2 ਕੁਰਿੰਥੁਸ 10
10
ਪੌਲੁਸ ਆਪਣੀ ਸੇਵਕਾਈ ਦੀ ਰੱਖਿਆ ਕਰਦਾ ਹੈ
1ਮੈਂ ਪੌਲੁਸ, ਜਿਹੜਾ ਤੁਹਾਡੇ ਅਨੁਸਾਰ ਤੁਹਾਡੇ ਸਾਹਮਣੇ ਤਾਂ ਨਿਮਰ ਹੁੰਦਾ ਹਾਂ ਪਰ ਤੁਹਾਡੇ ਤੋਂ ਅਲੱਗ ਹੋ ਕੇ ਦਲੇਰ ਹੁੰਦਾ ਹਾਂ, ਮੈਂ ਮਸੀਹ ਦੀ ਕਿਰਪਾ ਅਤੇ ਨਿਮਰਤਾ ਦਾ ਵਾਸਤਾ ਪਾ ਕੇ ਤੁਹਾਡੇ ਅੱਗੇ ਬੇਨਤੀ ਕਰਦਾ ਹਾਂ 2ਕਿ ਜਦੋਂ ਮੈਂ ਤੁਹਾਡੇ ਕੋਲ ਆਵਾਂ ਤਾਂ ਮੈਨੂੰ ਮਜਬੂਰ ਨਾ ਕਰਨਾ ਕਿ ਮੈਨੂੰ ਉਹ ਦਲੇਰੀ ਦਿਖਾਉਣੀ ਪਵੇ ਜਿਸ ਉੱਤੇ ਮੈਨੂੰ ਭਰੋਸਾ ਹੈ ਕਿਉਂਕਿ ਮੈਂ ਉਹਨਾਂ ਦੇ ਨਾਲ ਦਲੇਰੀ ਨਾਲ ਸਖ਼ਤ ਵਰਤਾਅ ਕਰ ਸਕਦਾ ਹਾਂ ਜਿਹੜੇ ਸਾਨੂੰ ਸੰਸਾਰਕ ਸਮਝਦੇ ਹਨ । 3ਇਹ ਠੀਕ ਹੈ ਕਿ ਅਸੀਂ ਸੰਸਾਰ ਵਿੱਚ ਰਹਿ ਰਹੇ ਹਾਂ ਪਰ ਸਾਡਾ ਯੁੱਧ ਸੰਸਾਰਕ ਨਹੀਂ ਹੈ । 4ਸਾਡੇ ਲੜਨ ਵਾਲੇ ਹਥਿਆਰ ਸੰਸਾਰਕ ਨਹੀਂ ਹਨ ਸਗੋਂ ਉਹ ਪਰਮੇਸ਼ਰ ਦੇ ਸ਼ਕਤੀਸ਼ਾਲੀ ਹਥਿਆਰ ਹਨ, ਜਿਹਨਾਂ ਦੀ ਮਦਦ ਨਾਲ ਅਸੀਂ ਝੂਠੇ ਵਿਵਾਦਾਂ ਅਤੇ ਕਿਲ੍ਹਿਆਂ ਦਾ ਨਾਸ਼ ਕਰਦੇ ਹਾਂ । 5ਅਸੀਂ ਪਰਮੇਸ਼ਰ ਦੇ ਗਿਆਨ ਦਾ ਵਿਰੋਧ ਕਰਨ ਵਾਲੀ ਹਰ ਰੁਕਾਵਟ ਨੂੰ ਦੂਰ ਕਰਦੇ ਹਾਂ ਅਤੇ ਇਸ ਤਰ੍ਹਾਂ ਅਸੀਂ ਹਰ ਵਿਚਾਰ ਨੂੰ ਕੈਦੀ ਬਣਾ ਕੇ ਉਸ ਨੂੰ ਮਸੀਹ ਦੇ ਆਗਿਆਕਾਰੀ ਬਣਾਉਂਦੇ ਹਾਂ । 6ਜੇਕਰ ਤੁਸੀਂ ਆਪ ਪੂਰੀ ਤਰ੍ਹਾਂ ਆਗਿਆਕਾਰੀ ਬਣੋ ਤਾਂ ਅਸੀਂ ਹਰ ਆਗਿਆ ਨਾ ਮੰਨਣ ਵਾਲੇ ਨੂੰ ਸਜ਼ਾ ਦੇਣ ਦੇ ਲਈ ਤਿਆਰ ਰਹਾਂਗੇ ।
