चेला चिब्मैंए केमैं 25

“ङ रोमी थेबै म्रुँए उँइँर राल् पिंन्!” बिसि पावलइ यो छ्युँ लब

1फेस्तस यहूदीया ह्‍युलर्बै कैसरियार खबै सोंरो लिउँइँ यरूशलेमउँइँ ह्‍याइ। 2चर ख्रो पिंबै खेगि चिब्मैं नेरो यहूदीमैंए न्होंर्बै क्रथे मिंथेमैंइ पावलए फिर छ्याब् ल्हैदिइ। 3चमैंइ पावल घ्याँर्न सैवाबै सैं लसि, “पावल यरूशलेमर कुल्‍मिंन्,” बिसि फेस्‍तसने यो छ्युँ लइ।

4दिलेया फेस्‍तसइ चमैंने बिइ, “पावल कैसरियार्न च्‍युथेंइँमुँ, ङै या युनन् चर ह्‍याइन मुँ। 5छतसि क्हेमैं न्होंर्बै चिब्मैं ङने चर ह्‍यारिगे, धै च म्हिने तोइ आछयाँबै ताँमैं स्यास्याँ चए बिरोधर उजुर झोंरिगे।”

6फेस्तस चमैंने बालु प्रेरो च्युरो दे भन्दा ल्हें आटिल्‍ले कैसरियाउँइँ एह्‍याइ। चर फेनेबै प्हँन्हाँग्धोंन् निसाफ लबै क्ल्ह्‍योर टिसि चइ सिपाइमैंने “पावल चुर पखो!” बिइ। 7पावल फेखबै तोंदोंन् यरूशलेमउँइँले युबै यहूदीमैं चए कारग्युले रासि चए बिरोधर बेल्‍ले आछ्याँबै छ्याब्मैं ल्हैदिइ। दिलेया चमैंइ खेंमैंइ ल्हैदिबै छ्याब्मैंला तोइ प्रमाण पिंल् आखाँल। 8पावलइ ह्रोंसए बारेर पोंदै छ बिइ, “ङइ यहूदीमैंए ठिमए बिरोधर, मन्दिरए बिरोधर नेरो कैसरए#25:8 कैसर रोमर्बै धाँसे थेबै म्रुँ। बिरोधर तोइ आछ्याँबै के आलइमुँ।”

9दिलेया फेस्‍तसइ यहूदीमैं सैं तोंन् लबर पावलने बिइ, “यरूशलेमर ह्‍यासि चर्न ङइ चु ताँए बारेर निसाफ लम् क्हिए सैं तो मुँ? तम् उ आत?”

10पावलइ बिइ, “ङ कैसर म्रुँए निसाफ लबै क्‍ल्‍ह्‍योर्न रारिइमुँ, चुर्न ङए निसाफ तल् त्‍हुम्। यहूदीमैंला ङइ तोइ न्होह्रों आलइमुँ। चु ताँ क्हिज्यै या छेनालेन् सेइमुँ। 11ङइ परमेश्‍वरए ठिममैं आम्‍हाँदिस्‍याँ, सिल् त्हुबै के या ङइ लस्‍याँ, ङ सिबरै या तयारन् मुँ। दिलेया यहूदीमैंइ ङए फिर ल्‍हैदिबै ताँन् छ्याब्मैं क्‍ह्रोंसेंन् आङिंस्‍याँ ङ चमैंए योर खाबज्‍यै पिंल् आखाँ। छतसि ङए ताँ थेमिंन् बिसि थेबै कैसर म्रुँनेन् ङ यो छ्युँ लम्।”

12पावलए ताँ थेसि फेस्तसइ चिबनाँब्मैंने सल्‍ला लसि पावलने बिइ, “क्हिइ कैसर म्रुँ ङाँर ह्‍याम् बिबइले ङइ क्हि कैसर ङाँर्न कुलब्मुँ।”

