Daniẹl 7
7
Daniẹl Vwerhẹ Evwerhẹ rẹ Eranvwe Ẹne
1Vwẹ ukpe rẹ ẹsosuo ri Bẹlshaza ovie rẹ Babilọn, Daniẹl da vwerhẹ evwerhẹ ọ da mrẹ emramrẹ ọke ro vwo shevwerhẹ enu rẹ ehwa rọye. Etiyin ọ de si evwerhẹ na phihọ otọ, ọ da rha ta obo re hẹ evun rọye. 2Daniẹl da ta, Me da mrẹ emramrẹ vwẹ evun rẹ ason na, nighe, odju ẹne rẹ odjuvwu na ki djuẹ abadi rode na. 3Eranvwe ride ẹne de nẹ evun rẹ abadi na rhe, dohwo doghẹre rọye. 4Ọ rẹsosuọ da họhọ okpohrokpo vẹ ibekpe rẹ ugo. Ọke mi vwo no re a da sanvwẹ ibekpe rọye nu, a da kparọ nẹ otọ e de vwo mudia vwẹ awọ rọye ivẹ kerẹ ohwo; iroro rẹ ohwo kọye a vwọ kẹ. 5Gbe nighe, eranvwe ọfa, ọrivẹ rọ pha kerẹ okorhi. A da kpare ẹbẹre ọvo kpenu; ọ vwẹ ibiedada erha vwọ hwa akọ; a da ta kẹ, Vrẹn, re wọ re uvwo buebu.
6Ọnana vwọ wan nu mi de ni, nighe, ọfa, rọ họhọ edjẹnẹkpo, vẹ ibekpe rẹ ọphran ẹne vwẹ obuko rọye; eranvwe na vẹ uyovwi ẹne, a da vwẹ ogangan rẹ isuesun vwọ kẹ. 7Ọnana vwọ wan nu me da mrẹ vwẹ evun rẹ emramrẹ vwẹ ason na, nighe, eranvwe rẹ ẹne, omuoshọ ọdjoma ọ jẹ vọn vẹ ogangan, o ji vwo ako rẹ utehru ride; ọ ria o vwirhẹ ibribro ọ da vwẹ awọ chivwi eravwe ri chekọ muotọ. Ọ da fẹnẹ eranvwe ejobi re ka obaro kẹ; ighoro ihwe yi rhere. 8Mi de roro kpahẹ ighoro na, nighe, ọvo vwẹ usun rayen da tan rhe, otutuno, tavwe a ke kparẹ ighoro erha rẹ esosuọ na nẹ otọ, nighere, ighoro nana vwẹ ibiẹro re họhọ ibiẹro rẹ ohwo, kugbe unu ro ta ikpita ride. 9Mi vwo no,
a da ghan ekete phihọ
etiyin ọvo rọ herọ nẹ awanre rhe de tidia;
ewun rọye kọ fuan popo kerẹ imicho,
ẹton rọ hẹ uyovwi rọye kọ epha kerẹ oruru,
ekete rọye, kerẹ erhanre rọ la gidigidi
idjugẹ rọye kerẹ erhanre rọ la.
10Ọkẹre rẹ erhanre da djẹ rhe
o de nẹ obaro rọye rhe;
uriori vwarẹ uriori re ga,
uriori ihwe kugbe uriori ihwe mudia vwẹ obaro rọye;
ẹguare da gba re vwọ guẹdjọ
e de rhie ẹbe na phihọ.
11Mi de ni ayen fiki rẹ edo rẹ eta ride re mra nẹ ighoro na cha. Ri mi vwo ni re, e de hwe eranvwe na, a da guọghọ oma rọye nu, e de muo phihọ erhanre nẹ ọ ton. 12Vwọ ke eranvwe ri chekọ na, e de mie ayen isuesun rayen, ẹkẹvuọvo a da yan jẹ arhọ rayen vwo hẹrhẹ ọke ọfa. 13Me da mrẹ vwẹ evun rẹ emramrẹ vwẹ ason na,
nighe vwẹ egho rẹ irharheghe na,
ọvo da rhe kerẹ ọmọ rẹ ohwo,
o de bru ohwo rọ herọ nẹ Awanre Rhe na
a da vwọ phia vwẹ obaro rọye.
