Popularne wersety biblijne z Sɛ́nflínmɛ 8

Udostępnij

Mi ná flín Mawu Mavɔmavɔ, Mawu mitɔn; ɖó é wɛ nɔ́ ná hlɔ̌nhlɔ́n mi, bɔ nǔ nyɔ́ nú mi mɔ̌. É bló mɔ̌, bó dó ɖe xlɛ́ ɖɔ émí ɖo gbejí nú akɔ e émí zin alɔ dó akɔ́n bó jɛ xá tɔ́gbó mitɔn lɛ́ɛ, lě e é ɖ'é wú gbɔn din é.

Ée mi mɔ wǔvɛ́ énɛ́ lɛ́ɛ, bɔ adɔ dó ya nú mi fó ɔ́, é ná mǎna mi bɔ mi ɖu; nǔɖuɖu e tɔ́gbó mitɔn kpó mi kpó má mɔ kpɔ́n ǎ é wɛ é ná mi. É bló mɔ̌, bó dó ɖe xlɛ́ ɖɔ é kún nyí nǔɖuɖu kɛ́ɖɛ́ wɛ gbɛtɔ́ nɔ́ ɖu bó nɔ́ nɔ gbɛ ó, lo ɔ́, xó e tɔ́n sín Mawu Mavɔmavɔ nu mɛ ɔ́ bǐ wɛ nɔ́ hɛn mɛ ɖó gbɛ.

Mi flín zɔnlin tobutóbú e Mawu Mavɔmavɔ kplá mi bɔ mi zun ɖo gbětótló mɛ xɔ xwe kanɖé (40) é. Mawu Mavɔmavɔ tɛ́n mi kpɔ́n gbɔn wǔvɛ́ tɛnmɛ tɛnmɛ lɛ́ɛ mɛ, bó ná dó mɔ nǔ jɛ nǔ e ɖo ayi mitɔn mɛ é wú; énɛ́ ɔ́, mi ná sixú nyi sɛ́n tɔn lɛ́ɛ kpó mi ná gbɔ kpó ɔ́, é ná tunwun.

Hwenu e nǔ ná nyɔ́ nú mi ɖo to ɔ́ mɛ ɔ́, mi ma lin gbeɖé ɖɔ émí ɖésú wɛ dó gǎn, bó wa nǔ bɔ nǔ nyɔ́ nú émí ó.

“Mi ka ɖó ayi te, bó má dó vɛ̌ nú gbetakɛ́n Mawu Mavɔmavɔ, Mawu mitɔn tɔn lɛ́ɛ, sɛ́n tɔn lɛ́ɛ, kpó nǔ e é zɔ́n, bɔ un ɖɔ nú mi égbé din lɛ́ɛ kpó ó. É má nyí mɔ̌ ǎ ɔ́, mi táá wɔn ɛ.

Mi bo tunwun dó ayi mitɔn mɛ ɖɔ Mawu Mavɔmavɔ, Mawu mitɔn jló ná kplɔ́n mi lě e tɔ́ nɔ́ kplɔ́n vǐ é ɖɔhun.

Mi ná mɔ nǔ e mi ná ɖu bó gɔ́ xo ganjí ɔ́ ɖo to ɔ́ mɛ, lobo ná dó kú nú Mawu Mavɔmavɔ, Mawu mitɔn ɖó to ɖagbe e é ná mi é wútu.

Mi bló nǔ e Mawu Mavɔmavɔ, Mawu mitɔn zɔ́n mi lɛ́ɛ; mi zán gbɛ lě e é jló gbɔn é, bó ɖó sísí n'i.”

Gbětótló ɖokpó énɛ́ ɔ́ mɛ wɛ Mawu Mavɔmavɔ ná mǎna e tɔ́gbó mitɔn lɛ́ɛ má mɔ kpɔ́n ǎ é mi, bó ná dó dó winnyá mi, bó ná dó tɛ́n mi kpɔ́n bɔ sɔ gúdo ná nyɔ́ nú mi.

Mi ná mɔ nǔɖuɖu bó ɖu gɔ́ xo; mi ná gbá xɔ ɖagbe ɖagbe lɛ́ɛ bó nɔ mɛ; nyibú mitɔn lɛ́ɛ kpó gbɔ̌ mitɔn lɛ́ɛ kpó ná gba kún; kpatágan kpó siká kpó dɔkun tɛnmɛ tɛnmɛ kpó ná ɖo kpɔ́ ɖo mi sí. Ée nǔ ná cí mɔ̌ é ɔ́, mi ma ɖo afɔ tɛ ayǐ wɛ káká bó wɔn Mawu Mavɔmavɔ, Mawu mitɔn e ɖe mi tɔ́n sín kannumɔgbénu ɖo Ejípu é ó.

Mɔyízi ɖɔ: “Mawu Mavɔmavɔ, Mawu mitɔn ná kplá mi byɔ́ to ɖagbe ɖé mɛ. Tɔsisa ɖo to ɔ́ mɛ, tɔjɔtɛn ɖo to ɔ́ mɛ, sin nɔ tɔ́n sín ayǐkúngban lanmɛ, bó nɔ́ sa gbɔn tɔdo lɛ́ɛ mɛ, bó nɔ́ sa gbɔn sókan lɛ́ɛ mɛ. Blěe to wɛ; ɔ́ji to wɛ. Vǐwuntín, fígi, glenáditín, olívu kpó wǐin kpó sín to wɛ. Mi ná mɔ nǔɖuɖu bó ɖu lě e é jló mi gbɔn é; nǔ ɖěbǔ ná hwedó mi ǎ. È nɔ mɔ gan ɖo só e ɖo to ɔ́ mɛ lɛ́ɛ mɛ, bó nɔ́ mɔ ganvɔ ɖo só e ɖo to ɔ́ mɛ lɛ́ɛ mɛ.

Mɔyízi ɖɔ: “Mi wlíbo nú sɛ́n e un ná mi égbé din lɛ́ɛ, bó nyi; énɛ́ ɔ́, mi ná nɔ gbɛ, bó ná gba kún; mi ná yí to e Mawu Mavɔmavɔ zin alɔ dó akɔ́n ɖɔ émí ná ná tɔ́gbó mitɔn lɛ́ɛ é.

Xwe kanɖé énɛ́ lɛ́ɛ mɛ ɔ́, awu mitɔn lɛ́ɛ gbi ǎ, afɔ mitɔn lɛ́ɛ ka tɛ ǎ.

É wɛ kplá mi gbɔn gbětótló ɖaxó e dó xɛsi bɔ dan aɖǐnɔ lɛ́ɛ kpó hɔnkéklě lɛ́ɛ kpó gɔ́ é mɛ. Ayǐkúngban énɛ́ e jí jǐ má nɔ́ ja dó ǎ é ɔ́, Mawu Mavɔmavɔ bló bɔ sin tɔ́n sín só syɛ́nsyɛ́n mɛ nú mi.