KO ‘EKISOTO 40
40
Ko hono Fokotu‘u mo Fakatāpui ‘o e Tāpanekale ‘Afio‘anga ‘o Sihová
1PEA folofola ‘a e ‘Eiki kia Mōsese, ‘o pehē, 2‘I he ‘uluaki ‘aho ‘o e ‘uluaki māhina te ke fokotu‘u ‘a e Tāpanekale ‘o e Tēniti Fe‘iloaki‘anga. 3Pea te ke tuku ki ai ‘a e ‘A‘ake Fakamo‘oni‘anga, pea te ke puipui‘i ‘a e ‘A‘ake ‘aki ‘a e Tatau. 4Pea te ke fakahū mai ‘a e Tēpile, pea te ke fakamā‘opo‘opo ‘a e ngaahi me‘a ‘oku ‘i ai; pea te ke fakahū ki ai ‘a e Tu‘unga maama, ‘o hilifaki ‘a e ngaahi nge‘esi maama. 5Pea te ke tuku ‘a e ‘ōlita Koula tutu‘anga ‘inisēnisi ‘i he tuha mo e ‘A‘ake Fakamo‘oni‘anga, pea te ke tau ‘a e puipui ‘i he matapā ‘o e Tāpanekale. 6Pea te ke tuku ‘a e ‘ōlita Tutu‘anga-feilaulau ‘i he tuha mo e matapā ‘o e Tāpanekale ‘o e Tēniti Fe‘iloaki‘anga. 7Pea te ke tuku ‘a e Pālutu‘anga ‘i he vaha‘a ‘o e Tēniti Fe‘iloaki‘anga mo e ‘ōlita, pea te ke ‘ai ha vai ki ai. 8Pea te ke fokotu‘u ‘a e Loto‘ā takatakai, pea te ke tau ‘a e puipui ‘o e matapā ‘o e loto‘ā.
9Pea te ke to‘o ‘a e lolo pani, pea te ke pani ‘a e Tāpanekale mo e me‘a kotoa pē ‘oku ‘i ai, pea te ke fakatāpui ia, mo hono nāunau kotoa: pea ‘e tapu leva. 10Pea te ke pani ‘a e ‘ōlita tutu‘anga-feilaulau, mo hono nāunau kotoa, pea te ke fakatāpui ‘a e ‘ōlita: pea ‘e toputapu leva ‘a e ‘ōlita. 11Pea te ke pani ‘a e pālutu‘anga, mo hono tu‘unga, pea te ke fakatāpui ia.
12Pea te ke fakaofi mai ‘a ‘Ēlone mo hono ngaahi foha ki he matapā ‘o e Tēniti Fe‘iloaki‘anga, pea te ke kaukau‘i kinautolu ‘i he vai. 13Pea te ke fakakofu ‘aki ‘a ‘Ēlone ‘a e ngaahi kofu tapu, pea te ke pani ia, pea te ke fakatāpui ia, ke ne fai ‘a e ngāue fakataula‘eiki kiate au. 14Pea te ke fakaofi mo hono ngaahi foha, pea te ke ‘ai sote kiate kinautolu: 15pea te ke pani kinautolu, ‘o hangē ko ho‘o pani ‘enau tamai, ke nau fai ‘a e ngāue fakataula‘eiki kiate au: pea ‘e hoko honau pani ko ia ko honau fakanofo ke taula‘eiki ki honau ngaahi to‘utangata ‘o ta‘engata.
16Pea fai ‘e Mōsese: ‘o hangē tofu pē ko e tu‘utu‘uni ‘a e ‘Eiki kiate ia, na‘e pehē ‘ene fai. 17Pea ko ia ‘i he hoko ‘a e ‘uluaki māhina ‘i hono ua ‘o e ta‘u, pea ‘i hono ‘uluaki ‘aho ‘o e māhina, na‘e fokotu‘u ‘a e Tāpanekale. 18Pea langa ‘e Mōsese ‘a e Tāpanekale, ‘o ne ‘ai hono ngaahi tu‘unga, mo fokotu‘u hono holisi, ‘o ne velo hono ngaahi kiato, ‘o ne fokotu‘u hono ngaahi pou. 19Pea ne folahi ‘a e Tēniti ke fakapulonga ‘a e Tāpanekale, ‘o ne ‘ai ‘a e ‘u‘ufi ‘o e Tēniti ki ai mei ‘olunga; ‘o hangē ko e tu‘utu‘uni ‘a e ‘Eiki kia Mōsese. 20Pea ne hanga ‘o tuku ‘a e Fakamo‘oni ki he ‘A‘ake, pea ne ‘ai ‘a e kaufata ki he ‘A‘ake, ‘o ne hilifaki ‘a e Hōifua‘anga ki he funga ‘A‘ake: 21‘o ne fakahū ‘a e ‘A‘ake ki he Tāpanekale, ‘o ne tau ‘a e Tatau puipui, ‘o ne puipui‘i ‘a e ‘A‘ake Fakamo‘oni‘anga; ‘o hangē ko e tu‘utu‘uni ‘a e ‘Eiki kia Mōsese.
