडें लबर खीजी लोमिंमुँ।
2खी ङए फिर खोंयोंइ आनुबै म्हाँया लबै परमेश्वर नेरो ङए किल्ला ग,
ङलाइ खाबज्यै तोइ लल् आपिंब ङलाइ जोगेब परमेश्वर ग,
खी ङए ढाल ग, खीए प्हलेर्न ङ ग्वार योंमुँ।
खीजी अरू ह्रेंमैंलाइ ङए न्होंर थेंमिंमुँ।
3ओ याहवेह, म्हि तो जा? क्हिजी तले चए वास्ता लब?
म्हिए च्ह तो जा? क्हिजी तले चए न्हुँ लब?#अयू ७:१७-१८; भज ८:४
4तलेबिस्याँ म्हिम् मुठि घ्रि सो धोंबन् ग,
चए छ्ह छरि धोंले ह्यायाम्।
5ओ याहवेह, ह्रोंसए मु थोंसि क्युरु युमिंनु!
कोंमैंउँइँले मिखु त्होंखरिगे बिसि छुइमिंन्!
6काम्लि-तिम्लि चारमिंसि ङए शत्तुरमैं खन्तोदोंन् प्हुँवाँन्!
क्हिए मे त्हलेमैं ल्हिसि चमैं सग्या-प्हुग्या लवाद्!
7नुबै क्ल्ह्योउँइँले ह्रोंसए यो स्योमिंनु,
प्ल्होंखबै बाडि नेरो आगुए ह्युलर्बै म्हिमैंए योउँइँले
ङ जोगेमिंसि फ्रेमिंनु।
8चमैंए सुँइ स्योर ताँमैं पोंमुँ,
धै चमैंइ कसम चलेया स्योलिबै ताँ पोंमुँ।
9ओ परमेश्वर, क्हिए ल्हागिर ङ छारा क्वे घ्रि प्रिंब्मुँ;
तार च्यु प्ह्याबै सारङ्गी ह्रासि ङ क्हिए मिंर क्वे प्रिंब्मुँ,
10क्हिजी म्रुँमैंलाइ ट्होल् पिंमुँ,
क्हिजी ह्रोंसए के लबै दाऊदलाइ न्होह्रों लबै सेलाउँइँले जोगेमिंमुँ।
11ङलाइ आगुए ह्युलर्बै म्हिमैंए योउँइँले जोगेमिंसि फ्रेमिंनु।
चमैंए सुँइ स्योर ताँमैं पोंमुँ,
धै चमैंइ कसम चलेया स्योलिबै ताँ पोंमुँ।
12झाइले फ्रेंसि तबै त्हेर ङ्योए च्हमैं
सपर्दिबै सिंधुँमैं धोंन् तरिगे,
धै ङ्योए च्हमिमैं दरबार सिंगार्दिबर
कुन्दिबै त्होमैं धोंब तरिगे;
13ङ्योए धनसारमैंर ल्हें खालर्बै रोमैंइ प्लिंरिगे,
ङ्योए क्युमैं हजार गुणा बडिरिगे,
ङ्योए म्रोंजरे लाखै लाख क्यु तरिगे;
14ङ्योए क्ल्यामैंइ ल्हिबै ति नोरिगे,#144:14 हिब्रू क्युइर, ङ्योए मेमैंइ ल्हें झज फिरिगे
ङ्योए सहरए गारमैं आफुरिगे,
धै ङ्यो झेलर ह्याल् आत्हुरिगे,
ङ्योए घ्याँजरे क्रोबै कै आथेरिगे!
15चु आशिकमैं योंबै म्हि ङ्हो सब् ग!
याहवेहलाइ परमेश्वर बिसि म्हाँदिब्मैं ङ्हो सब् ग!
Obecnie wybrane:
भजनमैं 144: GCMB
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2020, Wycliffe Bible Translators, Inc. All rights reserved.