रोमी क्रथे फेस्तसइ अग्रिपास म्रुँने सल्‍ला लब

13दे त्हिंइ लिउँइँ अग्रिपास म्रुँ नेरो चए अङाँ बरनिकि बिब फेस्तसने त्होबर कैसरियार खइ। 14चमैं चर दे त्हिंइ टिबै लिउँइँ फेस्तसइ म्रुँने पावलए मुद्दाए बारेर छले ताँ लइ: “फेलिक्सइ च्युथेंबै म्हि घ्रि चुर मुँ। 15ङ यरूशलेमर मुँमा, ख्रो पिंबै खेगि चिब्मैं नेरो यहूदी चिबनाँब्मैंइ चए बिरोधर छ्याब् ल्हैदिसि चलाइ दण्ड पिंन् बिसि ङने बिल। 16दिलेया ङइ चमैंने बिइ, ‘छ्याब् ल्हैदिबै म्हिमैं नेरो छ्याब् योंबै म्हि ङ्हिंना-ङ्हिंन्‍ने सुँने सुँ आतन् समा, धै ह्रोंसए फिर ल्हैदिबै छ्याब्मैंए बारेर पोंबै मौका आयोंन् समा, खाबलाज्यै या छलेन् दण्ड पिंब रोमी सरकारए रोसर आरे।’

17“छतमा चमैं खागु तसि चुर युमा ङइ क्हैल् आलन्ले प्हँन्हाँग्धोंन् निसाफ लबै क्‍ल्‍ह्‍योर टिसि, ‘पावल चुर पखो,’ बिसि ल्हैदिइ। 18दिलेया ङइ मैंब् धोंले छ्याब् ल्हैदिब्मैंइ पावलए मुद्दार आछ्याँबै ताँ तोइ पखल् आखाँल। 19चमैंए आक्ह्रिबै ताँ चमैंए धर्मए बारेर नेरो सिल् खाँबै येशू बिबै म्हिए बारेर मुँन। पावलइ येशू अझै सोंगोंन् मुँ बिसि बिमना। 20छतसि चु ताँमैंए बारेर ङइ छेनाले आक्होबइले चु ताँए बारेर ‘निसाफ लबर यरूशलेमर ह्‍याबै सैं मुँ उ?’ बिसि ङइ पावलने ङ्योएइ। 21दिलेया ‘रोमी थेबै म्रुँइ फैसला आलन् समा ङलाइ झेलर्न च्युथेंन्,’ बिसि पावलइ यो छ्युँ लइ। छतसि चलाइ कैसर म्रुँ ङाँर आकुलन् समा छेनाले रुँन् बिसि ङइ सिपाइमैंने ल्हैदिइ।”

22चु ताँ थेसि अग्रिपासइ “चु म्हिए ताँ ङज्यै या थेदा ङ्हाँइमुँ,” बिमा फेस्‍तसइ “प्हँन क्हिइ चए ताँ थेब्मुँ,” बिइ।

पावल अग्रिपासए उँइँर राब

23प्हँन्हाँग्धों अग्रिपास नेरो बरनिकि थेबै मानले खइ। धै रोमी पल्टनर्बै चिब्मैं नेरो कैसरिया सहरर्बै चिबनाँब्मैंने थेबै च्हों धिं न्होंर होंइ। धै फेस्‍तसइ “पावल चुर पउ!” ल्हैदिमा सिपाइमैंइ च पखइ। 24च लिउँइँ फेस्‍तसइ बिइ, “ओ अग्रिपास म्रुँ नेरो चुर मुँबै ताँन् चिबनाँब्मैं! क्‍हेमैंइ चु म्हि म्रोंइँमुँ। ताँन् यहूदीमैंइ चु म्हि तारे सैवाल् त्हुम् बिसि यरूशलेमर नेरो चुरै या ङने यो छ्युँ लइमुँ। 25दिलेया चु म्हि सैलन् त्हुबै केमैं ङइ तोइ आयों। धै चज्यै या रोमी थेबै म्रुँ ङाँर ह्‍याम् बिसि यो छ्युँ लबइले ङइ चु कुलबर होंइँमुँ। 26दिलेया चुए बारेर ङइ रोमी थेबै म्रुँलाइ प्ह्रिबै ताँमैं तोइ आरे। छतसि ङइ चु म्हि क्हेमैंए उँइँर नेरो खास लइरि अग्रिपास म्रुँए उँइँर पखइमुँ। ङ्योइ चने ताँमैं ङ्युँलु-च्युलु लबै लिउँइँ चुए बारेर ङइ रोमी म्रुँलाइ ताँमैं प्ह्रिल् योंब्मुँ। 27तलेबिस्याँ चए बारेर ल्हैदिबै छ्याब्‌मैं तोइ आप्ह्रिल्‍ले चलाइ छलेन् कुलबर छ्याँब आङ्हाँ।”

Obecnie wybrane:

चेला चिब्मैंए केमैं 25: GCMB

Podkreślenie

Kopiuj

Porównaj

Udostępnij