انجیل لوقا 12
12
فریسیان خمیر مایک دوری بکرا
1اَدمی، هزاره نفر وا بیدا آبنده، اَنده بِنده که هندیگره سَر اَشیردنده. عیسی اوّل اِشتن شاگرداننَه لاوَه بِکردشه و باتشه: «فریسیان خمیرمایک که دودیمیه دوری بِکَراه. 2هیچ نوینَه کینَه چی نی که آشکار آمَبی و هیچ پوشانسَه چی نی که معلوم مَبی. 3اَ چی ای که تاریکیک واترانه، روجه روشناییک اَشنوسه بی، و اَ چیانی که دِوَسَه بَران پِشتک واتَرانه، بانان بلندیک اِعلام بی.»
کیک گه بترسام
4«رَفقان، شامانه واتَرم اَوانی که تانِنده شاما جانه اَرکتن و چِمه غیراز چی ای نِتاننده کردن، مَترسا 5شامانه واجم کیک گه بترسا: اَ کسیک گه بترسا که شاما جانه اَرکتنه پَش، قدرت داره شاما جهندمک دِرَنه. ها، شامانه واترم، که اَوِک گه بِتَرسا. 6آیا پنجگله کیجه گِله دو قِران نوخروشنده؟ امّا، خدا اَوان هیچ کامینِه ویر بنرکره. 7حتی شاما سَره میشین همه اَشمارده. پس مَترسا، چون شاما ارزش هزاران کیجه گِلَکین پرتره.
8«شامانه واجِم، هر کی مَن مردمِه وَرک اِقرار بِکره، انسان زا، نی اَوه خدا فرشتان وَرک اِقرار کَره. 9امّا هر کی مردمه وَرک من هاشا بکره، خدا فرشتان وَرک هاشا بی. 10هر کی لاوَیی انسان زا ضِد باجه، بَخشِسه بی، امّا هر کی خدا مقدسه روحه کفر باجه، بَخشِسه نیبی. 11وقتی شاما عبادتگاهان و حاکمان و اَوانی که قدرت چَوان دَسکه وَر برنده، نگران مبا که چنجوره اِشتنک دفاع بِکَراه یا چِه باجا، 12چون هَ ساعتک خدا مقدسه روح شامانه واجه که چه باجا.»
نادانه ثروتمنده مَثل
13ایرادَن جماعته دلنَه اینفره اَوِنه باته: «استاد، چِمن برار نه باجه که چاما پییَر اِرثه مَنه آبَخشه.» 14عیسی جواو بدا: «ای مردک، کی من شاما میانک داور نییَشه که شاما را ارث آبخشم؟» 15پس مَردمِنش باته: «ویراجین ببا و هَر جوره حرص و طمعک دور ببا، چون انسانه زندگی چَه ثروت پِر بییَنه واسِنه نیه.» 16چاوَش اِم مثلشه چَوان را بوعردا: «ایگله ثروتمنده مَردکی اِشتن مزرعکش پِر محصولی بیدا آکَت. 17پس اِشتننَش فکر بکه، ”چِه بکرم، چون چِمن محصوله نیا داشتنه را یاگا ندارم؟“ 18چاوَش باتشه:
”بزانسمه چِه گَه بکرم! چِمن انباران خراب کَرم و پیله تَره انبارانی رَچ آکَرم، چِمن گندم و همه‌ی امواله وا ذخیره کَرم. 19اَدمی اِشتن نه واجم: ای چِمن جان، پر سالان رار اموال بیدا آکته. اِسا آسوده ببش و بخَه و آخَه و کیف بکه.“ 20امّا خدا اَوِنَه باته: ”ای نادان! هِم اَشان اِشته جانه اَرَگیریم. پس هر چیر که بیدا آکَته، چیکی کین گَه بیبی؟“ 21اِمه کسی آخر و عاقبت که اِشتن را ثروت بیدا آگیره، امّا خدا وَرِک تِیَه دس بی.»
22اَدَمی عیسی اِشتن شاگردانش باته: «پس شامانه واتَرم، شاما زندگی واسِنه نگران مَبا که چِه بخَرا، و نگران مبا چِه دِکَرا. 23چون زندگی غذاک مهمتره و بدن خَلوعک مهمتره. 24غَجَله‌ان دیَسا: نه کارِنده و نه دورنِنده، نه اَنبار دارنده نه یاگایی که اَوک ذخیره بکرنده؛ اِنجوره هنی خدا اَوان روزی دَیه. و شاما چَنده پرندهانک با ارزش تَرِران! 25کی اِسه شاما دلَک که تانه نگرانی نه، ای ساعت اِشتن عمره ایضافه آکَره؟ 26پس، اگم نتانا اِم ویلیه کاره بکرا، چیه را بقیه چیان را نگرانِران؟ 27صحرا گلان دیَسا چنجوره پیلَه آبیَرنده، نه زحمت کَشنده و نه وَجنده. بَس شامانه واجِم که حتی سلیمان پادشاه نی اِشتن اَ شکوه و جلالنه ایگله اِم وِلان شوآر بَزک نِبِه. 28پس اگم خدا عالَفان که اُوری بیابانک بَراینده و صبا تنیک سوجانسَه بینده، اُنجوره پوشانِه چنده پرتر، ای کم ایمانان شاما پوشانه! 29پس چِمه پَشه مَبا که چه بِخَرا یا چه آخرا؛ چِمان نگران مبا. 30چون اِم دنیا بی ایمانه مردم اِنجوره چیان پَشَدنه گَردنده، امّا شاما پِه ای دارا که زانه شاما همه‌ی اِم چیان احتیاج دارا. 31بَلکَم شاما، خدا پادشاهی پَشَه ببا، که اِمه همه شاما آدیه بینده.
