गलाती 1
1
पावल कुल्मिंबै चेला चिब ग
1कुल्मिंबै चेला चिब ङ पावलउँइँले जय मसीह मुँ। कुल्मिंबै चेला चिब (तसि परमेश्वरए के लबर) ङलाइ म्हिमैंइ त्हाँसि कुलब् आङिं, म्हिमैंइ खटिदिब आङिं। येशू ख्रीष्टलाइ सिबउँइँले सोगों लमिंबै परमेश्वर आबा नेरो येशू ख्रीष्टजीन् ङलाइ त्हाँसि कलब् ग। 2ङ नेरो ङने मुँबै ताँन् अलि-अङाँमैंउँइँले क्हेमैं गलातिया ह्युलर्बै बिश्वासीमैं ताँनलाइ जय मसीह मुँ।
3ङ्योए परमेश्वर आबा नेरो प्रभु येशू ख्रीष्टउँइँले क्हेमैंइ दयाम्हाँया नेरो छिं ङ्हाँल् योंरिगे। 4चु जुगर्बै आछ्याँबै शक्तिउँइँले ङ्योलाइ फ्रेमिंबै ल्हागिर येशू ख्रीष्टजी ङ्योए आछ्याँबै केए सजैं नोइ। ङ्योए परमेश्वर आबाए सैंर मैंब् धोंले खीजी ह्रोंसलाइन ङ्योए ल्हागिर सुम्पिदिइ। 5परमेश्वरलाइ खोंयोंन् बिलेया थेबै मान तरिगे। आमेन।
सैं तोंबै ताँ घ्रि मत्त्रे मुँ
6ङ क्हेमैं म्रोंसि ङ अचम्म म्हाँदिइमुँ। येशू ख्रीष्टए दयाम्हाँयाउँइँले क्हेमैंलाइ त्हाँबै परमेश्वरलाइ च्हौ युनन् पिसि क्हेमैं अर्कोन् “सैं तोंबै ताँए” लिलि प्ररिइमुँ। 7क्ह्रोंसेंन येशू ख्रीष्टउँइँले खबै सैं तोंबै ताँ बाहेक अर्को सैं तोंबै ताँ आरे। ख्रीष्टउँइले खबै सैं तोंबै ताँलाइ तो धोंइ आङ्हाँन्ले खेंमैंए सैंर्बै ताँ पोंब्मैं को-कोइ मुँ। चमैंइ क्हेमैंए सैं ङ्हिंरि लवाइमुँ। 8दिलेया ङिइ बिप्रबै येशू ख्रीष्टउँइँले खबै सैं तोंबै ताँ भन्दा स्योबै ताँ ङिइ लोमिंलेया, स्वर्गउँइँले युबै स्वर्गदूतइ लोमिंलेया च म्हिइ परमेश्वरउँइँले सराप योंरिगे। 9ङिइ ओंसोंन् बिब् धोंले तोगो या धबै बिमुँ, क्हेमैंइ बिश्वास लबै सैं तोंबै ताँ भन्दा स्योबै ताँ खाबज्यै क्हेमैंने बिम् बिस्याँ च म्हिइ परमेश्वरउँइँले सराप योंरिगे। 10ङइ म्हिमैंउँइँले स्याबासि म्हैरिइमुँ उ परमेश्वरउँइँले स्याबासि म्हैरिइमुँ? ङइ म्हिमैंए सैं तोंन् लल् म्हैरिइमुँ वा? ङइ अझै म्हिमैंए सैं तोंन् लल् म्हैरिस्याँ ङ ख्रीष्टए सेवा लल् आखाँमल।
पावल खैले कुल्मिंबै चेला चिब तइ
11ओ ङए अलि-अङाँमैं, ङइ बिप्रबै सैं तोंबै ताँ म्हिउँइँले खब आङिं। चु ताँ क्हेमैंइ सेरिगे बिब ङए सैं मुँ। 12ङइ चु सैं तोंबै ताँ म्हिउँइँले योंब आङिं, खाबज्यै या ङलाइ चु ताँ लोमिंब आङिं, येशू ख्रीष्टन् ङलाइ खीए शक्ति उँइँमिंइ। धै चु सैं तोंबै ताँ खि ङाँइँले योंब् ग।#चिब्मैं ९:३-५; १८:९-१०; २२:१७-२१
13ङइ ओंसों खैले छ्ह थोल बिबै ताँ क्हेमैंइ थेल् खाँइमुँ: ङइ यहूदी धर्म म्हाँदिबै त्हेर परमेश्वरए म्हिमैंलाइ बेल्ले ह्रुगुदिसि नास लल् म्हैल।#चिब्मैं ८:३; २२:४-५; २६:९-११
14ङए खेमैंइ म्हाँदिरिबै छ्यामैं ङइ बेल्ले छेन्ले म्हाँदिमल। यहूदी धर्म म्हाँदिबर ङए ह्रेंर्बै थुमैं न्होंर्बै ङ चिब मुँल।#चिब्मैं २२:३
15दिलेया परमेश्वरजी ह्रोंसए दयाम्हाँयाउँइँले ङ फिब् भन्दा ओंसोंन् खीए म्हि तबर ङलाइ त्हाँल् खाँल। 16झाइले ङइ अरू ह्रेंमैं ङाँर सैं तोंबै ताँ बिप्ररिगे बिसि परमेश्वरजी ङलाइ खीए च्हए दर्शन पिंइ। खीजी छाबै दर्शन पिंबइले ङइ “सैं तोंबै ताँ खैब जा?” बिसि खाब्ने या सल्ला किंल् आत्हु।#चिब्मैं ९:३-६; २२:६-१०; २६:१३-१८ 17ङ भन्दा ओंसोंन् कुल्मिंबै चेला चिब तब्मैं ङाँर सल्ला किंबर यरूशलेमर आह्याल। बरु ङ युनन् अरब बिबै ह्युलर ह्याइ, च लिउँइँ दमस्कस सहरर एखइ।
18सोंदि लिउँइँ ङ पत्रुसने#1:18 ग्रिक क्युइरि, केफास त्होबर यरूशलेम सहरउँइँ ह्याइ। धै चने बालु च्युसे ङ्हगें समा टिइ।#चिब्मैं ९:२६-३० 19दिलेया चर प्रभुए अलि याकूबलाइ मत्त्रे ङइ त्होइ, अरू कुल्मिंबै चेला चिब खाबलाज्यै या आत्हो। 20(ङ परमेश्वरए उँइँर स्योर आते, ङइ प्ह्रिबै ताँ क्ह्रोंसेंन्बै ग।) 21च लिउँइँ ङ सिरिया नेरो किलिकिया बिबै ह्युलउँइँ ह्याइ। 22च त्हे समा यहूदीया ह्युलर्बै बिश्वासीमैंइ ङलाइ आम्रोंल, 23चमैंइ ङए बारेर छाबै बयन मत्त्रे थेल: “चइ ओंसों म्हिमैंइ बिश्वास आलरिगे बिसि ङिलाइ ह्रुगुदिल, तिंजोरोम् बिश्वास लद् बिसि च ह्रोंसइन बिप्रइमुँ।” 24छले ङइ सैं एसि परमेश्वरए के लब् म्रोंसि चमैंइ परमेश्वरए मिं क्वेइ।
Obecnie wybrane:
गलाती 1: GCMB
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2020, Wycliffe Bible Translators, Inc. All rights reserved.