2 MAKABE GƏ̄ 4
4
Simo̰ tetə najə̄ dɔ Oniyas tə́
1Simo̰ nəkɔ́ kə́ kógə̄ḿ beé ń toō ń i nge teē kə gíŕ yá̰a̰ kəngeé dɔɔ́ ō, kə gír ɓēé dɔɔ́ ō ní, nay kə̄ lo tetə najə̄ tə́ dɔ Oniyas tə́ ɓáý. Əda na i Oniyas n na ənī Heliyodor rɔ̄ɔ̄ ō, reē kə yá̰á̰ kə́ tōr̄ gə̄ ń toō dɔn tə́ ō ní. 2Oniyas ń i nge rāā kem majə kə de kə́ kem ɓēé gēé ō, i nge ngɔ̄m̄ ngákṵ́ṵn gə̄ kə́ gír kaa yān tə́ gə̄ ō, i nge kəndā kumən gír ndū najə̄ tə́ kə ngangá ngá̰ý ō ní, Simo̰ nāā kəda na ni na i nge koō naā kə madə̄n gēé dɔ ngé kṵ ɓē gə̄ tə́. 3Kim̄ naā ngeé ń toō a aw̄ i kum kə̄ kété kété, adə̄ de gə̄ ń Simo̰ ɔydə́ ní, aw̄n̄ bátə́ tɔ̄lə̄n̄ de gə̄. 4Oniyas a̰ā̰ kadə̄ kəndā naā nii ngeé ń toō a ojə i yá̰á̰ kə́ majə aĺ ngá̰ý ō, a̰ā̰ kadə̄ Apoloniyus kə́ ngōn̄ Meneste ń i nge kṵ ɓē kə́ Koyelesiri ō, kə́ Penisi ō ní, i nge rāā kadə̄ kem ndul yā Simo̰ aw̄ kə̄ kété ɓáý. 5Anī aw̄ ɓē mbangá, ba aw̄ i kə́ nge sə̄lā gíŕ ngáń ngé ɓē madə̄n gə̄ tə́ alé, banī yá̰á̰ ń kumən i dɔ tə́ ní, i majə kə́ tām̄ yā de gə̄ tə́ malang. 6Tɔdɔ̄ ni a̰ā̰ kadə̄ ré mban̄g un ndūn aĺ anī, lo kadə̄ lɔm a to mbənā ngé kṵ ɓē gə̄ tə́ ní a gətóo ō, Simo̰ a dəba ta kəla rāan kə́ to mbóo gə̄ aĺ ō.
Jaso̰ əndā gúu dɔ de gə̄ tə́ kadə̄ rāān̄ yá̰a̰ kāgə̄ ɓē yā de gə̄ ń i Jipə gə̄ aĺ ní
7Dan ń mban̄g Selokus oy ní, A̰tiyokus ń a ɓāŕnən̄ na i Epipan ní, ndi mban̄g gotən tə́. Anī Jaso̰ kə́ ngōkṵ́ṵ Oniyas, taā kəla nge tun̄ yá̰á̰ kə́ bo kɔ̄ɔ́ jī Oniyas tə́ kə ta róbəneé alé. 8Nin̄ əngen̄ naā kə mbangá anī, ənī ndūn adə̄ mban̄g yā kadə̄n gində̄ arjā̰a̰ kə́ teē tū lambóó tə́ kə́ kɔȳn i kəlōo dūbú kutə kógə̄ḿ ō, gində̄ arjā̰a̰ kə́ kɔy lo kə́ rang tə́ kə́ kɔȳn i kəlōo dūbú jōó kə ɓú jōó ō. 9Tá ənī ndūn adə̄ mban̄g yā kadə̄n gində̄ arjā̰a̰ kə́ kɔȳn i kəlōo dūbú sɔ́ ɓáý tṵ lo ń mban̄g adə̄n ta róbə rāā lo kənī gambəla ō, kújə́ ndóō yá̰a̰ yā balsáá gə̄ ō, adə̄n ta róbə tə́da kutə de kə́ A̰tiyos gə̄ ń ndin̄ Jerusalem ní ō ní. 10Mban̄g ndigə yá̰a̰ gə̄ ń ni dəje ní. Dan nəkɔ́ ń Jaso̰ ənge ta róbə rāā yá̰a̰ gə̄ ń nuū anī, ra kə ngáń ngé ɓē madə̄n gēé kadə̄ kə əya̰n̄ yá̰a̰ kāgə̄ ɓē yādə́ gə̄ ba kə rāān̄ yá̰a̰ kāgə̄ ɓē yā Gərek gə̄. 