1 KORINT 15
15
Khrista Arhang Kamlokhi
1Keoniorübo, kheakü inü nüsa ki thsangyuthsangrabah leangkhi tüsho ju kheak nüsa akin düküngde azhipkhi thiyusheak-atsü lümkhitshihnelah. 2Inü nüsa ki thsangyuthsangrakhi yu nüsanü düküngde tholosho, ha thiyusheakatsü hode nüsa khümkhita lah. Jude yungsho, nüsanü akeangkeang ching kindo.
3Tümütüsho tümü inü leangkhikheanü akhuhbe adungto thsüde nüsa kilim jihdo, junangde amüsühyu yande isa neakbo dünkheak khrista shekheah, 4#Mt 12.40; Yunir 2.24-32api kiuyuka bahbah amüsühyu yande asam nipü api arhang kamlo, 5#Lk 24.34; Mt 28.16,17; Mk 16.14; Lk 24.36; Jhn 20.19tüsho api ju Kephas ki, jushu thürükheak mahne ki akhiuk. 6Jushu kim khülang chingnü keoniorü 500 akumung ki akhiuk, khürü sheabah-a lalashe ahihbe khihni khiungde lah. 7Jushu apinü Jakob ki, jushu amüsüh-thsangyurü alala ki akhiuk. 8#Yunir 9.3-6Akheam thsüde kim münühkhühde azübekhi I ki she akhiuk. 9#Yunir 8.3Tümüde I a amüsüh-thsangyurü bolung aninibe, amüsüh-thsangyurü de ajipü müthülün, tümütüsho inü Thrünpuh borü thsümüchikheah. 10Tüshe Thrünpuh amüthsüm hode tümü lanü I ah, tüsho I kilim api amüthsüm akeangkeang mülakheah. Tüshe arü kheaknü inü amürangbe rhimo, ju inü yung, tüshe I lung lakhi Thrünpuh amüthsümnü ah. 11I yungsho arü thsüthsü, isanü thsangyuthsangra tüsho nüsanü kin.
Asherü Arhang Kamlokhi
12Kheakü Khrista ashe chingnü arhang kamlodo de thsangyuthsangrakheasho, küde thsah nüsa khürünü asherü arhang kamlokhi müla de thakhukla? 13Tüshe asherü arhang kamlokhi mülakhülaa, Khrista arang mükamloa labah; 14Khrista arhang mükamlokhülaa, isa thsangyuthsangra tüsho nüsa akin akeangkeang ah. 15Ju kheaknü alü isa ju Thrünpuh dünkheak arükchih thiyumütsan jihrübo thsübah, tümüde apinü Khrista ashe chingnü arhang kamloshih de Thrünpuh dünkheak isanü thiyumütsan thsü– tüshe asherü arhang mükamlokhülaa apinü anihbuh arhang mükamloshihde alabah. 16Tümütüsho asherü arhang mükamlochokhülaa, Khrista arhang mükamloa labah. 17Khrista arhang mükamlokhülaa, nüsa akin akeangkeang, tüsho kheakü khiungde nüsa neakbo ching labah. 18Judüasho sherü Khrista lung shedünü dükheakdo. 19Isanü ha rhangdung thsungkheak lang Khrista kheak mulonglam lakhülaa, mihtsürü alala kheaknü amuzhobe kuhi thsübah.
20Tüshe atsütsü asherü she arhang kamlobah dükhi amütsan Khrista ashe chingnü arhang kamlodo. 21Tümüde mihtsürü khülang hode ashepü arükhi nangde mihtsürü khülang hode asherü arhang kamlopü she arü. 22Tümüde alala Adam lungnü she, junangde alala Khrista ching arhang labah. 23Tüshe mihbüm aban nihbuh kim ching arhang kamloshih: alala kheaknü akhuh Khrista; jushu api arüchoki api yo thsürü labah. 24Judüki apinü yakzanshuhrü, thiyukhüm-sühmüh tüsho wu alala dükheakshih dunglim Abuh Thrünpuh kilim kiulongthsü jihabahchoki akheam arübah. 25Tümüde apinü anihbuh riribo alala ajing khüp müyüzahshihyi khiungde yakzan shuhbah. 26Akheam thsüde adükheakshihpü thiriri ju ashekhi. 27“Tümüde Thrünpuhnü lüpdükhi api jing khüp yüzahshih.” Tüshe küyimki “Lüpdükhi api king khüp yüzahshihdo” de athabanü, lüpdükhi api jing khüp yüzahshihbuh ju a mübe. 28Küyimki lüpdükhi api khüp kamshihbanü, atsührü she lüpdükhi api jing khüp yüzahshihbuh khüp kamchoh, junangde mihbüm aban ki Thrünpuh ju lüpdükhi labah.
