انجیل لوقا 11
11
دوعا آموتن
1ای روج عیسی یاگایی کی دعا کَردرده. وختی چَه دعا اُجَرس، ایگِلَه چه شاگردانک بامه اَوِنه باتشه: «ای آقا، دُعا کَردنه آما باموج، اَجوره که یحیی اِشتن شاگردان باموت.» 2عیسی اَواننه باتشه: «وختی دعا کَرا باجا:
”ای چاما په که آسمانکِش،
اِشته نام مقدّس بیبی،
اِشته پادشاهی بایه،
3چاما روجانه غذا هَر روج آما آدَه.
4چاما گناهان بِبَخش،
چون آما نی هَمه‌ی اَوانی که آما دِینِ دارِنده بَخشام.
و آما آزمایشک دِمَرن.»
5چاوَش اَواننَه باتِشه: «ایزه بِزانا که ای نَفر شاماک رَفِقی بِداره، و شَو نصفه را چَه وَر بایه و باجه: ”ای رَفِق، سُه گِله نان من قَرض آدَه، 6چون ایگِله چِمَن رَفِقانک سَفَرِه نه آمیه، و چی نِدارم تا چَوه پرانک بِنَیِم، “ 7و اَ رَفِق کییه دِلَنه جواب دَیه: ”مَن زَحمت مدَه. بَر قفلِه، و چِمن خوردخالنه یاگا دیشیِم. نِتانم چِمن یاگاک بیزِم و چی تِه آدَیم.“ 8شامانه واجم، بِزانا که حتی اَگم رفِاقت واسِنه مِیزِه و اَوه نان آمَدَییَه، امّا چَه سماجت واسِنه هیزه و هر چِه که اَوه گیه اَوه آدَییَه.
9«پس شامانه واجم، آخازا که شاما آدییه بی؛ بِگردا که وینا، بره بُکوعا که بر شاما دیمک آبی. 10چون هر کی آخازه، بِدست آوَره؛ و هر کی بگَرده؛ وینه؛ و هر کی بره بوکوعه، بر چَه دیمک آبی. 11شاما میانَک کامین په ای اِسه، که وقتی چَه زا اَوک مایی آخازه مایی عوض، اَوه ماری آدَیه؟ 12یا وقتی اَوک کَرخا آخازه، اَوه دُمبَچَچو آدَیه؟ 13پس اگَم شاما که بَد آدمانی اِسِران، زانا که چنجورَه چاکَه چیان شاما خوردَنان آدَیا، چَندَه چاک تَر شاما آسمانیه پِه، خدا مقدس روحه هر کی که اَوک آخازه اَوه آدَیِه.»
عیسی و بَعَلزِبول
14عیسی ایگِله دیوی که لال بیا ای نَفَرکش بَرکَردرده. وختی اَ دیوه برشیا، لالَه مَردَکه لاوَه بکه و مردمه تعجب بکَه. 15امّا بَعضیان باته: «عیسی دیوان بَعَلزبوله کمک نه، که دیوان رَییسه، بَر کَره.» 16بعضی اِمه واسِنه که عیسی آزمایش بکَرنده، اَوکشان آسمانییَه نشانه ایی آخاشته. 17اَمّا عیسی چوان فِکرش بزانسه و اَوانَش باته: «هر حکومتی که اَوِک دو دسته ای دِگنه، نابود بی، و هر خانوادَه ای که اَوک دو دسته ای دِگنه، اَوین نابود بینده. 18شاما واترا اَز بَعَلزبوله کمک نَه دیوان بَر کَرِم ولی اَگم شیطانه اِشتن ضد دو دسته ای درنیه، چَوه حکومت چُنجوره پا بر جا مانه؟ 19اَگم از بَعَلزِبوله کمک نَه دیوان بَر کَرم، شاما شاگرده، چیکی کمک نَه اَوان بَر کَرنده؟ اگَم اِمه شاما شاگردانک آپرسا اَوه شاما محکوم کَرنده. 20و اَگم از خدا قدرت نَه دیوان بَر کَرم، یقین بِزانا که خدا پادشاهی شاما آرَسه. 21وقتی قُدرتمَند مَردکی اِشتن تمان سلاح هان نه اِشتن کییَه ویراجین بیبی، چوه اَموال در اَمان مانه. 22امّا وختی کسی چوه قویتر اَوه حمله بکَره، اَوه شکست دَیه و سلاح هانی که اَوش توکل کرده به اَوِک اَرَگیره و چه دارایی تاراج کَره. 23هر کی منه نی، چِمن ضِده، و هر کی مَنَه بیدا آمَگیره، لاشت آکَره.
24«وختی که پلید روح ای نَفَرک بَر برشی. خشکُه بی اُوه و عالف یاگایی شی تا استراحت بکره. امّا چون یاگایی پیدا نِکَره اِشتن نه واجه: اَ کیه ای که اَگارنه آمییِم، آگردم.“ 25امّا وختی اَ کییَه آرَسه و اَ کییَه گَزی زییَه و تَر و تمیز وینه، 26شی و هفت گِله اِشتن نی بدتر روح اِشتن نَه آوَره، همه‌ی اَ روحه چوه دِلَه دیشینده و اَگاک ساکن بینده. اَ مردکه حال و روج اوّلکین بدتر بی.»
27ایزه که ز عیسی اِم لاوش واتَردنده، ایگله زلی جماعت دِلَک بلنده صَصِنَش باته: «خَسَه اَ زلیی ببا که تِش زَندش و تِش دیوانسِش.» 28اَما عیسی باته: «نه، خَسه اَوانی بِبا که خدا کلامه اَشنَونده و اَوه اَنجام دَیِنده.»