11Majə ń Ja̰a̰ kə́ bɔbə̄ Opolem əda mban̄g gə̄ adə̄ rāān̄ kə Jipə gēé ní, Jaso̰ mbātə́ kɔ̄ɔ́. I Opolem kə́ ngōn̄ Ja̰a̰ n a əlanən̄ kadə̄ aw̄ əndā jīn gír makətūbūú kadə̄ télən̄ kə́ra madə̄ naā gə̄ ō, kadə̄ madə̄ naā kə́ mbóńg gə̄ tə́ kə to mbənādə́ tə́ kə Rom gēé ō ní. Ndū najə̄ gə̄ ń ɓē a rāań kəla ní, əndā ngəra yá̰a̰ kāgə̄ ɓē gə̄ kə́ aw̄ gō najə̄ yā Nə́ɓā tə́ aĺ ō. 12Rɔ̄n nelə̄n ngá̰ý dɔ rāā lo kənī gambəla tə́ kadə kújə yā Kɔ́ɔ̄ɓē tə́ ō, balsáa gə̄ kə́ ngé ger̄ kənī gambəla gíŕdə́ séngēé majə gə̄ ní, ni mēr̄də́ kṵṵ̄ jākā ɓesə̄ yā Gərek gə̄ ō. 13I beé n de gə̄ malang tetənə̄ń rɔ̄də́ gō yá̰a̰ kāgə̄ ɓē yā Gərek gə̄ tə́ ní. De gə̄ a unən̄ i gō yá̰a̰ kāgə̄ ɓē yā tə̄rā gə̄ kum kə̄ kété kété, ba yá̰a̰ gə̄ ń nuū malang ní, sɔɔ̄ń i Jaso̰. Deē ngeé ń toō i de kə́ majə aĺ ngá̰ý, ni i madə̄ ba̰ā̰ Nə́ɓā ō, asə kadə̄ ni i nge tun̄ yá̰á̰ kə́ bo aĺ ō. 14Ta tɔ̄l̄ ta tə́ ɓáa, ngé tun̄ yá̰a̰ gə̄ nin̄ kɔ́ gə̄, rāān̄ kəla kə́ dɔ dabə tun̄ yá̰á̰ tə́ i kə njadə́. Nin̄ ɓōlə́n̄ gidə kújə yā Kɔ́ɔ̄ɓē tṵ aĺ ō, əya̰n̄ yá̰a̰ tun̄ gə̄ kɔ̄ɔ́ ō. Dan ń oōn̄ kōō yá̰á̰ kə́ kənda anī, ɔtən̄ láẃ ngá̰ý aw̄n̄ lo kənī gambəla tə́ taā yibə̄ ndum kə́ Ndū najə̄ ɔgə̄də́ tə́. 15Usədə́ dɔ yá̰a̰ kāgə̄ ɓē gə̄ ń kaadə́ gə̄ a ɓōlə́n̄ gidə tə́ ní alé ba yá̰á̰ ń nel̄də́ ngá̰ý ní, i yá̰a̰ kāgə̄ ɓē gə̄ ń Gərek gə̄ a rɔȳn̄ ní. 16I tām̄ najə̄ ń toō tə́ n gō tə́ anī ndin̄ dan yá̰á̰ kə́ tōr̄ tə́ ní. Tɔdɔ̄ hál rāā Gərek gə̄ nel̄də́ ō, sāān̄ ndájə̄də́ tū yá̰a̰ gə̄ tə́ malang ō. Ba gō tə́ anī Gərek gə̄ tēlən̄ i madə̄ ba̰ā̰də́ gə̄ ō, ngé rāādə́ yá̰á̰ kə́ tōr̄ ō. 17Deē a ḭḭ bal dɔ Ndū najə̄ gə̄ yā Nə́ɓā tə́ kanjə̄ kənge yá̰á̰ kə́ tōr̄ alé! I yá̰á̰ ń toō n ndɔ̄ gə̄ ń a reēn̄ ní a ɔjən̄ kum ní.
