1 SAMIELE 13
13
Ta ku lwa ni Vafilista.
1Sawulo a a ri ni lembe rin'we eku fumeni ka yena; kuteloko a fumile Israele hi malembe mambirhi, 2Sawulo a tihlawulela vanhu va Israele va 3 000; va 2 000 a va ri na Sawulo eMikamaxa ni le ntshaveni ya Betele, kambe va 1 000 a va ri na Yonatani eGibeya wa Benjamini; loko va ri lava seleke va tiko, a va rhuma un'wana ni un'wana entsongeni wa yena. 3Yonatani a tlhava ntlawa wa Vafilista eGeba na vona Vafilista va swi twa. Kutani Sawulo a yimba nanga etikweni hinkwaro, a ku: “Vaheveru a va yingise!” 4Kutani Vaisraele hinkwavo va yingisa leswi va swi vulaka loko va ku: “Sawulo u hangalasile khokholo ra Vafilista na yena Israele a vengiwa hi Vafilista. Kavaloko tiko ri hlengeletana eGiligala ku landza Sawulo.”
5Kutani Vafilista va hlengeletana ku ya lwa na Israele. A va ri ni tigolonyi ta 30 000, ni vakhandziyi va tihanci va 6 000, ni vunyingi lebyi teleke kukotisa sava leri nga eribuwini ra lwandle va tlhandluka, va ya gova eMikamaxa, evuxeni bya Beta-Avene. 6Vanhu va Israele va tivona leswaku va le khombyeni lerikulu, hikuva tiko ri susumetiwa swinene; kutani va tumbela emabakweni, ni le swihlahleni, ni le maribyeni, ni le makhokholweni, ni le makheleni. 7Van'wana va Vaheveru va wela eYordani, va ya etikweni ra Gadi ni ra Giliyadi; kambe Sawulo a a ri eGiligala kutani tiko hinkwaro a ri rhurhumela endzhaku ka yena.
Sawulo a gandzela.
8A yimela masiku ya ntlhanu na mambirhi lama vekiweke hi Samiele kambe Samiele a hlwela ku fika eGiligala, kutani tiko ri hangalaka ri hambana na Sawulo. 9Kavaloko Sawulo a ku: “Ndzi tiseleni holokosta ni magandzelo ya ku khensa.” Kutani a humesa holokosta. 10Kakuloko a heta ku humesa holokosta, Samiele a fika, kutani Sawulo a ya hlangana na yena ku n'wi xeweta. 11Samiele a ku eka yena: “U endle yini?” Sawulo a ku: “Kuteloko ndzi vonile tiko ri hangalaka, na wena u nga fiki hi siku leri vekiweke, kambe Vafilista a va hlengeletanile eMikamaxa, 12ndzi ku: ‘Vafilista va ta ngirimela ku lwa na mina eGiligala, ndzi nga si khongela Yehovha!’ Kavaloko ndzi kanya mbilu, ndzi humesa holokosta.” 13Samiele a ku eka Sawulo: “U endlile hi vuhunguki, a ku hlayisangi ku lerisa loku Yehovha, Xikwembu xa wena, a nga ku lerisa kona. Hikuva Yehovha a a ta tiyisa ku fuma ka wena ehenhla ka Israele, hilaha ku nga heriki; 14kambe sweswi, ku fuma ka wena ku nga ka ku nga tiyi. Yehovha u tihlawulele munhu la rhandziwaka hi yena, kutani Yehovha u n'wi vekile ku va hosi ya tiko ra yena, hikuva a ku hlayisanga leswi Yehovha a ku leriseke swona.”
15Kutani Samiele a pfuka, a suka eGiligala, a tlhandlukela eGibeya wa Benjamini, kutani Sawulo a kamba ntlawa lowu ngi wu ri na yena, a va lava ku va vanhu va 600.
16Sawulo na Yonatani, n'wana wa yena, ni nyimpi leyi ngi yi ri na vona a va tshama eGeba wa Benjamini, kambe Vafilista a va gova eMikamaxa. 17Ku huma emagoveleni ya Vafilista tinyimpi tinharhu ti ya onha tiko; yin'wana yi famba hi ndlela ya Ofira etlhelweni ra tiko ra Xuwala; 18yin'wana yi famba endleleni ya Bet-Horoni; ya vunharhu yi famba hi ndlela ya ndzilakana leyi nga ehenhla ka nkova wa Seboyimi, hitlhelo ra mananga.
19A ku nga kumeki vafuri etikweni hinkwaro ra Israele, hikuva Vafilista a va te: “Swi fanekela leswaku Vaheveru va siveriwa ku fula mabanga ni matlhari.” 20Sweswo Vaisraele hinkwavo a va xikela eka Vafilista ku lota, un'wana ni un'wana xikalo xa yena, kumbe xikomu xa yena, kumbe xihloka xa yena, kumbe foxolo ya yena, 21lotela ra kona a ri ri pimi (⅔ wa xikele) ka tifoxolo, ni swikomu, ni ka tiforoko, ni ka swihloka. 22Sweswo siku ra ku lwa a ku kumiwanga banga ni tlhari emavokweni ya tiko hinkwaro leri ngi ri ri na Sawulo na Yonatani; matlhari a ma ri emavokweni ya Sawulo ni n'wana wa yena, Yonatani, ntsena.
23Kambe nyimpi yin'wana ya Vafilista yi ya tshama endleleni ya Mikamaxa.
Markert nå:
1 SAMIELE 13: TSO29
Marker
Del
Sammenlign
Kopier
Vil du ha høydepunktene lagret på alle enhetene dine? Registrer deg eller logg på
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.