29Kheakü mihtsürübonü asherü thsung thsüde baptikhi amütsan tümü a? Asherü ju arhang mükamlobeasho, tümüde mihtsürübonü arü thsung thsüde baptikhea? 30Tümü thsükhi isanü kimkhü aban küpkhuk lucho? 31Keoniorübo, isa Atungpuh Jisu Khrista ching I nüsa kurungkheak müretahkhinü I nimung aban shechoh de khipkhitshihchoh. 32Mihtsürü lümkhi ayannü langa inü Efisia ching mütüm shiwüh bolung keochihsho, I tümü alü thsüba? Asherü arhang mükamlobasho, “Isanü tsühanü tüsho yunganü, tümüde shido isa ashebah.” 33Dümülapyukshih: “Müyamrü amütsünü yakli atsü thsümünimchoh.” 34Nü lümkhi alungki ching arang, tüsho neak düyihbeaklo. Tümüde khürü a Thrünpuh mükheahkhi müla. Inü ha nüsa achihbe thachoh.
Arhang Kamlokhi Pang
35Tüshe khürünü akeokhibah, “Küde thsah asherü arhang kamloba? Arü küdürü pang arüba?” 36Nüsa makharü mihtsürü! Nüsanü tümü hiuchonü ju müshedüa rhangdung masürüchoh. 37Küyimki nüsanü ahiubanü tode asürüpü lakhi apang müyangchoh, tüshe wheat müjih yungsho püpü lachoh. 38Tüshe Thrünpuhnü ju kilim apinü alümkhi nangde pang, tüsho müjih mungji aban kilim nihbuh pang jihchoh. 39Tümüde shih rhangdung lakhi alala rukhüh yung, tüshe mihtsürübo thsungkheak mungji khülang, shiwühbo thsungkheak püpü, wuhnubo thsungkheak püpü, tüsho thüngühbo thsungkheak püpü de lah. 40Yinmirü pangbo tüsho alomirü pangbo lah; tüshe yinmirü müretah khülang, tüsho alomirü müretah püpü lah. 41Ani müretah khülang lah, tüsho khinu müretah püpü, chiningbo müretah püpü; chining bolung müretah büthsüthsü lah.
42Junangde asherü arhang kamlokhi ju ruk ah. Tümü hiukheanü adükheakbe ah, tümü asürüa lanü müdükheakbea ah. 43Wüntre mülakhi ching hiuchoh, müretah ching asürüchoh. Reangmüzahkhi ching hiuchoh, wu ching asürüchoh. 44Alomi pang hiuchoh, me pang asürüchoh. Ju ching alomi pang lasho, me pang she lah. 45Hanangde ha thrüta lah, “Akhuh mihtsürü Adam rhangdung lakhi mihtsürü kam”; ashube Adam a rhangdung jihbe me kam. 46Tüshe akhuhbe ju me yungde pang, tüsho jushu me ah. 47Akhuh mihtsürü alomi chingnü, asungthulung mihtsürü ah; mahnepü mihtsürü ju yinmi chingnü ah. 48Asungthulung mihtsürü lakhi nangde, sherü asungthulung yoanü ju ruk ah; tüsho yinmi mihtsürü lakhi nangde, sherü yinmi yoanü ju ruk ah. 49Isanü asungthulung mihtsürü kiphahde alakhi nangde, isanü yinmi mihtsürü she kiphahde alabah. 50Keoniorübo, inü nüsa ki ha thachoh: Shih tüsho thiyihnü Thrünpuh kiulongthsü yamrüplurüp mulukhuk, yungsho adükheakbenü amüdükheakbe yamrüplurüp muluchoh.
51 #
1 Tes 4.15-17
Kheahang! Inü nüsa ki aramyu thachoh. Isa alala müshe, tüshe isa alala amüthribah, 52kim khülang ching, mükthrap khülang ching, akheam hulipungpung mütchoki labah. Tümüde hulipungpung mütbah, asherü müdükheakbe thsüde arhang kamlobah, tüsho isa alala amüthribah. 53Tümüde adükheakbenü amüdükheakbe tüsho ashebenü amüshebe phuyubeah. 54Küyimki adükheakbenü amüdükheakbe, tüsho ashebenü amüshebe phuyubanü, thrüta lakhi müchit dünjibah: “Ashekhi ju akuk ngükhi ching muyuabahdo.”
55“O ashekhi, nü akuk ngükhi küching la?
O ashekhi, nü yo thsünübe küching la?”
56Ashe thsünübe ju neak, tüsho neak wu ju yakzan. 57Tüshe isa Atungpuh Jisu Khrista hode isa kilim akuk ngükhi jihbuh Thrünpuh ki makshe jihang. 58Jumonü, amuzho I keoniorübo, düküngang, daphap, kamruhroro Atungpuh rhimo ching nüsanü biriang, tümütüsho Atungpuh lung nüsa rhimokhi akeangkeang yung de nüsanü mükheahlah.
Currently Selected:
1 KORINT 15: YIMCBSI
Highlight
Share
ਕਾਪੀ।
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.