Hál de kə́ Siri gə̄ ṵṵ ɓē dɔ de kə́ Jerusalem gə̄ tə́
18Kə dɔ ɓāl̄ kə́ nge kṵ sɔ́ gə̄ malang ní, de gə̄ a nējə̄n̄ naā kənī gambəla ta kum mban̄g tə́ kem ɓē kə́ Tir tə́. 19Jaso̰ ń i de kə́ yḛr ní, əla kə de kə́ ngé kɔsə kum gotə de kə́ A̰tiyos gə̄ ń ndin̄ Jerusalem ní, kə sə́lē gində̄ arjā̰a̰ ɓú mətá yā tunə̄ń yá̰a̰ kadə̄ ɓesə̄ Herakəles. Banī ngé kətō nar gə̄ ní, nin̄ kɔ́ gə̄ a̰a̰n̄ kadə̄ kun nar ní tunə̄ń yá̰á̰ ní, i yá̰á̰ kə́ əhɔ naā alé, ba ré ngá̰ý a, i yā rāań yá̰á̰ kə́ rang tá. 20Nar ń i kə rī tun̄ yá̰a̰ kadə̄ ɓesə̄ Herakəles ní, ngé reēń gə̄ adə̄n̄ i tām̄ yā rāań to bo gə̄ kə́ yā rɔ̄ɔń.
21Əlan̄ Apoloniyus kə́ ngōn̄ Meneste kadə̄ aw̄ tū yá̰a̰ kūjə́ taā naā yā mban̄g Pilometor tə́ Ejiptə tə́. Lo ń nuū tə́ A̰tiyokus oō kadə̄ mban̄g Pilometor gḛy kum kedə̄ kəjō ɓē yān aĺ ɓá ní, ni gír̄ i dɔ kum kedə̄ ngɔ̄m̄ rɔ̄n nəkɔ́ tə́. Gír̄ ngeé ń toō rāā adə̄ ni aw̄ Jope ō, ra nuú aw̄ Jerusalem ō. 22Jaso̰ ō, de kə́ kem ɓēé gə̄ ō əhɔnən̄ kə̄ rɔ̄də́ tə́ kə rɔyɔ́ ngá̰ý. Nin̄ əndān̄ hor ta ngel̄ gə̄ tə́ adə̄ udəń kem ɓē kə́ Jerusalem tə́ kə kɔŕ rɔ̄nel̄ gēé. Gō yá̰á̰ ń nuū tə́ anī, ni aw̄ kə ngé rɔ̄ɔ̄ yān gēé adə̄ əndān̄ géŕ ger yādə́ dɔ nang kə́ Penisi tə́.