22Pea ne tuku ‘a e Tēpile ki he Tēniti Fe‘iloaki‘anga, ki he fa‘ahi tokelau ‘o e Tāpanekale, ‘i he tu‘a Tatau. 23Pea na‘a ne fakamā‘opo‘opo ‘i hono funga ‘a e mā ‘i he ‘ao ‘o Sihova; ‘o hangē ko e tu‘utu‘uni ‘a e ‘Eiki kia Mōsese. 24Pea na‘a ne ‘ai ‘a e Tu‘unga Maama ki he Tēniti Fe‘iloaki‘anga ke fehangahangai mo e Tēpile, ki he fa‘ahi Tāpanekale ki he Tonga. 25Pea na‘a ne hilifaki ‘a e ngaahi nge‘esi maama ‘i he ‘ao ‘o Sihova; ‘o hangē ko e tu‘utu‘uni ‘a e ‘Eiki kia Mōsese. 26Pea na‘a ne tuku ‘a e ‘ōlita Koula ki he Tēniti Fe‘iloaki‘anga ‘i he ‘ao ‘o e Tatau: 27pea na‘a ne tutu ai ‘a e ‘inisēnisi namu kakala; ‘o hangē ko e tu‘utu‘uni ‘a e ‘Eiki kia Mōsese. 28Pea na‘a ne tau ‘a e puipui ki he matapā ‘o e Tāpanekale. 29Pea ko e ‘Ōlita Tutu‘anga-feilaulau na‘a ne tuku ‘i he mata Tāpanekale ‘o e Tēniti Fe‘iloaki‘anga, pea ne feia ai ‘a e feilaulau-mōifua mo e feilaulau me‘akai; ‘o hangē ko e tu‘utu‘uni ‘a e ‘Eiki kia Mōsese. 30Pea ne tuku ‘a e Pālutu‘anga ki he vaha‘a ‘o e Tēniti Fe‘iloaki‘anga mo e ‘ōlita, ‘o ne ‘ai ki ai ha vai kaukau. 31Pea na‘e fanofano ai ‘e Mōsese mo ‘Ēlone mo hono ngaahi foha honau nima mo honau va‘e: 32ka nau ka hū ki he Tēniti Fe‘iloaki‘anga, pea ka nau ka ‘unu‘unu ki he ‘ōlita, na‘a nau fanofano ai; ‘o hangē ko e tu‘utu‘uni ‘a e ‘Eiki kia Mōsese. 33Pea ne fokotu‘u ‘a e Loto‘ā takatakai ki he Tāpanekale mo e ‘ōlita, ‘o ne tau ‘a e puipui ki he matapā ‘o e loto‘ā. Pea ‘osiki ai ‘e Mōsese ‘a e fekau.
Ko e Tu‘u ‘a e Konga ‘Aó Mei he Funga Tāpanekale ‘Afio‘anga ‘o Sihová
(Nōm 9.15-23)
34Pea na‘e toki fakapūlou ai ‘e he ‘Ao ‘a e Tēniti Fe‘iloaki‘anga, pea na‘e fā‘ofale ‘a e Sikaina ‘o e ‘Eiki ‘i he Tāpanekale.#1 Tu‘i 8.10-11; ‘Ais 6.4; ‘Isi 43.4-5; Fkhā 15.8 35Pea na‘e ‘ikai lava ‘e Mōsese ke hū ki he Tēniti Fe‘iloaki‘anga koe‘uhi ko e nofo ki ai ‘a e ‘Ao, mo e fonu ‘a e Tāpanekale ‘i he Sikaina ‘o e ‘Eiki. 36Pea ‘i he fakahā‘ele hake ‘a e ‘Ao mei he Tāpanekale na‘e hiki fononga ai ‘a ha‘a ‘Isileli ‘i honau ngaahi fononga kotoa pē: 37ka ‘oka ‘ikai fakahā‘ele ‘a e ‘Ao, na‘e ‘ikai te nau hiki fononga, kae‘oua ke fakahā‘ele ia. 38He na‘e nofo‘ia ‘a e funga Tāpanekale ‘e he ‘Ao ‘a e ‘Eiki, ‘aho, pea ‘i he pō na‘e ‘i ai ha afi, ‘o sio ki ai ‘a e fale kotoa ‘o ‘Isileli, ‘i honau ngaahi fononga kotoa pē.
Obecnie wybrane:
KO ‘EKISOTO 40: TMB
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tongan Moulton Bible © Bible Society of the South Pacific, 2011.
