ZLI VIRZI 26
26
Izak ati Rebeka a hay Abimelek
1Ti di nah na, may a gi asi ruwuyo, mbak migi zleˀe ti hin ngi Abraham na le. Izak aru ng'avi Abimelek, buy madiɗa ngi Filistihey a Gerar. 2Bumbulvuŋ a biga vu da Izaka, a ɓaŋ: «Ki pi sar nga Ezipte ta, amma ka cifi angi hirwuy ya masa buguw di. 3Ka zik angi hirwuy misenna. I sa ndir ati ka, yo yi sa ɗuwuluw mi. Naŋ kine, i sa vula hirwuy hana cek da ka ati dideˀ ɗikey. Ɓi ya miɓa ɗaˀ le zleˀeˀ da bunuk Abraham na, i sa ga gbaˀa. 4I sa ska dideˀ ɗikeye haɗi kaɓa wurzlaŋ ngi muŋhoy, yo i sa vula taŋ ruwuy hana gar da taŋ. I sa ɗuwula mi da sukwi ngi mizli ngi ruwuyoy gar tisi taŋ. 5Vur Abraham a ciniy mi le, yo a ja ɓi ya muɗuvaŋ taŋ na le purla purla gar.» 6Izak a cifi a Gerar. 7Mizli ngi hirwuy nah na, a cufuɗakaŋ vur ngwas naŋ. A mbiɗa taŋ di: «I sukum ɗu.» Ɓa a ɓa taŋ Rebeka i ngwas naŋ na, a tum vu gu ta, asi a zluwun ti mizli tayna ma kiɗakaŋ vagay aseˀe, vur Rebeka naŋ kuyu gwatta. 8Izak a zik haɗa a diga, ngi pas numuŋ ada na, Abimelek buy ngi Filistihey ara pur hiri tir fenetir, a pura Izak magam dungur ati ngwas naŋ Rebeka. 9Abimelek a zila Izaka, a ɓaŋ na: «Dambalaka i ngwas ɗik gisiŋ gisiŋ ma na, ki ɓi: ‹I sukum ɗu› na vur mike?» Izak a mbiɗaŋ di: «Yi ɓa kahana, asi i zluwun vur taŋ ma kiɗikiy vagay aseˀe.» 10Abimelek a ɓaŋ ma: «Ki ga ndra di i mi hanaka? Anja neˀ zleˀe na, mbur ngi wuzla mizli ɗuwoy a hin ti ngwas ɗike le. Anja ni ki ci ti ndra le ng'ar gi gwat malambaˀ wãˀ.» 11Akẽh na, Abimelek a ɓi ɓa a ɓaka mizli naŋhaya gar: «Ko wa mija haŋ le avu mbur hana ati ngwas naŋ na, a sa kiɗaka vagay.» 12Izak a zligi angi hirwuy nah, angi vi nah na, a njiko gwat ngi migamaya makaw skat, asi Bumbulvuŋ ara ɗuwulaŋ mi. 13Zlili naŋ ara sik nga mbuŋ nga mbuŋ, hã a tiri misi zlili haɗa teˀe. 14N'ada ti gezleŋ ngi tumuŋhoy, ngi ˀaway, slahay waɗ gawlahay kwesle kwesle.