Menelas tél nge tun̄ yá̰á̰ kə́ bo
23Gír ɓāl̄ kə́ mətá gə̄ gān̄g anī, Jaso̰ əla Menelas kə́ ngōkṵ́ṵ Simo̰ ń i kə́ kɔr̄ najə̄ yān kété laā ní, kə naraá kadə̄ adə̄ mban̄g ō, kadə̄ əndāń najə̄ yá̰á̰ kə́ yā rāā láẃ gə̄ naā tə́ majə ō. 24Dan ń aw̄n̄ kə Menelas rɔ̄ mban̄g tə́ ní, ni ɔjə rɔ̄n kadə̄ ni i de kə́ bo ta kum mban̄g tə́, adə̄ əndānən̄ nge tun̄ yá̰á̰ kə́ bo. Lo ń nuū tə́ ni adə̄ sə́lē gində̄ arjā̰a̰ kə́ kɔȳn i kəlōo dūbú sɔ́sɔ́ gírí, adə̄ tɔȳ nge ń Jaso̰ adə̄ ní. 25Lo ń mban̄g adə̄n makətūbə̄ kə́ kadə̄ ndin̄ lo kəla ń nuū tə́ oy anī, ni tél dɔ tə́ reē gogə́ Jerusalem. Tá hálən i hál nge tun̄ yá̰á̰ kə́ bo alé, banī i hál de kə́ kumən ṵṵn aĺ bátə́ kə́ nge rāā de gə̄ yá̰á̰ kə́ tōr̄ ō, ni rāā wūn̄g tītə̄ dā̰ kə́ bembeé beē ō. 26Jaso̰ ń tə̄ɓā ngōkṵ́ṵn nəkɔ́ kə ngamaá ní, ta i dɔn tə́ adə̄ de kə́ rang tə̄ɓān kə ngamaá ō. Adə̄ ni aw̄ dɔ nang kə́ Amanitidə tə́. 27Menelas tā anī kṵ ɓē i jīn tə́, banī ni adə̄ mban̄g nar ń ənī ndūn yā kadə̄n ní alé. 28Tá Sostəratə ń i ngol áskar gə̄ kə́ bo kə́ géŕ ger yā de kə́ Siri gə̄ tə́ Jerusalem ní, dəjen kadə̄ adə̄ nar ní, tɔdɔ̄ i ni n i nge taā lambóo gə̄ ní. Adə̄ mban̄g ɓāŕdə́ jōó mbak. 29Pá tá kadə̄ Menelas aw̄ ní, ni əndā ngōkṵ́ṵn Lisimak gotən tə́ kadə̄ ni i nge tun̄ yá̰á̰ kə́ bo ō, Sostəratə əndā Kərates gotən tə́ kadə̄ ni i ngol áskar gə̄ kə́ Sipər #4.29 Áskar kə́ Sipər: Nin̄ i áskar yā Selosidə gə̄ kə́ ngé rāā kəla gír naraá. ō.
Tɔ̄lə̄n̄ Oniyas
30Dan ngeé ń nuū tə́ ní, de kə́ Tarsə gə̄ ō, kə́ Malos gə̄ ō, əsōn̄ wūn̄g. Tɔdɔ̄ unən̄ ɓē yādə́ adə̄n̄ A̰tiyokis kə́ kābā Mban̄g kadə̄ karī tə́. 31Adə̄ mban̄g əndā de kógə̄ḿ gotən tə́, ba aw̄ láẃ yā kəndā najə̄ ní naā tə́. Deē ń əndān ní i A̰ndəronik. A̰ndəronik i de kógə̄ḿ kə́ dan de kə́ bo gə̄ tə́. 32Menelas a̰ā̰ kadə̄ i ta róbə́ kə́ majə ngá̰ý tām̄ yān tə́. Adə̄ ɓogə yá̰á̰ kə́ rāā kə lɔ́rɔ́ gə̄ kə́ kem kújə yā Kɔ́ɔ̄ɓē tə́, ba adə̄ A̰ndəronik yá̰a̰ gə̄ ní karī. Ɔy kə́rēý gə̄ aw̄ gātəń kem ɓē kə́ Tir tə́ ō, kem ɓē kə́ kadə ɓē kə́ Tír tə́ ō. 33Dan ń Oniyas oō najə̄ ní majə anī, aw̄ ɓɔ̄ɔ̄ rɔ̄n lo kə́ deē a rāā yá̰á̰ kə́ majə aĺ kə deé tū tə́ aĺ tə́, kem ɓē kə́ Dapəne tə́ ngɔr kə̄ A̰tiyos. Ni ndi lo ń nuū tə́ kɔ̄ləń kə Menelas. 34Anī Menelas aw̄ ənge A̰ndəronik lo mundə̄ tə́, ba mērən tɔ̄l̄ Oniyas. Lo ń nuū tə́ A̰ndəronik aw̄ ənge Oniyas ba sorə̄n, adə̄ kemən tetə kə̄ nang tə́. Ni əla jī kṵṵn adə̄n ənīń ndūn. I tītə̄ ń nuū n Oniyas teēń kɔ̄ɔ́ kem kújə ɓesé ní. Banī Oniyas taā kemən mák mák alé. Usə A̰ndəronik dɔ yá̰a̰ rāā kə́ gōtə́ tə́ aĺ kə̄ non tə́, adə̄ tɔ̄l̄ Oniyas kə̄ ta jī tə́ nuū. 35I tām̄ najə̄ ń toō tə́ n yo kə́ kə ta róbəneé aĺ ń toō ń dəngam ń toō oy ní, tōr̄ i Jipə gə̄ ngóý alé, banī i de gə̄ ngá̰ý kə́ nin̄ i Jipə aĺ gə̄ ō ní.
