‘Apositoló 27
27
1PEA ‘i he tu‘utu‘uni leva ke mau folau ki ‘Ītali, na‘e tuku ‘a Paula mo ha tu‘unga pōpula kehe ki ha Senituliō na‘e hingoa ko Suliasi, ‘a ia na‘e kau ki he vāhenga tau ko ‘Akosito. 2Pea mau heka ki ha vaka ‘Ātalamaito, ‘a ia na‘e teu folau ki he ngaahi feitu‘u ‘o ‘Ēsia, ‘o mau tuku folau atu; pea na‘e ō mo kimautolu ‘a ‘Ālisitako, ko e Masitōnia mei Tesalonaika. 3Pea ko e ‘aho ‘e taha na‘a mau tau ki Saitoni. Pea na‘e angalelei ‘a Suliasi kia Paula, ‘o ne tuku ke ne ‘alu ki hono kau fe‘iloaki ke ma‘u ‘enau ‘ofa. 4Pea kuo mau tuku folau mei ai, pea mau ‘alu ‘i he ū ‘o Saipalo, he na‘e tokai ‘a e matangi. 5Pea mau folau atu foki ‘i he Tahi ‘o Silisia mo Pamifilia, ‘o mau hoko ki Maila ‘i Līsia. 6Pea ‘ilo ai ‘e he senituliō ha vaka ‘Ālekisānitia ko ‘ene folau ki ‘Ītali; ‘o ne fakaheka kimautolu ki ai.
7Pea ko e me‘a ‘i he‘ene ‘aho lahi mo ‘emau ngaholo si‘i pē, ‘o ‘ikai meimei ma‘u ‘a Naitusi ko e kovi ‘a e matangi, ko ia na‘a mau folau ‘i he ū ‘o Kēliti ‘o a‘u ki Salemone. 8Pea mau toki fakateletele, ka na‘e faingata‘a; ‘o mau hoko ki ha potu na‘e ui ko Taulanga Lelei, ‘a ia ‘oku tu‘u ofi ai ‘a e kolo ko Lāsea.
9Pea kuo mole ha taimi lahi, pea matamata tu‘utāmaki ‘eni ‘emau folau, he kuo mahili ‘eni ‘a e ‘aukai,#27.9 ‘aukai; Ko e ‘Aho ‘o e Fakaleleí eni. Na‘e kātoanga‘i ia ‘i he konga ki mui ‘o Sepitemá, pe ko e konga ki mu‘a ‘o ‘Okatopá, ‘a ia ko e vaha‘a ‘alotāmaki ‘o fakatu‘utāmaki ai ‘a e folau vaká. ko ia na‘e tokoni ‘a Paula kiate kinautolu, 10‘o ne pehē, Kau Matāpule, ‘oku ou vakai ‘oku hangehangē ka fakatu‘utāmaki ‘a e folau ni; pea lahi ‘a e maumau, ‘o ‘ikai ‘o e uta mo e vaka pē, ka ‘o ‘etau mo‘ui foki. 11Ka ko e senituliō, na‘e mamafa ange kiate ia ‘a e lea ‘a e toutai, mo ia na‘e pule ki he vaka, ‘i he lea ‘a Paula. 12Kae‘uma‘ā ko e taulanga ia na‘e ‘ikai lelei ke hūfanga ai ‘i he fa‘ahita‘u afā: ko ia, na‘e loto ‘a e tokolahi ke tuku folau mei ai, hei‘ilo te nau lava ke ma‘u ‘a Finisi ke hūfanga ai; ko e taulanga ia ‘o Kēliti ‘oku ū ki he matangi tonga-hihifo mo e tokelau-hihifo.#27.12 tonga-hihifo mo e tokelau-hihifo; pe tokelau-hahake mo e tonga-hahake.
