1 Samweli 8
8
Isareli ee bugiti egyu-dɩrɛ
1Gɛtɛ Samweli ɛ dan ditenikwaa fɔ, e tiri wobebi ɛ sɩ̀ gɛtɛ bàà mɛ Isareli begyegeyelɛ. 2Wobi-gyangbasɛ diyere n di Yoweli, gɛ ɛnyɔɔfɛ fɔ mɔ diyere n di Abiya. Gɛ bɛ mɛ gʋtʋn Beeseba. 3Mɔ wo bebi fɔ bɛn tɛrɛma wɔ bɩsɩrɩ, kɔba gʋnʋn-sɩya ma geto anyan dibilin daanɩ, ma gɛman dɔ̀ gɔdɔ ma giisele waanɩ gɛ bɛ̀ tɛrɛma.
4Okoro Isareli bɛndɩrɛ powu be tuma, gɛ bɛ san Samweli wakʋn Rama. 5Gɛ bɛ dɔ̀ wɔ alan, <<A dan ditenikwaa, gɛ aa bebi bɛn tɛrɛma aasele. Okoro tiri egyu-dɩrɛ gɛtɛ eè di bugyu ɛ tɛ tɩ anlɛ gɛtɛ bɩfɩɩ-kurumakyɛɛ bʋ ba fɔ.>>
6Mɔ gɛtɛ bɛ dɔ̀ Samweli alan, <<Tiri egyu-dɩrɛ gɛtɛ eè gyegeye ɛ tɛ tɩ>> fɔ, wʋn mɛ Samweli ɔsɛ. Okoro e tiri onyun ɛ tɛ Yahwe. 7Gɛ Yahwe ɛ dɔ̀ Samweli alan, <<Nʋn bɛnɩ fɔ baade powu gɛtɛ bɛɛ dɔ̀ wɔ̀ fɔ. Nka awɔ gɛ be terema, mɔ nmɩ gɛ be terema alɛ miin di boogyu-dɩrɛ. 8Boo ye duwi gɛtɛ na tiri bɛ na ye Egyipiti bè sere ma ǹdò fɔ, be tiri bɔɔ bʋnʋn be ye miin koro, gɛ bɛɛ sʋma bekpen. Gɛlɛ ke gɛ bɛɛ mɛ awɔ mɔ lɛ. 9Okoro nʋn baakʋn, mɔ tabʋrʋ tɛ bɛ gepepe, fɔ àà yɛ bɛ bàà nyɩnla ade gɛtɛ egyu-dɩrɛ gɛtɛ eè be di bugyu boo koro, ɛɛ̀ mɛ.>>
10Samweli ɛ dɔ̀ Yahwe wanyun-gyebi fɔ powu ɛ tɛ bɛnɩ gɛtɛ bee lila wɔ egyu-dɩrɛ fɔ. 11Samweli ɛ dɔ̀ bɛ alan, <<Egyu-dɩrɛ gɛtɛ eè be di bugyu yii koro fɔ, ɛɛ̀ nyɩ yii bebi-tenibi ɛ sa bɩtà bʋʋ bɛtàlɛ baanɩ bàà mɛ gʋtʋn ma tiiramisan ɛbɛ ma abengyi, gɛ baà ti serenti tiiramisan ɛbɛ fɔ bɔɔ bʋnʋn bɛ dɩyɛ egyu-dɩrɛ fɔ. 12Ɛɛ̀ mɛ bɛkɩ bɩtà bʋʋ bɛtàlɛ bʋʋ bɛndɩrɛ ɛ tɛ bɩtà bʋʋ bɛtàlɛ nkpɩn ton (1,000), bɛkɩ mɔ baà mɛ bɛndɩrɛ bɛ tɛ bɩtà bʋʋ bɛtàlɛ akpilin anyɔɔ ma fwo (50), gɛ ɛɛ̀ yɛ bɛkɩ mɔ baà fʋn woli fɔ bàà sila oli fɔ wanyan. Ɛɛ̀ yɛ bɛkɩ bàà wɔrɔ bɩtà baakpanyan ma tiiramisan ɛbɛ baanyan. 13Ɛɛ̀ yɛ yii bebi-nanɩbi bàà tɩ̀ mɛ anyɩmɩnyanma ofen bɛ tɛ wɔ, gɛ bɛkɩ baà kpele bɛ tɛ wɔ, bedo mɔ bàà tì kuma boroboro bɛ tɛ wɔ. 14Eè to yɩɩ ntʋnkwaa-kpara, ma yɩɩ wayɩn wo-ili-kpara, ma yii-ilifwi ili-kpara ɛ tɛ wɔ bɛsaranyan. 15Eè to yii-ili yaanyan dikpen fwofɛ, ma yɩɩ wayɩn wo-ili ɛ tɛ wɔ bɛndɩrɛbi ma wɔ bɛsaranyan. 16Eè to yɩɩ bɛsaranyan ma yɩɩ bɛsʋgʋgyan ma yɩɩ bɛkwɔ-kpara ma yaakpɔŋɔ-tɩtɩɩ ɛ mɛ woyo. 17Eè to yaanyan dikpen fwofɛ e ye yɩɩ bɛnan-tonlɛ baanɩ, gɛ ɛyɩ gbagba yaà bɛ mɛ wɔ bɛdɩ̀. 18Gɛ gengyi ɔya wʋtɔkɔ wʋ̀ nɩma fɔ, yaà wula i kpele Yahwe gɛtɛ èè to yɩ ye yiigyu-dɩrɛ gɛtɛ i tiri fɔ walɔ yaanɩ, mɔ Yahwe ɛn nan nʋn yaakʋn.>>
19Mɔ bɛnɩ fɔ bɛn nʋn Samweli wakʋn, gɛ bɛ dɔ̀ alan, <<Kpakpaakpa! Tii len egyu-dɩrɛ gɛtɛ eè di bugyu tii koro. 20Ɛwʋ fɔ taà mɛ anlɛ bɩfɩɩ-kurumakyɛɛ, gɛtɛ bʋ̀ ba egyu-dɩrɛ, gɛ eè gyegeye ɛ tɛ tɩ bɩtà baanɩ.>>
21Gɛtɛ Samweli ɛ nʋn baade powu gɛtɛ bɛ dɔ̀ fɔ, e birima yɩ ɛ dɔ̀ ɛ tɛ Yahwe. 22Yahwe e tiri wuunyun alan, <<Nʋn baakʋn, fɔ àà sɩ̀ egyu-dɩrɛ tɛ bɛ.>>
Gɛ Samweli ɛ dɔ̀ Isareli bɛnɩ fɔ alɛ, ɛkamasɛ e biri ɛ san wo ditele daanɩ.
Markert nå:
1 Samweli 8: ADE
Marker
Del
Sammenlign
Kopier
Vil du ha høydepunktene lagret på alle enhetene dine? Registrer deg eller logg på
2025 Ghana Institute of Linguistics Literacy and Bible Translation