انجیل مرقس 5
5
عیسی دیو زده مردکه شفا دییه
1اَوه بشنده دریاچه اَ طرف را، جِراسیان منطقه را. 2ایزه که عیسی قایقک جیراُومه، ایگله مردکی که پلیده روحه گرفتار به، قبرستاننه برامه و عیسی نه دیمادیم ببه. 3اَ مردک قبرستانکش زندگی کردرده، و د کسی نتانسردشه که حتی زنجیرنه اَوه دِوَنده. 4چون چند را اَوشان قول و زنجیرنه دِوَسه به، امّا اَ زنجیرش پاره کرده بنده و اَ قولانی که چوه پاکشان دوسه به، اِشکسش به. هیچکسه زور آنِرَسرده که اَوه رام بکره. 5شَو و روج قبران و کوه هان سرک جِرَش کرده و سِگِنَه اِشتنش زخمی کرده. 6وختی دورنه عیسیش بینده، ویرتن ویرتن بامه و عیسی پا دگس، 7و بلنده صَصنه جِرش بکه: «ای عیسی، خدای متعاله زا، ته منه چِکار داری؟ ته خدا قسم دَییم من عذاب مده!» 8چون عیسی اَونه واتش به: «ای پلید روح، اِم مردکک بَرا!» 9عیسی اَوک آپرسسه: «اِشته نام چیه؟» جوابش بدا: «چِمن نام قوشون اِسه؛ چون آما پِرِمان.» 10و پر عیسیش مندت کردرده که اَوان اَ منطقک بَمَرکره. 11اَ دور و اطراف تپه هانک، پیله خویی یه سوری ای غذاشان خردرده. 12پلیده ارواح عیسی شان مندت بکرده، باتشانه: «آما بخرسان اَ خویی یان دله؛ بدا بِشام چَوان دله.» 13عیسی نی اَوان اجازش بدا. پلیده ارواح اَ مردکک بَرشنده و دشنده اَ خوییان دله. سوری ای که چَه تعداد تقریبا دو هزار گله خویی به، تپه اَشنواینه بیرویتنده دریاچه طرفه را و اُوک غرق آبنده.
14خوعه شوآنه دِوَشتنده و اِم اتفاقه شهرک و دِهک باتشانه، مردم نی بامنده تا بیننده چه اتفاقی دِگِسَه. 15اَوه بامنده عیسی وَر و وقتی بیندشانه اَ دیوزده مردک، اَوی که پرانتر قوشون گرفتار به، اِسا خلوش دکرده و عقلمند اَگا نشته، بترسسنده. 16اَوه ای که اِم ماجراشان اِشتن چشماننه وینده به، اَ چی ای که اَ دیوزده مردکه و اَ خوان سر آمییه به، مردمه را باتشانه. 17اَدمی مردم عیسی شان مندت بکه که چَوان منطقه نه بیشی.
18وختی عیسی قایقک دِنِشته، اَ مردکی که پرانتر دیوزده به، عیسیش مندت بکه که چَوه همراه بیشی. 19امّا عیسی اجازه نداشه بلکم اَونه باتشه: «بِش کییه، اِشته دوست و اشنایان وَر و اَوان نه باجه که خداونده اِشته راش چه کرده و چنجوره تِش رحم کردش.» 20پس اَ مردک بشه و دِکاپولیس منطقک، اَ چی ای که عیسی چَراش کرده به، اعلامش بکه، همه حیران بیه بنده.
عیسی، ایگله زلی و یایروسه دتر شفا دییه
21عیسی هنی قایق نه بشه اُعه اَ طرفه را. دریاچه کنارک، پرَه جماعتی چوه دویرنه بیدا آبنده. 22چاوش عبادتگاه ایگله رئیسانک نی که چَوه نام یایروس به بامه اَگا. اَ عیسی ویندننه چَوه دس و پا دگس 23و پر مندتش بکرده باتشه: «ویلیه دتمه مَردریه. بوره، اِشته دسه چه سر اَنه تا رچ آبیه و زنده بمانیه.» 24پس عیسی اَونه بِشه.