13Pea ‘i he‘ene angiangi mei he Tonga, na‘a nau lau kuo lava ‘enau fakakaukau; ‘o nau fusi taula, ‘o nau fakateletele ‘i Kēliti, ‘o ofi ‘aupito ki ‘uta. 14Ka kuo te‘eki ke nau loko tō atu, mo e hifo mai mei ‘uta ha matangi hangē ha ‘ahiohio, ‘oku hingoa ko e ‘Eulakulone. 15Pea ‘i he mo‘ua ai ‘a e vaka, ‘o ‘ikai lava ke fakatauala, na‘a mau tuku, ‘o mau ‘au‘auhia. 16Pea mau lele ki he ū ‘o ha ki‘i motu na‘e ui ko Kalauta, pea na‘e ‘ikai te mau meimei lava ke ma‘u ‘a e vaka fokotu‘u. 17Pea kuo fusi leva ia, na‘a mau hanga ‘o ngaohi ‘a e vaka, ‘o tālī. Na‘a mau manavahē foki na‘a mau tūkia ‘i Sītela, ko ia na‘a mau hu‘i ‘a e alangavaka ‘olunga, pea mau toki lepelepaheke. 18Pea ‘i he‘emau mātu‘aki matangia ‘i he ‘aho ‘e taha, 19na‘a mau tolo ‘a e uta; pea ‘i hono tolu ‘o e ‘aho na‘a mau hanga ‘e kimautolu ‘o laku ‘a e nāunau ‘o e vaka. 20Pea ‘i he‘ene ‘aho lahi ‘o ‘ikai hā ‘a e la‘ā pe ko e ngaahi fetu‘u, mo e kei falala mālohi ‘a e matangi, na‘e mole ‘aupito ‘emau ‘amanaki ki he mo‘ui.
21Kae‘uma‘ā na‘e lahi ‘a e ta‘ekai: kae toki tu‘u ‘a Paula ‘i honau lotolotonga, ‘o ne pehē, Kau Matāpule, na‘a mou mei tuitala kiate au, ‘o ‘oua ‘e tuku folau mei Kēliti, ‘o fenāpasi mo e tu‘utāmaki ni mo e maumau. 22Ka na‘a mo eni ‘oku ou tokoni atu ke mou fakato‘oto‘a: koe‘uhi ‘e ‘ikai mate hamou toko taha, ka ko e vaka pē. 23He na‘e tu‘u ofi mai ‘anepō ha ‘āngelo ‘a e ‘Otua, ‘a ‘Ene ‘Afio ‘oku ‘o‘ona au, 24pea ko ia ‘oku ou lotu ki ai, ‘o ne pehē mai, ‘E Paula, ‘oua te ke manavahē; kuo pau te ke tu‘u ‘i he ‘ao ‘o Sisa: pea ko eni, kuo me‘a‘ofa‘aki ‘e he ‘Otua kiate koe ‘a e kakai kotoa pē ‘oku mou folau mo koe. 25Ko ia, ‘a matāpule, mou lototo‘a: he ‘oku ou tui ki he ‘Otua ‘e hoko pē ‘o hangē ko ‘ene folofola mai. 26Ka kuo pau tokua, te tau tūkia ‘i ha motu.
27Pea ‘i hono pō hongofulu mā fā, lolotonga ‘emau pāea holo ‘i he tahi ko ‘Ātalia, ‘iloange, ‘i he tu‘uapō, na‘e mahalo ‘a e kau vaka kuo nau ofi ki ha fonua. 28Pea nau tukutuku, ko e uangokumi: pea nau fai atu si‘i ‘o toe tukutuku, ko e tekumi mā nima. 29Pea mau manavahē na‘a ‘iloange te mau tūkia ‘i ha potu ‘oku hangatāmaki, ko ia na‘a nau lī ha taula ‘e fā mei he taumuli, ‘o nau faka‘amu ke ‘aho. 30Pea ‘ahi‘ahi ‘a e kau vaka ke feholaki mei he vaka, pea nau tukutuku hifo ‘a e vaka fokotu‘u ki he tahi, ‘o lau tokua ko ‘enau ‘alofaki taula ke lī mei he taumu‘a. 31Kae lea ‘e Paula ki he senituliō mo e kau sōtia, Kapau ‘e ‘ikai nofo ‘i vaka ‘a e kau siana ni, ‘e ‘ikai lava hamou fakahaofi. 32Pea hanga leva ‘a e kau sōtia, ‘o tu‘usi ‘a e ngaahi maea ‘o e vaka fokotu‘u, ‘o tuku ia ke tō ‘o mole.