14Kọye vwẹ isuesun kẹ,
kugbe urinrin vẹ uvie,
rere ihwo ejobi, vẹ ẹgborho ejobi vẹ ephẹrẹ ejobi vwọ sa ga;
isuesun rọye ọye isuesun ri bẹdẹ,
ro che jẹ ẹwanvrẹn, kẹ uvie re jẹ sa ghwọrọ.
15Vwọ kẹ vwẹ ri Daniẹl, erhi rọ hẹ evun mẹ kọ ro ẹnwan emramrẹ re me mrẹre na ọ da nẹrhẹ oshọ mu vwẹ. 16Mi de sikẹrẹ ohwo ọvo vwẹ usun rẹ ihwo ri mudia vwẹ etiyin na me da nọ kpahe uyota rẹ emu nana ejobi. Etiyin ọ da ta kẹ vwẹ, ọ da vwẹ otọ rẹ emu na ejobi vwọ nẹ vwẹ. 17Eranvwe ride ẹne na eyẹ ivie ẹne ri che muẹ vwẹ akpọ na. 18Ẹkẹvuọvo ihwo efuanfon rẹ ọ ro Me Kpenu ejobi keye cha reyọ uvie na, kẹ ayen yọnre uvie na rhiri bẹdẹ.
19Etiyin me da guọnọ uyota riẹn kpahe eranvwe rẹne na, rọ fẹnẹ iri chekọ na ejobi, omuoshọ gangan, ọ vẹ ako rẹ utehru vẹ ififabọ rẹ ẹrovwo, ọ ria nẹ ọ me rha guọghọ ibribro, o mi rhe chiyi i ri chekọ muotọ. 20Vwọ kpahe ighoro ihwe re hẹ uyovwi rọye, vẹ ighoro efa ri yoro phia, re sua eshe kẹ ighoro erha vwẹ obaro rọye, ighoro vwẹ ibiẹro kugbe unu rọ vwọ ta ikpeta ride, re je rho nọ otu rọye. 21Ri mi vwo no re, ighoro na vẹ ihwo efuanfon ki phiẹ ofovwi, ọ da gan nọ ayen, 22rhiri bẹsiẹ rẹ Ọ rọ herọ bẹdẹ bẹdẹ ke rhe, o de bru orhiẹn kẹ ihwo efuanfon rẹ Ọ ro Me Kpenu ejobi, ọke de rhi te rẹ ihwo efuanfon na rhe reyọ uvie na.
23Enẹ kọye ọ tare: Vwọ kẹ eranvwe rẹne,
uvie rẹne kọ cha dia akpọ na,
kọ fẹnẹ uvie ri chekọ ejobi,
ko che mu akpọ na ejobi rọ
o mi chiyo muotọ, o mi vwirho ibribro.
24Vwọ kẹ ighoro ihwe na,
vwẹ evun rẹ uvie nana
ivie ihwe efa ji che no cha, ọ da wan ayen nu ọfa je cha phia;
ọ cha fẹnẹ e rẹsosuọ na,
kọ cha guọghọ ivie erha te otọ.
25Ọ cha ta ota rẹ ẹgua kpahe Ọ ro Me Kpenu na,
ko che shenyẹ ihwo efuanfon rẹ Ọ ro Me Kpenu na,
kọ cha jẹ iroro kpahẹ ewene rẹ ọke orẹ vẹ irhi na;
ke che siobọ nẹ ayen vwọ kẹ usuo rọye vwẹ ẹgbukpe erha gbẹ ubro.
26Ẹkẹvuọvo ẹguare na ko tidia guẹdjọ,
ka cha reyọ isuesun rọye mie,
ka ghwọrọ a me guọghọ kufia re te oba.
27Te uvie na vẹ isuesun na
kugbe ọrho rẹ uvie na
vwẹ otọ rẹ odjuvwu na
ka cha vwẹ ayen kẹ ihwo efuanfon rẹ Ọ ro Me kpenu ejobi;
uvie rayen kọ cha dia uvie ri bẹdẹ
isuesun na ejobi ke cha ga ri de mu ọghọ kẹ ayen.
28Ọnana ọye oba rẹ ota na. Vwọ kẹ vwẹ ri Daniẹl, iroro mẹ da nabọ djẹ oshọ mu vwe, ophiẹn mẹ da rhẹriẹ; ẹkẹvuọvo mi de phi ota na phihọ evun mẹ.
Currently Selected:
Daniẹl 7: UBV77
Highlight
Share
ਕਾਪੀ।
Want to have your highlights saved across all your devices? Sign up or sign in
Bible in Urhobo © United Bible Societies, 1977.