انجیل لوقا 13
13
توبه بکرا
1اَدَمی، چند نفر بامِنده عیسی وَر و اَ جلیلیه اَهالی درباره عیسی نه باتشانه که چنجوره پیلاتُس قربانی کردنه وَقتک ایزش اَوه بوکوشتِنده که چوان خون قربانیان خونِنَه پَشی ببه. 2عیسی چوان جواوبک باتشه: «ایزه زانسرا اِم جلیلیانی که اِم اتفاق چوان را دِگس، بقیه‌ی جلیل اهالیک گناهکارتر بنده ایزه عذابشان بِکَشِس؟ 3شامانَه واترم که ایزه نی. بَلکَم اَگم توبه مَکرا، شاما نی همه هلاک با. 4ایزه زانسرا اَ هجده نفری که سیلوانه بُرجه جیگیسنه وقتک بِمَردنده، اورشلیم اَدَرینه اهالیک گناه کارتَر بِنده؟ 5شامانه واترم که ایزه نی. بلکم اَگم توبه مکرا، شاما نی همه هَلاک با.»
بی بَهره انجیله داره مَثل
6چاوَش عیسی ام مَثَلِشَه چوان را بیزییا: «ایگله مردکی اَنجیلَه داری شی اِشتن انگوره باغک بِکاشتا. اَ وقتی بامه میوه چییَنه را، هیچی دارِکش نیویند. 7پس اِشتن باغباننش باته: ”سه ساله که از آیِم میوه چیَنه را اَمّا چی ای نیوینم. اَ داره بِبِر، چیه را خاکه هدر آدَییَه؟ 8اَمّا اَ باغبانه جواو بدا: ”ای آقا، بِدا ای سال نی بمانییَه. از چَه دویرَه کَنِم اَوه کود آدَیم. 9اَگم ای ساله پَش میوش بوعَه که خاب؛ اگم نوَعردِشه اَدَمی اَ دارِه بِبِر.»
علیله زلی شفا
10ایگِلَه یهودیان مُقدسه شنبه روجک، عیسی یهودیان عبادتگاک تعلیمِش دیرده. 11اَگاره ایگله زلی بیا که ایگله روحی اَوِه هیجده سال علیل کرده بییا. کمرش دو قاط آبییه بِه و نِتانسشه دیک بِندَرییَه. 12وَختی عیسی اَ زلیشَه بیندا، اَوِشه اِشتن وَر داد بِکردا و باتِشه: «ای زلی، ته اِشته علیلیک خلاص آبَش!» 13چاوَش اِشتن دَسِشه اَ زَلی سَرِک بنایا و اَ زلیه اَلبَحَل دیک بندرسا، خداش شکر بکه. 14اَمّا یهودیان عبادتگاه رئیس چِمه واسنَه که عیسی مقدسه شنبه روجک شفا دَیه، پِر عصبانی آبه و مردمنَش باته: «شیش روج کار کردنه را اِسه. اَ روجانک بایا و شفا بیگیرا، نه شَنبه روجک.» 15عیسی خداوند چَه جواوک باتشه: «ای دودیمان! آیا شاما دِلَک کسی اِسه که شنبه روجک اِشتن گوی یا خر پاگا بَر آمکَره تا اَوه اُو دییَنه را ببره بر؟ 16پَس چِه عیبی داره که اگم اِم زلیه که چاما شوار ابراهیم پیغَمبره نَسلِه کا و هیجده ساله شیطان دَسک اسیر بیا، شنبه روجک اِم بندانک آزاد آبییَه؟» 17وَختی عیسی اِمش باتِه، چه مخالفه همه تور اَگِسِنده، امّا مردم همَه چَه عجیب کاران واسِنَه شاد بِنده.