پِرَه جماعتی نی عیسی پشدنه راه دگسنده. اَوه هر طرفنه عیسی شان سِخ دیرده. 25اَگارک، ایگله زلی ای بیا که دونزده سال به خونریزیش داشته. 26اَ زلی ایزه که پر دکتره رایشان به اَوه درمان بکرنده، پِر درد و رنجش کَشسَه به و اِشتن تمام داراییش خرج کرده به؛ امّا رچ آبیینه عوض، بدتر آبییه بیا. 27اَ زلی، عیسی درباره چییانی اَشنوسش به، پس جماعته دلنه عیسی پشتِنه بامیا و چوه اَباش دس آسو. 28چون اَ زلی اِشتن نه واتش بِه: «اگم حتی چَوه اَبا دس آسونم، شفا گیرم.» 29هَه لحظه چَه خونریزی بند بامه و اِشتن جانکش احساس بکه که اِشتن مریضیکش شفا کته. 30عیسی هه لحظه بزانسشه که قُوتی اَوک برشیه. پس جماعته دلک اِشتن دویرو بره دییَشته و آپرسسشه: «کی چِمن اَباش دَس آسو؟» 31چَوه شاگرده جواوشان آدا: «ویندری که جماعت هر طرفینه ته سخ دیرنده؛ هنی آپرسری، ”کی منش دَس آسو؟“» 32عیسی اِشتن دویر و بره دیشترده تا بینه کی اِم کارش کرده. 33پس اَ زلی که زانسرده چِه اتفاقی چوه را دگسه، ترس و لرزنه بامیا، عیسی پا دگسا و تمان حقیقتش چوه را باته. 34عیسی اَونه باتشه: «کیلی، اِشته ایمانه ته شفاش دیش. ساقینه بِشه و اِم مریضیک آزاد بِبش!»
35عیسی هَلا لاوش کردرده که عده ای عبادگاه رئیس کییه نه بامنده و باتشانه: «اِشته دِته بمردا! دَ چیه را استاده زحمت دییری؟» 36امّا وقتی عیسی چَوان لاوش بشنَوِسنده، عبادتگاه رئیسنه باتشه: «مترس! فقط ایمان بدار.» 37و اجازه آنداشه پِطرُس و یعقوب و یعقوبه برا یوحنا غیراض د کسی چَه پشدنه بیشی. 38وختی اَوه آرسسنده عبادتگاه رییسه کییه، عیسی بیندشه قیامتی یه. مردم بلنده صَصنه بِرَمسردنده و شیون شان کردرده. 39پس بشه دله و اَوانش باته: «چیه را شیون و زاری کردرا؟ خُردنَه مرده نیا، بلکم خُتا.» 40اَوه عیسی را بوخورسِنده. ولی عیسی اَوان همبلنش اَگارنه برکردنده، خُردنه په و ما و شاگردانی که چَوه همراه بنده اَکتشنده و بشه یاگایی که خُردنه وا بیا. 41اَدمی عیسی اَ کیلی دسشه بکتا و اَونه باتشه: «تالیتا کوم» یانی: «ای ویلیه کیلی، ته نه واجم بِیض!» 42اَ کیلیه البحل بهشتا و شروعش بکه مِتَن. اَ کیلیه دونزده ساله بیا. اَوان اِم اتفاقک پر تعجبشان بکه 43عیسی اَوانش پِر سفارش بکه که مَرزا کسی اِم اتفاقک خبر دار بیبی، و باتشه چی آدیا اَ کیلیه تا بِخَریه.
Currently Selected:
انجیل مرقس 5: TIT
Highlight
Share
ਕਾਪੀ।
Want to have your highlights saved across all your devices? Sign up or sign in
@ 2024 Korpu Company