7ਜੋ ਤੁਹਾਡੇ ਸਾਹਮਣੇ ਹੈ, ਤੁਸੀਂ ਉਸ ਉੱਤੇ ਧਿਆਨ ਕਰਦੇ ਹੋ । ਜੇਕਰ ਕੋਈ ਮਨੁੱਖ ਇਹ ਸੋਚਦਾ ਹੈ ਕਿ ਉਹ ਮਸੀਹ ਦਾ ਹੈ ਤਾਂ ਉਸ ਨੂੰ ਇਸ ਗੱਲ ਉੱਤੇ ਵੀ ਧਿਆਨ ਦੇਣਾ ਚਾਹੀਦਾ ਹੈ ਕਿ ਉਸੇ ਤਰ੍ਹਾਂ ਅਸੀਂ ਵੀ ਮਸੀਹ ਦੇ ਹਾਂ ।
8ਜੇਕਰ ਮੈਂ ਆਪਣੇ ਅਧਿਕਾਰ ਦੇ ਬਾਰੇ ਕੁਝ ਜ਼ਿਆਦਾ ਹੀ ਮਾਣ ਕਰਾਂ ਜਿਹੜਾ ਸਾਨੂੰ ਪ੍ਰਭੂ ਨੇ ਤੁਹਾਡੀ ਆਤਮਿਕ ਉਸਾਰੀ ਲਈ ਦਿੱਤਾ ਹੈ ਨਾ ਕਿ ਤੁਹਾਡੇ ਨਾਸ਼ ਦੇ ਲਈ, ਮੈਨੂੰ ਇਸ ਤੋਂ ਕੋਈ ਸ਼ਰਮ ਨਹੀਂ ਹੈ । 9ਤੁਸੀਂ ਇਹ ਨਾ ਸੋਚੋ ਕਿ ਮੈਂ ਤੁਹਾਨੂੰ ਆਪਣੇ ਪੱਤਰਾਂ ਦੇ ਰਾਹੀਂ ਡਰਾਉਣ ਦੀ ਕੋਸ਼ਿਸ਼ ਕਰ ਰਿਹਾ ਹਾਂ । 10ਕੁਝ ਲੋਕ ਕਹਿੰਦੇ ਹਨ, “ਪੌਲੁਸ ਦੇ ਪੱਤਰ ਤਾਂ ਬਹੁਤ ਭਾਰੇ ਅਤੇ ਸ਼ਕਤੀਸ਼ਾਲੀ ਹਨ ਪਰ ਉਹ ਆਪ ਦੇਖਣ ਵਿੱਚ ਕੁਝ ਵੀ ਨਹੀਂ ਅਤੇ ਉਸ ਦੀਆਂ ਗੱਲਾਂ ਵਿਅਰਥ ਹਨ !” 11ਅਜਿਹੇ ਲੋਕ ਇਹ ਵੀ ਯਾਦ ਰੱਖਣ ਕਿ ਜੋ ਕੁਝ ਅਸੀਂ ਤੁਹਾਡੀ ਗ਼ੈਰਹਾਜ਼ਰੀ ਵਿੱਚ ਲਿਖਦੇ ਹਾਂ, ਉਹ ਹੀ ਅਸੀਂ ਤੁਹਾਡੀ ਹਾਜ਼ਰੀ ਵਿੱਚ ਕਰਦੇ ਹਾਂ ।
12ਅਸੀਂ ਆਪਣੀ ਤੁਲਨਾ ਅਜਿਹੇ ਲੋਕਾਂ ਦੇ ਨਾਲ ਕਰਨ ਦਾ ਹੌਸਲਾ ਨਹੀਂ ਰੱਖਦੇ ਜਿਹੜੇ ਆਪਣੇ ਆਪ ਨੂੰ ਬਹੁਤ ਉੱਚਾ ਦਿਖਾਉਣ ਦੀ ਕੋਸ਼ਿਸ਼ ਕਰਦੇ ਹਨ ਕਿਉਂਕਿ ਜਿਹੜੇ ਲੋਕ ਆਪਣੀ ਜਾਂਚ ਆਪਣੇ ਹੀ ਨਾਲ ਕਰਦੇ ਹਨ ਅਤੇ ਆਪਣੀ ਤੁਲਨਾ ਆਪਣੇ ਹੀ ਨਾਲ ਕਰਦੇ ਹਨ, ਉਹ ਵੱਡੇ ਮੂਰਖ ਹਨ । 13ਅਸੀਂ ਆਪਣੀਆਂ ਹੱਦਾਂ ਤੋਂ ਬਾਹਰ ਮਾਣ ਨਹੀਂ ਕਰਾਂਗੇ । ਇਹ ਮਾਣ ਉਹਨਾਂ ਹੱਦਾਂ ਤੱਕ ਰੱਖਾਂਗੇ ਜਿਹੜੀਆਂ ਪਰਮੇਸ਼ਰ ਨੇ ਆਪ ਸਾਡੇ ਲਈ ਠਹਿਰਾਈਆਂ ਹਨ ਜਿਹਨਾਂ ਦੇ ਵਿੱਚ ਤੁਸੀਂ ਵੀ ਆ ਜਾਂਦੇ ਹੋ । 