انجیل مرقس 4
4
کشاوزه مَثال
1هنی عیسی دریاچه وَرک، تعلیم آدیینش شروع بکه. پره جماعتی عیسی دویر و وَرک بیدا آبنده ایزه که عیسی قایقی کی دِنِشته که دریاچک به، و اَگارک بنشت، و همه‌ی جماعت دریاچه ورک، خشکیک بنده. 2عیسی مثالان نه، پره چیش اَوان آموته. اَ اِشتن تعلیمک اَواننه باتشه: 3«گوش آکرا! ایگله کَشاورزی دانه آشاندنه را بَر برشه. 4وختی دانَش آشاندرده، بعضی دانه ان راه دِله اَربنده و پرنده نی بامنده و اَوشان بِخَرده. 5بعضی دانه ان نی سِگینه زمینان دلک اَربنده که پِرش خاک نداشته؛ پس البحل اَرامنده، چون که خاک درین نبه. 6امّا وقتی اُفتوعه برامیا، همه بوسوتنده و خشک آبنده، چون بنه شان نداشته. 7بعضی دانه ان نی بِران دله اَربندِه. بِره نی اَوانه اَرامنده، و خفه شان بِکَردنده و ثمرشان ناورده. 8امّا اَدرین دانه ان چاکه خاکه دلک اَربنده و جوکه شان بیزی، اَرامنده، و بارشان بوعرده، پر آبنده، بعضی سی، بعضی شصت و بعضی صد برابر.» 9و عیسی باتشه: «هر کسی گوش اَشنوسَنه را داره، بشنوه.»
10اَدمی که عیسی تَینا به، اَ دونزده گله شاگرد و کسانی که چَوه دویر و وَرک بنده، مثلان دَرباره اَوِک آپرسسشانه. 11عیسی اَواننه باتشه: «خدا پادشاهی سِره درک کردن شاما آدییه بیه، امّا بره مردمِه را، همه چی مَثلاننه واته بی؛ 12تا:
«”حقیقتاً دیَسنده، امّا درک مکرنده،
حقیقتاً بشنَونده، امّا مفهمنده،
مبادا آگردنده و بَخشِسه بیبینده!“»
13چاوش عیسی اَواننه باتشه: «شاما اِم مَثاله درک نکرا؟ پس چُنجوره رایرانه اَدَرین مثالان درک بکرا؟ 14کَشاورز خدا کلامه کارِه. 15بعضی مردم، اَ دانه آنی آشینده که راک اَربینده، اَگارک که خدا کلام کاشته بی؛ وقتی که خدا کلامه اَشنونده، البحل شیطان آیِه و کلامی که اَوانک کاشته بییَه، دِزِه. 16بعضی مردم نی اَ دانه آنی آشینده که سِگیه زمینک اَربیینده؛ وقتی اَوه خدا کلامه اَشنونده اَلَبحل اَوه شادی نه قبول کرنده، 17امّا چون اِشتنک بنه ندارنده، ای کَملی توُع آوَرنده. چاوش وختی خدا کَلامه واسِنه، اذیت و آزاری اَوان آرسه، البحل اِشتن ایمانک آگردنده. 18اَدَرینه، اَ دانه آنی آشینده که بِران دلک اَربینده؛ اَوه خدا کلامه اَشنونده، 19امّا اِم دنیا نگرانیان و ثروته وَسوسَه و علوده چیان هوس، چوان دِلِه دِلَه دیشی و خدا کلامه خفه کره، و اَوه بی ثمر کره. 20بقیه، دانه آنی آشینده که چاکه خاکه دلک اَربینده؛ اَوه خدا کلامه اَشنونده، اَوه قبول کرنده و سی، شصت و صد برابر، بار آورنده.»
چیروعه مثال
21عیسی اَواننه باتشه: «مگم گردسوزه آورا تا اَوه سر پوش جیرک یا تخت جیرک بِنَییا؟ مگم اَوه چیروعدان سرک اَنِنَیا؟ 22چون هیچ نوینه کینه چی ای نی آشکار مَبی، و هیچ یاگا دیین چی ای نی دیار مبی. 23هر کسی گوش اَشنوسنه را داره، بَشنوه.» 24و اَواننه باتشه: «اَ چی ای که اَشنوسرا، دقت بِکَرا. هَه پیمانه اینَه که وزن کَرا، شاما را وَزن کرنده، و حتی چه پرتر شاما آدییه بی. 25چون به اَ کسی که داره، پرتر آدییه بی، و اَ کسی که نداره، حتی اَ چی ای که داره نی اَوک اَرکته بی.»
دانه ای مثال که براینده
26عیسی باتشه: «خدا پادشاهی ایگله مردکی شواره که زمینک دانه آشانه. 27شَو و روج، اَ مردک چِه خوته بیبی و چِه آگا بیبی، دانه جوکه زنه و اَرایه. چنجوره؟ اَ نِزانه. 28زمین اِشتن کینه ای بار آوره: اول ساقه اَرایه، چاوش خوشه سَوز آبی، چوه پَش خوشه، دانه نه فت آبی. 29امّا اَدمی که دانه بِرَسه، کشاورز البحل دازه اَگیره، چون دورنینه فصل آرَسَه.»
خردل دانۀ مثال
30و عیسی باتشه: «خدا پادشاهی چییه شوار اِسه، یا چه مثلی نه اَوه توضیح بدیام؟ 31خدا پادشاهی خردله دانه‌ای شوار اِسه. خردله دانه، ویلی ترین دانه ای اِسه که اَوه زمین دلک کارِنده، 32ولی وختی کاشته بیبی، اَراییه و همه‌ی باغه گیاهانک پیله تر بییه، یَکه لاخه آنی آورییه، ایزه که پرندهان تاننده چَه سادیمک خومه رَچ آکَرنده.»
33عیسی پِر، ایزنه مثلاننه تا اگا که تانسشانه بفهمنده، خدا کلامش چَوان را واتِشِه. 34عیسی مردمنه مثله غیراض لاوش نکرده؛ امّا وختی اِشتن شاگرداننه تینا به، همه چیش چَوان را توضیح دِسِه.
عیسی، طوفانه آرام کردن
35هَ روج وقتی نِمیسیره دم ببه، عیسی اِشتن شاگرداننه باتشه: «بشام اُوعه اَ دیم.» 36اَوه جماعت وَرنه بشنده و عیسی شان هَ قایقینه که چَه دلک به، اِشتن نه ببردشانه. چند گله علوده قایق نی اَونه شیردنده. 37ایرادَن شدید تنده باهادی بهشته و موجه ایزه گسردنده قایقک که نزدیک به قایقَه اُونه فت آبیه. 38امّا عیسی قایقه پشتک، اِشتن سرش سرینه سرک اَنیه به و خته به. شاگرده عیسیشان خونک بیضانس و باتشانه: «استاد، عین خیالر نییه که آما هلاک آبییرام؟» 39عیسی بِهِشته و باده را تشرش بیزی و دریاچه نه باتشه: «ساکت ببش! آرام ببش!» اَ دمی باهاد بِنِشت و همه یاگا کامل آرام بِبِه. 40چاوش عیسی اِشتن شاگردانه باتشه: «چیه را اِنجوره ترسرا؟ حلا ایمان ندارا؟» 41اَوه زَره تُلاک ببنده و هندیگرنه شان واترده: «اِم کیه که حتی باهاد و دریاچه نی اَوک فرمان بردرنده!»
Currently Selected:
انجیل مرقس 4: TIT
Highlight
Share
ਕਾਪੀ।
Want to have your highlights saved across all your devices? Sign up or sign in
@ 2024 Korpu Company