33Pea hanga ai ‘a Paula ‘o enginaki kinautolu kotoa pē, ‘o a‘u ki he‘ene meimei ‘aho hake, ke nau fai ha tokoni; ‘o ne pehē, Ko e ‘aho e ‘e hongofulu mā fa mo ho‘omou taukotofa ‘o nofo ta‘ekai, ‘o ‘ikai te mou ma‘u ha me‘a. 34Ko ia, ‘oku ou enginaki atu ke mou fai ha kai: pea ‘āsili, he ko e me‘a ia ‘e tokoni ki homou fakahaofi. Tala atu, ‘e ‘ikai mole hamou tu‘oni lou‘ulu ‘e taha. 35Pea ‘i he‘ene lea pehē, na‘a ne ala ki ha mā, ‘o ne fai ha fakafeta‘i ki he ‘Otua ‘i honau ‘ao; pea ne pakipaki ia ‘o kamata kai. 36Pea nau loto lahi ai kotoa, ‘o nau hanga ai ‘e kinautolu ‘o tokoni. 37Pea ko homau lau kātokatoa ‘o e kakai ‘i he vaka, ko e toko uangeau mo e toko fitungofulu mo e toko ono.#27.37 276: ‘Oku pehē ‘i hono ngaahi hiki fuoloa ‘e ni‘ihi: 275; pe 76 nai. 38Pea kuo nau mākona, na‘a nau fakama‘ama‘a ‘a e vaka, ‘o tolo ‘a e uite ki tahi.
Ko e Fakahake ‘o e Vaká
39Pea ‘i he‘ene ‘aho hake, na‘e ‘ikai te nau ‘ilo pe ko e fonua fē: ka na‘a nau vakai ha kōmaki na‘e ‘one‘one hono pā‘angangalu, pea na‘a nau loto ke fakahake ‘a e vaka ‘i he potu ko ia, ‘o kapau ‘e lava. 40Pea nau motuhi ‘a e ngaahi taula ‘o tuku pē ‘i tahi, pea vete fakataha mo ia ‘a e ha‘i ‘o e ongo fohe‘uli, ‘o nau fai lā ‘i he taumu‘a, ‘o nau faka‘uli ki he ‘one‘one. 41Kae ‘iloange, na‘a nau toloto ‘i ha potu na‘e fetaulaki ai ‘a e tahi ‘e ua, pea nau faka‘oho ai ‘a e vaka; pea pikisia ‘a e taumu‘a ‘o toka ma‘u, ka ka vāea ‘a e taumuli ‘i he mālohi ‘o e peau.
42Pea loto leva ‘a e kau sōtia ke tāmate‘i ‘a e kau pōpula, na‘a kakau ha taha ki ‘uta ‘o hola. 43Ka ko e senituliō, ko e me‘a ‘i he‘ene fie fakahaofi ‘a Paula, na‘a ne ta‘ofi ‘enau fakakaukau ko ia; ‘o ne fekau, ke ‘ilonga ‘a kinautolu ‘oku fa‘a kakau ke nau hopo ki tahi ‘o mu‘omu‘a ki ‘uta: 44pea ko e me‘a ki hono toe, ke kakau ha ni‘ihi ‘i he ngaahi fono, pea ko e ni‘ihi ‘i ha me‘a pē mei he vaka. Pea ‘i he fai pehē, na‘a mau hao kotoa pē ki ‘uta.
Obecnie wybrane:
‘Apositoló 27: TMB
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tongan Moulton Bible © Bible Society of the South Pacific, 2011.