14ਇਸ ਤਰ੍ਹਾਂ ਅਸੀਂ ਆਪਣੀਆਂ ਹੱਦਾਂ ਤੋਂ ਬਾਹਰ ਨਹੀਂ ਜਾ ਰਹੇ ਕਿਉਂਕਿ ਅਸੀਂ ਹੀ ਸਭ ਤੋਂ ਪਹਿਲਾਂ ਤੁਹਾਡੇ ਕੋਲ ਮਸੀਹ ਦਾ ਸ਼ੁਭ ਸਮਾਚਾਰ ਲੈ ਕੇ ਆਏ ਸੀ । 15ਇਸ ਲਈ ਅਸੀਂ ਆਪਣੀਆਂ ਹੱਦਾਂ ਤੋਂ ਬਾਹਰ ਜਾ ਕੇ ਦੂਜਿਆਂ ਦੇ ਕੀਤੇ ਕੰਮ ਉੱਤੇ ਮਾਣ ਨਹੀਂ ਕਰਨਾ ਚਾਹੁੰਦੇ ਪਰ ਸਾਨੂੰ ਉਮੀਦ ਹੈ ਕਿ ਸਾਡੀਆਂ ਆਪਣੀਆਂ ਹੱਦਾਂ ਵਿੱਚ ਹੀ ਜਿਸ ਤਰ੍ਹਾਂ ਤੁਹਾਡਾ ਵਿਸ਼ਵਾਸ ਵਧੇਗਾ, ਉਸੇ ਤਰ੍ਹਾਂ ਸਾਡੀ ਸੇਵਾ ਦਾ ਵਾਧਾ ਤੁਹਾਡੇ ਵਿੱਚ ਹੋਵੇਗਾ । 16ਫਿਰ ਅਸੀਂ ਤੁਹਾਡੇ ਤੋਂ ਇਲਾਵਾ ਦੂਜੇ ਇਲਾਕਿਆਂ ਵਿੱਚ ਵੀ ਸ਼ੁਭ ਸਮਾਚਾਰ ਦਾ ਪ੍ਰਚਾਰ ਕਰਾਂਗੇ ਪਰ ਦੂਜਿਆਂ ਦੀਆਂ ਹੱਦਾਂ ਵਿੱਚ ਕੀਤੇ ਕੰਮ ਉੱਤੇ ਮਾਣ ਨਹੀਂ ਕਰਾਂਗੇ । 17#ਯਿਰ 9:24ਪਵਿੱਤਰ-ਗ੍ਰੰਥ ਕਹਿੰਦਾ ਹੈ, “ਜੇਕਰ ਕੋਈ ਮਾਣ ਕਰਨਾ ਚਾਹੁੰਦਾ ਹੈ ਤਾਂ ਉਹ ਪ੍ਰਭੂ ਉੱਤੇ ਕਰੇ ।” 18ਕਿਉਂਕਿ ਆਪਣੀ ਵਡਿਆਈ ਆਪ ਕਰਨ ਵਾਲਾ ਪ੍ਰਭੂ ਦੇ ਸਾਹਮਣੇ ਸਵੀਕਾਰ ਨਹੀਂ ਹੁੰਦਾ ਸਗੋਂ ਉਹ ਸਵੀਕਾਰ ਹੁੰਦਾ ਹੈ ਜਿਸ ਦੀ ਵਡਿਆਈ ਪ੍ਰਭੂ ਆਪ ਕਰਦੇ ਹਨ ।
Currently Selected:
2 ਕੁਰਿੰਥੁਸ 10: CL-NA
Highlight
Share
ਕਾਪੀ।
Want to have your highlights saved across all your devices? Sign up or sign in
Punjabi Common Language (North American Version):
Text © 2021 Canadian Bible Society and Bible Society of India