2 TIKRONIKA 21
21
Ta Yoramu, hosi ya Yuda.
1Yoxafati a etlela ni vatata wa yena, a lahliwa ni vatata wa yena, emutini wa Davhida; kutani Yehoramu, n'wanakwe, a fuma ematshan'weni ya yena.
2A a ri ni vamakwavo va xinuna, vana va Yoxafati: a ri Azariya, na Yehiele, na Zakariya, na Azariya, na Mikaele, na Xefatiya, hinkwavo lava a va ri vana va Yoxafati, hosi ya Israele. 3Tata wa vona u va nyikile xuma lexikulu xa silivhere, ni xa nsuku, ni xa mitirho leyi pfumalekaka, swin'we ni miti ya makhokholo etikweni ra Yuda, kambe a a nyikile Yehoramu vuhosi, hikuva a a ri mativula. 4Yehoramu, kuteloko a kumile vuhosi bya tata wa yena, ni loko a titiyisile, a dlaya hi tlhari vamakwavo hinkwavo, hambi ti ri tihosana tin'wana ta Israele.
5Yehoramu a a ri wa malembe ya 32 loko a sungula ku fuma; a fuma malembe ya ntlhanu na manharhu eYerusalema.
6A famba endleleni ya tihosi ta Israele, hilaha yindlu ya Akabu yi endleke hakona, hikuva nsati wa yena a a ri n'wana wa Akabu; a endla leswo biha emahlweni ka Yehovha. 7Kambe Yehovha a nga rhandzanga ku heta yindlu ya Davhida, hikwalaho ka ntwanano lowu a wu endleke na Davhida, ni hikwalaho ka leswi a swi vuleke leswaku a ta n'wi nyika, ni vana va yena, rivoni hi masiku.
8Enkarhini wa yena Edomu a tintshunxa eka Yuda, kutani va tivekela hosi. 9Kavaloko Yehoramu a huma ni tindhuna ta yena, ni tigolonyi ta yena hinkwato; kutani a pfuka nivusiku a hlula Vaedomu lava n'wi rhendzeleke, ni tindhuna ta tigolonyi. 10Va Edomu va sala va ntshuxekile eka Yuda ku fika namuntlha. Enkarhini wolowo, Libina a n'wi xandzukela, hikuva a fularhele Yehovha, Xikwembu xa vatata wa yena.
11Na yena, a aka tindhawu leti tlakukeke etintshaveni ta Yuda; kutani a kucetela vaaki va Yerusalema, leswaku va tinyiketa vuoswi, a kanganyisa ni Vayuda. 12Ku fikile eka yena papila leri tsariweke i Eliya, muprofeta, ri te: “Yehovha, Xikwembu xa Davhida, tata wa wena u vurisa sweswo, a ku: ‘Leswi u nga fambangiki etindleleni ta Yoxafati, tata wa wena, ni le tindleleni ta Asa, hosi ya Yuda, 13kambe u fambile etindleleni ta tihosi ta Israele, u kuceterile va Yuda ni vaaki va Yerusalema, evuoswini, hilaha yindlu ya Akabu yi endleke hakona, kambe u dlayile ni vamakwenu va yindlu ya tata wa wena, lava ku tluleke hi vunene, 14waswivo, Yehovha u ta boxa mbanga leyikulu etikweni ra wena, u ta ba vana va wena ni vasati va wena, ni hinkwaswo leswi nga swa wena; 15loko u ri wena u ta biwa hi khombo lerikulu, byi nga vuvabyi bya marhumbu lebyi nga ta engeteleka, marhumbu ya wena ma ko ma huma hi matimba ya vuvabyi.’ ”
16Yehovha a hlohlotela Vafilista ni Maarabu, lava akeke ekusuhi ni Vaetiyopiya, leswaku va ta pfuka Yehoramu; 17kutani va tlhandlukela etikweni ra Yuda, va nghena eka rona, va phanga xuma hinkwaxo lexi ngi xi ri endlwini ya hosi; va teka ni vana va yena, ni vasati va yena; ku nga sali na n'wana wa wanuna loko a nga ri Yowahazi, ndzisana ya vana va yena. 18Endzhaku ka sweswo hinkwaswo. Yehovha, a n'wi ba hi vuvabyi bya marhumbu lebyi nga horiki; 19vuvabyi byi engeteleka siku rin'wana ni rin'wana, kutani eku heleni ka lembe ra vumbirhi, marhumbu ya yena ma huma hi matimba ya vuvabyi, a fa, eku vavisekeni lokukulu. Tiko ra yena a ri n'wi hiselanga mirhi ya risuna hilaha va endleleke vatata wa yena hakona.
20A a ri wa malembe ya 32 loko a sungula ku fuma, kutani a fuma malembe ya ntlhanu na manharhu eYerusalema. A fa, va nga twi ku vaviseka, kutani va n'wi lahla emutini wa Davhida, kambe ku nga ri emasirheni ya tihosi.
Markert nå:
2 TIKRONIKA 21: TSO29
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.