Zakaryaasa 9
9
Isra7eele Morketi Pirdetana Pirda
1Asaa ayfeynne Isra7eele asa ubbaa ayfey Godaa xeelliya gisho, Sadraaka biittaynne Damasqo katamay dhayanaysa, Goday odida pirda qaalay haysa. 2Qassi ha pirday Hadraaka zawa gidida Hamaata katamaanne qara gidida Xiroosanne Sidoona katamata bolla ha pirday gakana. 3Xiroosa katamay baw mino miixa gimbis. Qassi biraanne worqaa biittada dooris. 4Shin I shiishidaba ubbaa Goday ekana; iya shaluwa abban holana; katamay taman meetetana.
5Asqaloona katamay hessa be7idi yayyana; Gaaza katamay un7etana; Eqroona katamay ufaysi dhayana. Gaaza kawoy dhayana; Asqaloona katamay kaysa gidana. 6Ashdooda kataman walaha asay daana.
Goday haysada yaagees: “Filisxeemeta otoruwa taani wursana. 7Taani enta doonape suuthi, enta achaafe tunaba diggana. Entafe attidaysati nu Xoossaa asi gidana; qassi Yihuda yaraape issuwa gidana. Eqroona asay Yaabuse asaada ta ase gidana. 8Hessafe guye, olanchoti oykonnaada, taani ta keethaa naagana. Taani ta huuphen naagiya gisho, zaaridi oonika ta asaa un7ethenna” yaagees.
Xiyoone Kawa Yuussaa
9Neno, Xiyoone katame, ufayta! Neno, Yerusalaame katame, ilila! Heko, xoonida ne xillo kawoy neeko yees. Ne kawoy ashke gididi, hare bolla, aadhidi hare mara bolla uttidi neeko yees.
10Taani para gaareta Isra7eelepe, ola parata Yerusalaamepe dhaysana; ola dongiya mentherethana. Ne kawoy kawotethatas saro awaajana; I abbas gaxape hini gaxa gakanaw Efraxiisa shaafape doomidi sa7aa gaxaa gakanaw haarana.
11Taani neera suutha caaquwa gisho, qashetida ne asata haathi bayna ollaafe kessana. 12Hinteno, sinthan ufaysi de7iya qasho asato, hinte miixaa simmite. Kaseysa gisho dako shalo hintew immanaysa hachi taani hintew awaajayis. 13Taani Yihuda dongeda, Isra7eele donge toorada go7etana. Xiyoone, taani ne nayta Girike nayta bolla denthana; nena wolqaama olanchuwa mashshaa mela oothana.
14He wode Goday enta bolla qoncana; iya donge tooray wol7antha wol7amana. Ubbaa Haariya Goday moyze punnana; dugeha bagga goteda dendana. 15Ubbaafe Wolqaama Goday enta gisho oletana. Enti banta morketa wursana; yambarshan oleyisata yedhana. Enti banta morketa suuthaa woyne ushsha uyana; suuthi keren kumiyada kumana; enti yarsho bessan gukiya suuthada gukana.
16He gallas henthanchoy ba dorsata ashsheysada Goday enta Xoossay enta ashshana. Kallacha bolla de7iya alleeqoda enti Godaa biittan phoolana. 17Enti waanidi lo77onne puulancho gidandesha! Na7atetha nayta kathay, geela7o nayta woyne ushshay aacisana.
Obecnie wybrane:
Zakaryaasa 9: GFBLVF
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The Word for the World International and The Word for the World Ethiopia