یونسه نشانه
29وَختی مردم عیسی دویرک بیدا آبنده، عیسی باتشه: «اِم نسله مردم چنده شریرنده، اَوان نشانه ای گَه، امّا نشانه ایی که اَوان آدییه بی یونس پیغمبره نشانیه. 30چون اَجوره که زَه یونس نینوا شهره مردم را نشانه ایی به، انسانه زا، نی اِم نسله را نشانه ایی بی. 31داوریه روجک، صَبا مملکته ملکه اِم نسل مَردُمِنه زنده آبییَه و اَوان محکوم کرییَه، چون اَوهَ دُنیا اَ سَرنَه بامییا تا سلیمان پادشاه حکمتِه بَشنَویه، و اِسا اَ کسی که انگاریه سلیمان پادشاک نی پیله تره. 32نینوا مردم داوَریه روجک اِم نسل مردمِنه زنده آبینده و چَوان ضد شهادَتی دَینده، چون نینوا مردم یونسه پیغامه واسِنه توبَشان بِکه، و اِسا اَ کسی که انگاریه یونس پیغمبرک نی پیله تره.»
جانه چیروع
33«هیچکس گِرد سوزه آنیگیره تا اَوه نوین آکَره یا قدره ای جیرک بِنَیه، بلکم گِردسوزه چیروعدانه سرَک اَنَییه تا هر کی دِله دیشی چَه نوره بینه. 34اِشته چشمه، اِشته بَدنه چیروعا. اَگم چشمرَه سالم بیبیه، اِشته تمان وجود روشُن بی. اَمّا اَگم اِشته چشمه سالم مَبیه، تمام اِشته وجود تاریک بی. 35پس ویراجین بِبا نوری که شاما که، تاریکی مَبی. 36پس اَگم اِشته تمان وجود روشون بیبی و هیچ یاگایی اَوک تاریک مبی، اِشته وجود ایزین روشُن آبی کِه چِشی چیروعی اِشتن نور نَه ته دِگسریه.»
وای بر مذهبیه رهبران
37وَختی عیسی اِشتن لاوَش اُوجَردِنده، ایگله فَریسیی فرقه علماک اَوش غذا خردنِه را دعوت بِکه. پس عیسی بِشه اَ فریسی کییه و سفره سَرِک بنشته. 38امّا اَ فَریسی وختی بیندِه که عیسی اِشتن دَسان غذا خَردنه پَران نوشوسنده، تعجبش بِکه. 39اَدَمی عیسی خداوندِ اَ فریسینه باتشه: «شاما فریسی فرقه علما قَدَره و دویری بَرِه تمیز آکرا، اَمّا شاما دِلِه دِلَه بدی و طمع نه فته! 40ای نادانان، مگم اَ کسی که بَرِش رچ آکرده، دِلَش رچ آکرده نی؟ 41پس اَ چیانی که دارا صدقه آدَیا اَدَمی شاما ظاهر و باتن پاک آبی.»
42«وای بر شاما ای فَریسیان! شاما حکم ده یک آدییَنه حتی نعنوع و خولیواشو و اَدویه ان را انجام دیا، اَمّا خدا محبته و عدالته اهمیت ندیا. اِمه چیانی اِسنده که شاما گه انجام بدیا بی اِم که اَدرینانک غِفلت بِکرا.» 43«وای بَر شاما ای فَریسیان! چون خَشِران یهودیان عبادتگاهان کفاینه سَرِک بِنِشا و خَشران بازارک مردم شاما را سلام بکرنده. 44وای بر شاما! چون بی نام و نشانه قبران شوار ران که مردم نزاننده و چوان سَرِ نَه مِجنِده.»
45ایگله شریعت قاضیان عیسی نش باته: «استاد، تِه اِشته اِم لاوَآن نه آما توهین کردری.» 46عیسی باته: «وای بر شاما نی، ای شریعته قاضیان، شاما پِر سنگینه باران مردم دوش سرانک اَنَییَرا، و اِشتن ایگله اَنگوشتَه اَ بارک نزنا. 47وای بر شاما! چون که شاما اَ پیامبرانی را مقبره رَچ آکرا که، شاما پییران اِوِشان کوشتنده، 48و ایزه شاما پییران کاره تایید کَرا. و چوان سَرِک سَر پوش اَنیا چون اَوان قتل کَرده و شاما چوان مقبران رَچ آکرا. 49چِمه واسنه که خدا حِکمت واجه: ”از چوان را پیامبر و رسولان خِرسانم. امّا بعضی کوشنده و بعضی اَوان اذیت آزار کرنده.“ 50پس، اَ پیامبران خونی که دنیا اَوّلنه تا اُوریجین روجه اَربیه اِم مردمه نسله گَردَنه، 51هابیله خونک کَته تا زکریا خون که قربانگاک و معبده محرابه میانک بوکوشتشانه. ها، شامانه واجم که اِم نسله مردم همه چمان را گه حساب پس آدَیه.» 52وای بر شاما ای شریعت قاضیان! چون معرفته بَره آچَره رانه اَکتا. اِشتن دله دینیشیرا و نَشترا هیچکی نی دِلَه دیشی.»
53وختی عیسی بَر برشه، تورات معلمین و فَریسی فرقه علما بَرک اَوِنه مخالفتشان بکه و اَوشان سوال پیچ بِکه تا اَوه تحریک بِکرنده، 54و فرصتی پَشه گرسردِنده تا عیسی اِشتن لاوان نه اَوه تَلَه دِله دِرننده.
Currently Selected:
انجیل لوقا 11: TIT
Highlight
Share
ਕਾਪੀ।
Want to have your highlights saved across all your devices? Sign up or sign in
@ 2024 Korpu Company
