Daniẹl 6
6
Daniẹl vwẹ Unu rẹ ikpohrokpo
1O de je Darios ọ da vwẹ isun ujosan vwo mu, rere e dia evun rẹ uvie na ejobi; 2ọ da vwẹ itidiaga erha vwọ mu phihọ enu rayen, Daniẹl kẹ ọvo vwẹ ohri rayen, kẹ ayen isun na nẹ iyẹnrẹn kẹ, rere emu ọvuọvo vwo jẹ ẹghwọrọ nẹ obọ rẹ ovie na. 3Etiyin Daniẹl nana da fẹnẹ vwẹ usun ri itidiaga na vẹ isun ri chekọ ejobi, fikiridie omamọ rẹ erhi rhere, ovie na da je iroro rọ vwọ vwi Daniẹl ka obenu vwẹ uvie na ejobi. 4Etiyin itidiaga na vẹ isun na da guọnọ idjerhe rẹ ayen vwọ gbeje Daniẹl vwẹ ẹkuoma rẹ uvie na; ẹkẹvuọvo ayen mrẹ idjerhe ọvuọvo rẹ ayen vwo gbeje-e, yẹrẹ emu re ekan ọvuọvo-o, fikiridie ohwo rẹ uyota o ruẹ, a mrẹ oruchọ yẹrẹ emu rẹ ekan ọvuọvo vwẹ oma rọye-e. 5Etiyin eshare nana da ta, Avwanre cha sa mrẹ idjerhe re vwo gbeje Daniẹl na-a, jokpa nẹ a guọnerọ vwẹ ẹkuoma rẹ urhi rẹ Ọghẹnẹ rọye.
6Etiyin itidiaga na vẹ isun na de rhi kuoma gbe bru ovie na ra, ayen da ta kẹ, E Ovie Dariọs, wọ re bẹdẹ. 7Itidiaga rẹ uvie na ejobi, inotu vẹ ehọnvwọre, ediaguare, kugbe isun ride na koko jẹ iroro nẹ ovie ji urhi rọ nabọ jẹ yọnrọn gan, tanẹ, kohwo kohwo rọ nẹ ẹrhovwo kẹ kọghẹnẹ kọghẹnẹ ejobi eyẹ ohwo, jokpa wẹ ọvo, E ovie, ke muo teye unu rẹ ikpohrokpo. 8Asakiephana, E ovie, gbe ji urhi na re wo rhe phi odẹ wẹn phihọ ẹbe na, rere e vwo jẹ ẹrhẹriẹ, kirobo rẹ urhi rẹ ihwo ri Mid vẹ Pẹsha re sa rhẹriẹ-ẹ epha. 9Fiki rẹ ọtiọye Ovie Dariọs de si odẹ rọye phihọ ọbe na vẹ urhi na.
10Ọke ri Daniẹl vwọ riẹn nẹ e si odẹ phihọ ọbe na nure, ọ da yanran kpo uwevwi rọye asan ro phi evakpo phihọ vwẹ uvun rẹ egedege rọye ro rhie phihọ rọ hirhe opharo ku Jerusalẹm, o de shiguẹ asierha ẹdọke, o da nẹ ẹrhovwo ọ da kpẹvwẹ Ọghẹnẹ rọye, kirobo rọ ruẹ jovwo. 11Etiyin eshare nana re ta phihọ jovwo na da rhe mrẹ Daniẹl rọ nẹ ẹrhovwo vwẹ obarọ rẹ Oghẹnẹ rọye. 12Etiyin ayen de bi kẹrẹ ayen da rhe ta kẹ ovie na, vwẹ oma rẹ urhi ro ji ri na, E Ovie! Wo phi odẹ wẹn phihọ urhi na, tanẹ, kohwo kohwo rọ nẹ ẹrhovwo kẹ ọghẹnẹ kọghẹnẹ vwẹ ẹdẹ ọgban jọkpa ne kẹ wẹ ọvo, E Ovie nẹ e mu ohwo yena teyọ unu rẹ ikpohrokpo? Ovie da kpahe, Urhi na mudia kokoroko, kirobo re urhi rẹ ihwo ri Mid vẹ Pẹsha, ra sa pha-a. 13Etiyln ayen da kpahẹ Vwẹ obaro rẹ ovie na, tanẹ, Daniẹl ohwo ọvo Vwọ usun rẹ ihwo re mu nẹ luda rhẹ na, ọ davwerhọn wẹ-en, E Ovie, eyẹ urhi ru wọ phi ode wẹn phihọ na-a, ẹkẹvuọvo ọ je nẹ ẹrhọvwo rọye asiarha ẹdọke.
