1 KORINT 11
11
1 #
1 Kor 4.16; Fil 3.17 Inü Khrista kheahkhikhi nangde, I kheahkhiang.
Kingaünkhi ching Ku Dukiukhi
2Lüpdükhi ching I lümkhitkhi tüsho nüsa ki thsangyukhi ching yankhi dünkheak inü nüsa shijihchoh. 3Tüshe mihtsürü aban kurungkheak aku ju Khrista, aliberü kurungkheak aku ju aniubuh, tüsho Khrista kurungkheak Thrünpuh ah de nüsanü anikhitshihnelah. 4Athrürü shepünü ku dukiubah tamkhüntamnücho yungsho müchitchonü Khrista wüntre müjihchoh, 5tüshe aliberü shepünü ku müdukiude tamkhüntamnücho yungsho müchitchonü aniubuh wüntre müjihchoh–ju anihbe ku hüta bahkhi ruk ah. 6Tümütüsho alibenü müdukiusho anihbenü kuyü nipa bahshang; tüshe aliberü thsungkheaknü nipa bahpü yungsho hüta bahpü ju achihbe thsüsho, anihbenü ku dukiube yihshang. 7Tümüde athrürünü api ku müdukiubeah; tümütüsho Thrünpuh kiphahkhi tüsho müretahkhi lah; tüshe aliberü a athrürü müretahkhi lah. 8Tümüde athrürü ju aliberü kheaknü athrünkhi yung, tüshe athrürü kheaknü aliberü thrünkheah. 9Yungsho aliberü thsungkheak athrürü thrünkhi yung, tüshe athrürü thsungkheak aliberü thrünkheah. 10Jumonü yunirübo dünkheaknü aliberünü ku kheak adukiube yihkihbeah. 11Judüalalashe, Atungpuh lung aliberü ju athrürü kheaknü, yungsho athrürü ju aliberü kheaknü zuzu müla; 12tümütüsho aliberü ju athrürü kheaknü thrün, junangde kheakü athrürü ju aliberünü zübekhi lah. Tüsho lüpdükhi Thrünpuh kilimnü lah. 13Nüsa thsungkheak thiyukhapang; aliberünü ku müdukiude Thrünpuh ki tamkhüntamnükhi ju alungki a de? 14Athrürünü kuyü shangde awokhi ju nihbuh mungchih ah de mihnü nüsa ki müthsangyucho de? 15Tüshe aliberü kuyü ashang wosho, ju anihbe akhampü ah. Tümüde alibe kuyü ju anihbe phudopü jihkheah. 16Tüshe khürünü ha dünkheak atsangachihpü mulongsho, isa yungsho Thrünpuh borübo thsüthsü kingaünkhi ching ahoribe püpü müla.
Atungpuh Thünio
(Mt 26.26-29; Mk 14.22-25; Lk 22.14-20)
17Judüalalashe, thsangdanpü lakhibo ching inü nüsa müshijih, tümütüsho nüsa kingaünpü mukhungkhi ju atsü yungde alü amütsü lah. 18Akhuhbe ching, nüsa borü mukhungchoki, nüsa bolung achamnak lah de inü sochoh tüsho inü she anükhüh akin lah. 19Tümüde nüsa bolung achamnakbo labah, junangde alim larübo mütsanbah. 20Küyimki nüsa rukhüh mukhungbanü, nüsanü atsühkhi ju Atungpuh thünio yung. 21Tümütüsho yimtsühchoki mihbüm abannü müngüh ajinde nihbuh jim tsühchoh, tüsho khürü a khümlah tüsho püpürü a müshanga lah. 22Nüsa tsühyungpü thsüde thüyam müla de? Yungsho nüsanü Thrünpuh borü mükhemükimcho de tüsho tümü mülarü junocho de? Inü nüsa ki tümü thaba? Inü ha thsungkheak nüsa shijihba shi? Yung, inü jude müthsü.
23Tümüde inü nüsa kilim jihkhi ju Atungpuh kilimnü leangkhi, junangde api yinatsühkhi tsüngre Atungpuh Jisunü yikhap lu, 24tüsho küyimki apinü makshe jihkheanü yihnak tüsho tha, “Ha athsümünimkhi I pang ah. I lümkhitde ha rhimoang.” 25Junangde yimtsüh dunglim apinü pung lubah tha, “Ha pung I thiyih ching tangzüng aso ah. Nüsanü ayung aban I lümkhitde ha rhimoang.” 26Tümüde nüsanü küdükhüh ki ha yikhap tsühba tüsho pung yungbanü api arü khiungde Atungpuh shekhi dünkheak zhiyukjang.
27Jumonü sherünü müthülünkhi yakli chingnü yikhap tsühba yungsho pung yungbanü Atungpuh pang tüsho thiyih azhihde neak yihbeakkhi amülim labah. 28Mihtsürü abannü yikhap mütsühyide tüsho pung muyungyide nihbuh akeakheahbeah. 29Tümütüsho shepünü Atungpuh pang mümütsande tsühcho tüsho yungchonü nihbuh kheak thiyukhap hande arüchoh. 30Jumonü nüsa ahihkhüh yiuhyiuhlah tüsho tukthsülah, tüsho khürü shedo. 31Tüshe isanü nihbuh akeakheah-a lasho, isa yumükhap. 32Tüshe küyimki Atungpuhnü isa yukhapbanü, isa danyuka lah, junangde alomi lung isa mübahyuk.
33Jumonü keoniorübo, küyimki nüsa tsühyungpü mukhungbanü aleangachihang. 34Khürü khüma lasho, api thüyam ching yimtsühshang, jude yungsho nüsa rukhüh mukhungkhi ju abahyukkhi kambah. Tüsho küyimki I arübanü khuhlangahuhkhi püpü jihbah.
Currently Selected:
1 KORINT 11: YIMCBSI
Highlight
Share
ਕਾਪੀ।
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.