خردله دانَه مثل و خمیرمایه مثل
18عیسی هنی باته: «خدا پادشاهی چه آشی؟ اَوه چیه شوار تشبیه بکرم؟ 19ایگله خَردله دانه‌ای شواره که مَردکی اَوِشه اِشتن باغک کاشتا. اَ دانَه اَرامیا و داری آبییا و پرنده بامنده و چه لاخه انکشان خومه رچ آکه.
20عیسی هنی باتشه: «خدا پادشاهی چیه شوار تشبیه بکرم؟ 21خمیرمایه‌ای شوار که ایگله زلی اَوش سُه کیسه آردَنه پشیش بیزی وخمیر هِشتَه.»
تنگه بَر
22عیسی اورشلیم راهِک، شهران و دِهان را شِسه و تعلیمش دِسه. 23را دِلَک، اینفری اَوِک آپرسس: «ای آقا، آیا فقط کَملی مردمک نجات پیدا کرنده؟» عیسی اَونه باته: 24«بَرک تَقَلا بِکَرا تا تنگه بَرنه دِله دِشا، چون شامانه واترم، پِر آدَمه تقلا کَرنده تا دِله دیشینده، اَمّا نتاننده. 25وختی کییه صاحاب بِیزه و بَره دِوَنده، بَرِک وِندَرا، بَره کوا و واجا: ”ای آقا، بَره چاما را آکه!“ اَمّا اَ جواب دَیه: ”از شاما آنزانم؛ نِزانسرم کاردِنَه آمییران.“ 26چاوَش شاما واجا: ”آما تِنه ایگله سِفره سَرک خَرده و آخَردمانه، ته چاما کوچه هانک تعلیم دِسه.“ 27اَمّا اَ جواب دَیه: ”شاما نه واترم که شاما آنزانم و نِزانسَرم کاردِنه آمییران. ای بدکاران چِمَن چشمه پرانک ایزال آگنا.“ 28اَگاره که بِرَما و تَرسِک شاما دندانان دندانان سَرِک سِخ دَیا، چون ابراهیم و اسحاق و یعقوب و همه‌ی پیغبِمَره نی خدا پادشاهی دِله وینا، ولی اِشتن وینا که شاماشان بر کردَنده بَر. 29مردم شرق و غرب و شمال و جنوبِنَه آینده و خدا پادشاهی سفره سَرِک نِشِنده. 30دیَسا، بعضی که اِسا آخرینِنِده اوّلین بینده، و بعضی که اِسا اوّلیننده آخرین بینده.»
ماتم اورشلیم را
31اَ موقع، چَند گِله فَریسیان فِرقه علمانک بامِنده عیسی وَر و باتشانه: «اِنگاره نه دِوَز، چون هیرودیس پادشاه رایشه ته بوکوشه.» 32عیسی چَوان جوابک باته: «بِشا و اَ تولکی نه باجا: ”اُوری و صَبا از دیوان بَرکَرم و مردمه شفا آدَیم، و سُومینه روجک چِمَن هدفه آرَسم. 33امّا اُوری و صَبا و پَشَرا چِمَن راه ادامه آدیم، چون اِمکان نِداره که نبی اورشَلیمه غیراض یاگاییکی کوشته بیبی.“ 34ای اورشلیم، ای اورشلیم، ای شهری که پیامبران کوشی و اَ کسه ای که اِشته وَر خرسانسه بیینده سِگ ددار کری! چند رام آخاشته که ایگله کرگی شوار که اِشتن کیجه‌ان اِشتن پر و بال جیرک بیدا آگیرییَه اِشته خُردیان چِمن دویرک بیدا آگیرِم امّا تِه آنِخاشته! 35اِسا شاما کییه بَر تاسیان آبی. و شامانه واجم دَ هرگز من نیوینا تا اَ روجی که باجا: ”مبارک اِسه اَ کسی که خداونده نامه نه آیه.“»
Currently Selected:
انجیل لوقا 13: TIT
Highlight
Share
ਕਾਪੀ।
Want to have your highlights saved across all your devices? Sign up or sign in
@ 2024 Korpu Company