Nge tɔ̄l̄ deē əgā kə̄rā mósə deē ń ɓōkə́ nang tə́ ní
36Dan ń mban̄g ḭḭ kem ɓē gə̄ kə́ Silisi tə́ reē ugə̄ anī, Jipə gə̄ kə́ A̰tiyos reē əngenən̄ najə̄ yo kə́ kə ta róbəneé aĺ ń Oniyas oy ní tə́. Gərek gə̄ gə̄gē ní, najə̄ yo ngeé ń toō nel̄də́ aĺ ngá̰ý ō. 37Rɔ̄ mban̄g A̰tiyokus nelə̄n aĺ ngá̰ý ō, kumən ṵṵn ngá̰ý al̄naā ō. Dan ń əga kemən dɔ kum kedə̄ ō, háĺ kə́ majə yā nge yo tə́ ō anī, mbutə kə̄ nūū tə́. 38Gō tə́ anī wūn̄g rāan, adə̄ əda kadə̄ ɔrə̄n̄ kūbə̄ kə́ kərē ń a ṵṵ̄ ndɔ̄ yá̰a̰ kūjə́ gə̄ tə́ ní kɔ̄ɔ́ rɔ̄n tə́ ō, kə rə́yā̰n̄ kūbə̄ yān gə̄ kɔ̄ɔ́ ō, kə dáȳn̄ seneé kem ɓēé bátə́ kadə̄ ugə̄n̄ seneé lo ń tɔ̄l̄ Oniyas tū tə́ ní tə́ ō. Gō tə́ anī adə̄ tɔ̄l̄nən̄ lo ń nuū tə́. Kɔ́ɔ̄ɓē rāā A̰ndəronik yá̰á̰ kə́ tōr̄ kə́ asə loon tə́ i tītə̄ ń nuū.
Lisimak kə́ ngōkṵ́ṵ Menelas oy
39Dan ngeé ń nuū tə́ ní, Lisimak ɓogə yá̰a̰ nja i ngá̰ý kem kújə yā Kɔ́ɔ̄ɓē tə́ Jerusalem ō, ngōkṵ́ṵn Menelas ndigə dɔ tə́ seneé ō. I beé n yá̰a̰ gə̄ kə́ rāān̄ kə lɔ́rɔ́ i kə́ kɔy kaw̄ń kɔ̄ɔ́ ní. Najə̄ ní ɓār̄ sow, adə̄ kósə de kə́ kem ɓēé gə̄ əsōn̄ wūn̄g. Nin̄ mbātə́n̄ najə̄ gō Lisimak tə́. 40Dan ń kósə de gə̄ ḭḭn̄ sululu kə najá ō, wūn̄g rāādə́ ngá̰ý ō anī, Lisimak tə́lá yá̰a̰ rɔ̄ɔ̄ gə̄ jī de gə̄ kə́ asən̄ dūbú mətá ń nuū tə́ ō, ənī rɔ̄ɔ̄ kə́ kanjə̄ kumən ō. Ba i de kógə̄ḿ kə́ rīn na i Oranos n un dɔ ngé rɔ̄ɔ̄ gə̄ ní. Deē ní ɓālən i ngá̰ý ō, mbóó ngá̰ý ō. 41Dan ń de gə̄ a̰a̰n̄ kadə̄ Lisimak ənīdə́ rɔ̄ɔ̄ anī, de kə́rēý gə̄ ɔyn̄ kūw̄rū mbal̄ gə̄ ō, kə́ madə̄ gə̄ ɔyn̄ sálang gə̄ ō, kə́ rang gə̄ ɔyn̄ bū yá̰á̰ kə́ tun̄ gə̄ ō, ba rɔ̄ɔ̄n̄ de gə̄ yā Lisimak gə̄. I rɔ̄ɔ̄ kə́ əla naā mbitəri. 42Adə̄ ngé kənge do gə̄ i ngá̰ý ō, ngá̰ý gə̄ oyn̄ ō. Gotə gə̄ a̰ȳn̄ naā ō, tɔ̄lɔ̄n̄ nge ɓogə yá̰á̰ kə́ kem kújə yā Kɔ́ɔ̄ɓē tə́ nəkɔ́ ngɔr kə̄ kadə lo ngɔ̄m̄ yá̰a̰ kənge tə́ ō.