Izak mujumomˀay ati Abimelek
Filistihey a zlaka a gam suloŋ ti Izaka. 15A dikaka vigiɗ ngi yamay, gawla ngi cine naŋhay milaka taŋ mur cine naŋ Abraham na cek, a nahaka taŋ mbaf mbaf ti hirwuy. 16Abimelek a ɓa Izaka: «Cuh kileŋ avu ndra aka, ani ki gi madiɗa le haɗi fineˀ ndra.» 17Izak a cuh ti kẽh, ara pi ar sozo ngi Gerar, a cifi a diga. 18Vigiɗ ngi yamay, milaka taŋ mur cine naŋ Abraham, yo Filistihey midikaka taŋ a dirba muc ngi Abraham tuwa na, Izak a la hiri naŋhay a muŋ. A ca taŋ slimiɗ misi purla, kaɓa cine mica taŋ di zleˀe. 19Ngi pas mekelem ada na, gawla ngi Izakay ara lam yam ar sozo tuwa, a lumam miviɗiviɗi naŋ a diga. 20Mijigin ngi Geraray a zlaka tiri ati mijigin ngi Izakaya, a ɓaka taŋ: «Yam hana i ngi ndra.» Izak a zila vigiɗ ngi yam hana Esek, mbiɗeˀvra ‹tiri›, vur misipaka taŋ nder nder na. 21Gawla ngi Izakay, ara lam vigiɗ mekelem, a zlaka tiri aseˀe ma. Izak a zila Sitna, a mbiɗeˀvra ‹ngila mi.› 22A kirih baɗ a kẽh, a li yam mekelem, a tiram aseˀe mata, a zila Rehobot, mbiɗeˀvra ‹luuma hirnga›, asi a ɓi na: «Naŋ kine, wurenna Bumbulvuŋ a pula ndra ɓuh le fiw, ɓa i lumam gwat asi ruwuyo.» 23A dirba nah, Izak aru ti kẽh nga Berseba. 24Ngi duvuɗ nah na, Bumbulvuŋ a bigaŋ vu, a ɓaŋ: «I ya Buymisemuŋ ngi bunuk Abraham, ki zluwun ta, asi y'ada ati ka. I sa ɗuwuluw mi, yi sa ga ɓa dideˀ ɗikey a sikam haɗi, asi Abraham gawla ɗu.» 25Akẽh na, Izak a ɗiyi li gi mikuli, a zila Buymisemuŋ ti slimiɗ naŋ Bumbulvuŋ. A ɗiya guɗuk naŋ a diga, dar gawla naŋhay a lam vigiɗ ngi yam mekelem. 26Abimelek a so baɗ a Gerara nga pura Izaka, ngama naŋ Awzak waɗ buy ngi vurum naŋ Pikol, a soko aseˀeŋ. 27Izak a ɓa taŋ: «Ki soko nga pur ɗu vur mike? Ki hirsikiy le, yo ki ɓulikiy le baɗ ti hay kumo.» 28A mbiɗakaŋ di: «Ndr'i puraka keɗ keɗ na, Bumbulvuŋ naŋ da ati ka gisiŋ, joˀ ndr'i wulkam, i ɓam na: Anja i cam haŋ ar a rasl ar wala ndra ati ka, ɓa i jumomˀay. 29Hudum, ɓa ki ga ndra malambaˀ ta, kaɓa ndra mugukuw malambaˀ ta na ya, sey i gukuw di i mezle tewle, yo i pulukuw ki ru ti zuy, wurenna ki mbur Bumbulvuŋ muɗuwuluw mi le.» 30Izak a ga taŋ gwat ngi zum kuy kuy, a zumam, a sam. 31Ngi miprik naŋ na, a slikiɗam cẽẽt, mbur a hudum a mbuŋ cala a mbuŋ cala. Izak a mbiɗa taŋ mi, dar a ram zuy zuy. 32Tapas nah vuna, gawla ngi Izakay a soko, a ɓakaŋ ɓi ngi vigiɗ ngi yam taŋ malaka tuwa, a ɓakaŋ: «I lumaka yama le.» 33Izak a zila vigiɗ ngi yam nah Siba, mbiɗeˀvra ‹hudum.› Vurˀe, a zilaka walahay nah Berseba hã dana aruŋ, a mbiɗeˀvra ‹vigiɗ ngi yam ngi hudum.›
Esaw muzuɓ ngwas
34Esaw mindila vi kukur mufaɗ na, a zuɓ ngwasaya cuw, ziri Hitihey, Yehudit zuŋ ngi Beri waɗ Basmat zuŋ ngi Eloŋ. 35A gaka bonoy haɗi da Izak ati Rebeka.
Markert nå:
ZLI VIRZI 26: BEGDC
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Bible en Langue Guiziga © L’Alliance Biblique du Cameroun, 2011.