14Etiyin ovie na, ọke ro vwo nyo eta nana, o de mu oma phiho ko roro obobo ro ru siobọ nẹ Daniẹl; ọ da wian rhirhi bẹsiẹ rẹ ọnre vwo she kpotọ ro vwo sivwo. 15Etiyin eshare na de bru ovie na rhe kirobo rayen ta phihọ jovwo, Wọ me riẹn, E Ovie, nẹw ọnana urhi rẹ ihwo rẹ Mid vẹ Pẹsha, urhi rẹ ovie phi obọ phihọ nu a sa rhẹriẹ-ẹ.
16Etiyin ovie na de ji urhi a da ghene reyọ Daniẹl rhe ayen de muo teye unu rẹ ikpohrokpo. Ovie na da ta kẹ Daniẹl, E jẹn Ọghẹnẹ wẹn ru wọ ga ọke ejobi sivwi uwe. 17E de mu oragha rhe e de muo nyẹ unu rẹ ikpohro-kpo na, etiyin ovie da reyọ oroka rọye vẹ ọ rẹ ehọnvwọre rọye vwo tamuo, rere e vwo jẹ emu ọvuọvo ẹrhẹriẹ vwẹ ẹkuoma ri Daniẹl. 18Etiyin Ovie na da yanran kpo ighẹn rọyẹ, ọ de chiri owẹvwe vwẹ ason yena ejobi, o vwo iroro ọfa ra ghwe bro ra-a, ọ vwerhẹre kakaka-a.
19Etiyin rẹ ọke vwo rhie re, ovie na de vrẹn okpokpakpa kpo asan emwa rẹ ikpohrokpo na. 20Ọke ro rhi vwo sikẹre ẹmwa na ri Daniẹl epha, ọ da vwẹ urhuru rẹ uvwerhe kperi se Daniẹl E Daniẹl, ọdibo rẹ Ọghẹnẹ ro je ghwo na, kẹ Ọghẹnẹ wẹn ru wọ ga kọke kọke na se sivwi uwe nẹ abo rẹ Ikpohrokpo na? 21Etiyin Daniẹl da ta kẹ ovie na, E ovie, wọ re bẹdẹ. 22Ọghẹnẹ mẹ ji amakashe rọye rhi rhurhu inu rẹ ikpohrokpọ na, ayen gbe sa wanvwoma-a, fikiridie me re abe vwẹ obaro rọye-e, ọtiọye rhe ji te obaro wẹ, E ovie, mi ru obo re chọre-e. 23Etiyin oma da vwerhe ovie na gangan, ọ da tanẹ a reyọ Daniẹl nẹ ẹmwa na rhe, Etiyin a da reyọ Daniẹl nẹ ẹmwa rhe, emu ọvuọvo ruro-o fikiridie ọ vwẹ ẹroso Ọghẹnẹ rọye. 24Etiyin ovie na de ji urhi nẹ, a reyọ esharẹ na ri gbeje Daniẹl na rhe e de mu ayen phihọ ẹmwa rẹ ikpohrokpo na–-te ayen te emọ rayen, te eya rayen; tavwe re ayen ki rhi she te otọ re ẹmwa na ikpokrokpọ na de fru ayen i de vwirhi ibeku rayen ibribro.
25Etiyin Ovie na, Dariọs de si ọbe rhe ihwo na ejobi, ẹgborho, vẹ ephẹrẹ re dia otọ rẹ akpọ na ejobi, E jẹn ufuoma bu phihọ kẹ ovwan. 26Mi ji urhi, nẹ asan rẹ uvie mẹ na teri ejobi, e jẹn ihwo phariẹ re ayen rha djẹ oshọ vwẹ obaro rẹ Ọghẹnẹ ri Daniẹl, kidie ọye Ọghẹnẹ ro jeghwo,
Ọ rọ herọ bẹdẹ;
uvie rọye a sa guọghọ-ọ,
isuesun rọye dia re te oba.
27Ọ sẹro o ji sivwẹ,
O ruẹ eka vẹ igbunu
vwẹ odjuvwu vẹ akpọ na,
Ohwo ro sivwi Daniẹl
nẹ ogangan rẹ ikpohrokpo na.
28Ọtiọye o de yovwi kẹ Daniẹl vwẹ ọke ri Dariọs vwọ suẹn kugbe ọke rẹ isuesun ri Sairọs ohwo ri Pẹsha.
Currently Selected:
Daniẹl 6: UBV77
Highlight
Share
ਕਾਪੀ।
Want to have your highlights saved across all your devices? Sign up or sign in
Bible in Urhobo © United Bible Societies, 1977.