32«ای ویلیَه رَمه، مترس چون شاما پِه خوشحالی اِمه که شاما پادشاهی آدَیه. 33اَ چِه که دارا بوخروشا و فقیران آدَیا؛ شاما را کیسه‌هانی تهیه بِکرا که نیپیسِنده، وَ گنجی که اُنُجَرِه آسمانک شاما را بیدا آگیرا، یاگایی که نه دزد آیه و نه پِت تانه اَوه بِزَنه. 34چون شاما گنج هر یاگا بیبی، شاما دله نی واریا.
حاضره خادمِه
35«شاما کَمره خدمته را دِوَندا و شاما چیروعان روشون نیا بدارا. 36اَوانی شوار ببا که منتظرنده چوان ارباب وِیوَه نه آگَرده، و حاضرنده هر وقت آرَسسه و برش بوکوس، اَلبَحلنه بَرِه چَه را آکَرِنده. 37خَسه اَ نوکرانی ببا که وختی چوان ارباب آگَرده، اَوان آگاه بینه. حقیقتن، شاما نه واجم که، اَ اِشتَن چَوان کمره خدمته را دِوَنده، اَوان بَره سِفرَه سَرک نشانه و آیه پَران و اَوانک پذیرایی کَره. 38خَسه اَ نوکرانی ببا که وختی چوان ارباب راه نه آرَسه، چِه نمسیر بیبی، چِه نصف شو بیبی، اَوان آگاه بینه.
39«بِزانا که اگم کییَه صاحابه زانسَه به دِزد چه ساعتی آیه، نَشتشه چَه کییه نه دزی بِکَره 40پس شاما نی آماده ببا، چون انسان زا، ساعتی را آیه که شاما چَه انتظاره ندارا.»
41پِطرُسه آپرسس: «ای آقا، اِم مثالِرَه چاما را بیزیرا یا همان را؟» 42عیسی خداونده چَه جوابک باته: «پس اَ مباشر اَمین و دانا کیه که، چَه ارباب اَوه اِشتن کییَه نوکران سرپرست کره تا چوان غذا سَهمه وقَتنه آدیه؟ 43خَسه اَ نوکری ببا که وقتی چَه ارباب آگرده، اَوه کاره سَر بینه. 44یقین بِزانا که چَه اَرباب اَوه اِشتن همه‌ی دارایی سرپرست کَره. 45امّا اَگم اَ نوکر اِشتن نه فکر بکره که ”چِمن ارباب اَره تر آیه“ و نوکران و کنیزان، آزار و اَذیت بکره و بِخَره و آخَره و سر خوشی بکره، 46اَ موقع که چَه ارباب اَ روج و ساعتی که اَوِک خبردار نی آیه اَوه وسطنه اَوزارنه، اَوه خیانت کاران یاگاک دِرَنه. 47نوکری که اِشتن اَربابه خواسته زانه اَمّا، اِشتن آماده نکره و یا چَوه لاوَان عمل نِکَره، پِر چو خره. 48امّا اَ کسی که اِشتن اربابه خواستَک بی خبره و کاری کره که تنبیه لایقه، کمتر چو خَره. هر کسی پِر تَر آدَیه بیبی، اَوِک پِر تَر انتظار شی؛ و هر کسی چَه مسولیت پِر تَر بیبی، چَه جواب دیَین نی پِر تَر بی.
49«اَز آمییِم تا زمینک داورییَه آتشی آگیرم، و کَشکی چِمه زوتر آکتم به! 50امّا چَوه پرانتر از گه برک عذاب بینم و چنده فشارکِم تا اَنجام بیبی. 51ایزه زانسرا آمییِم تا زمینک صلح بِکَرم؟ نه، بلکم آمییِم تا جِدایی دِرَنم. 52چِمِه پَش، ایگله کییک که پنج نفر اِسنده جِدایی دِگِنه؛ سُه نفر دو نفر مخالف و اَ دو نفر اَ سُه نَفره مخالف بینده. 53پِه اِشتن زا مخالف و زا اِشتن پییَر مخالف بی، ما اِشتن کیلی مخالف و کیلیه اِشتن ما مخالف بییه، خَسِرگه وِیوِه مخالف و وِیوَه اِشتن خَسِرگه مخالف بییه.»
54چاوَش عیسی اَ جماعتنش باته: «وختی شاما وینا مَغرِبِنَه ایگله مهی آمییَر، اَلبَحَل واجا: واران گَه بواره، و وارانین واره. 55و وختی جنوب نه گرمه باهاد دَمه واجا: ”هوا گَه پر گرم آبی“ و اِنجوره نی بی. 56ای دودیمان! شاما که تانا آسمان و زمینه دیشتنِنَه باجا هوا چنجورَیه، پَس چنجوریه که اِم زمانه تعبیر کردنک عاجزِران؟
57«چیه را شاما اِشتن را حکم نِکرا که چی چاکه؟ 58وقتی که اِشته شاکی نه مَحکَمه را شییری، تَقلا بکه تا اَوِنَه راه دِلَک آشتی بکری، اگم نه اِشته شاکی ته بره قاضی وَر و قاضی ته آدَیه نگهبانان دس و اَ نگهبانه ته زندانِک دِرَننده. 59بزان که تا قران آخِرِه آمَدَیی، زندانک بَنِرایی.»
Currently Selected:
انجیل لوقا 12: TIT
Highlight
Share
ਕਾਪੀ।
Want to have your highlights saved across all your devices? Sign up or sign in
@ 2024 Korpu Company