Əya̰n̄ Menelas dɔɔ́ kanjə̄ kadə̄ najə̄ i yān
43Rāān̄ sarya kə Menelas najə̄ yá̰a̰ gə̄ ń nuū tə́. 44Dan ń mban̄g reē ugə̄ Tir anī, kum kɔɔ̄ gə̄ kə́ Jerusalem əlan̄ de gə̄ mətá kadə̄ aw̄ ɔjən̄ mban̄g gír najə̄ yādə́. 45Dan ń Menelas ger̄ kadə̄ najə̄ yān a majə aĺ anī, ənī ndūn adə̄ Pətoleme kə́ ngōn̄ Dorimen yā kadə̄n nar kə́ ngá̰ý yā tūrəń kem mban̄g kadə̄ gān̄g sarya kə́ majə tām̄ yān tə́. 46Pətoleme aw̄ kə mbangá gír səláá, tītə̄ kə́ kadə̄ néĺ tóon beé, ba rāā adə̄ mban̄g tūr̄ gír̄ yān. 47Lo ń nuū tə́ mban̄g mbātə́ najə̄ gə̄ ń əndān̄ dɔ Menelas nge rāā yá̰á̰ kə́ majə aĺ gə̄ ń nuū malang tə́ ní. Banī gān̄g sarya yo dɔ ngé rɔ̄ ndoō gə̄ ń de gə̄ əlan̄də́ ní tə́. Tá ngé rɔ̄ ndoō gə̄ ngeé ń toō ní, ré ɔrə̄n̄ najə̄ dɔ rɔ̄də́ tə́ i ta kum tə̄rā kɔ̄r̄ gə̄ tə́ gə̄gē anī, a əya̰n̄də́ kadə̄ aw̄n̄. 48Lo ń nuū tə́ de kə́ mətá gə̄ ń rɔ̄ɔ̄n̄ dɔ ɓē tə́ ō, dɔ gír de gə̄ tə́ ō, dɔ bay tun̄ yá̰á̰ kə́ yā ɓōĺ gidə gə̄ tə́ ō ní, rāān̄də́ yá̰á̰ kə́ tōr̄ kə́ gōtə́ aĺ ń toō kə̄ ta jī tə́ nuū. 49De kə́ Tir gə̄ nin̄ kɔ́ gə̄ gə̄gē najə̄ ní tōr̄də́ ngá̰ý, adə̄ rāān̄ yodə́ ngá̰ý. 50Banī Menelas ngɔ̄m̄ lo kəla yān ndi dɔ tə́ garara, tɔdɔ̄ ngé kṵ ɓē gə̄ i ngé rāā ta nar gə̄. Kem ndul yā Menelas a aw̄ i kum kə̄ kété kété ō, ni i madə̄ ba̰ā̰ ngáń ngé ɓē madə̄n gə̄ kə́ bo ngá̰ý ō.
Markert nå:
2 MAKABE GƏ̄ 4: SARDC
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Bibəl ta Sar̄ © L'Alliance Biblique du Tchad, 2006, 2010.