ລູກາ 11
11
ພຣະເຢຊູເຈົ້າຊົງສັ່ງສອນເຖິງເລື່ອງການພາວັນນາອະທິຖານ
(ມທ 6:9-13; 7:7-11)
1ໂມຍຕະໄງ ພຣະເຢຊູເຈົ້າກຳລັງພາວັນນາອະທິຖານໂກຼນືສະຖານທີ່ແຫ່ງໂມຍ ເມື່ອພຣະເຈົ້າພາວັນນາອະທິຖານຈົບສະສາວົກມີຣາກໍເບົ່າເກິພຣະອົງວ່າ, “ພຣະອົງເຈົ້າເອີຍ, ຂໍສອນເອີນຂ້ານ້ອຍວ່າຈະເບົ໋າເປະເຕເຮິເວລາທີ່ເອີນຂ້ານ້ອຍພາວັນນາອະທິຖານ ເປະໂຢຮັນບັບຕິສະໂຕປິດສອນເອີນສາວົກທິເຫີ.”
2ແລ້ວພຣະເຢຊູເຈົ້າເບົ໋າແກ່ເອີນເຫີວ່າ, “ເມື່ອໄປພາວັນນາອະທິຖານເຖິງພຣະເຈົ້ານັ້ນ ຈົ່ງເບົ໋າດັ່ງແນັ:
‘ຂາ້ແດ່ພຣະບິດາເຈົ້າ
ຂໍເນພຣະນາມທິພຣະອົງ
ເປີຍທີ່ເຄົາລົບບູຊາ
ຂໍເນຣາຊອານາຈັກທິພຣະອົງ
ເຈິະຕັ້ງໂກຼປຶງໂລກແນັເຖີດ.
3ຂໍໂຜດປະທານເຂົ້າຈີ່ປະຈຳຕະໄງ
ທີ່ເອີນຂ້ານ້ອຍຕ້ອງການ
4ຂໍອະໄພບາບກຳ
ອຳເອີນຂ້ານ້ອຍດ້ວຍເທີ້ນ
ເປ໋ະ, ເອີນຂ້ານ້ອຍເຢີກຄວາມຜິດ
ຄວາມບາບອຳໂຕດສະເນ໋ະ
ທີ່ປືຼມຜິດຕໍ່ເອີນຂ້ານ້ອຍເຢຍ,
ແລະຂໍມະໂຕ່ຍເອີນຂ້ານ້ອຍມູດ
ນືການທົດລອງ.’”
5ພຣະອົງຊົງເບົ໋າເກິຫາມາຍວ່າ, “ນືໄປໃມ໋ເມົ໋າທີ່ຄະເນີຍມີຣາ ແລະບັດເຕິກທັຽງເມົ໋າທີ່ຄະເນີຍເຢຍແລະເຕິກທັຽງເມົ່າເຮິເວລາມັງ ແລະເບົ໋າວ່າ, ‘ເມົ໋າເອີຍ, ຂໍເນສີນາຢືມແຟຕັກແປຕວຼຍແດ່. 6ເພາະເມົ໋າມີຣາທິນາຜູ້ທີ່ເດີນໂຕຼງເຈິະສະນາມທິນາ ແລະນາຢີໃມ໋ຈານາຈະເນລາວຈາ.’
7ສົມມຸດວ່າເມົ໋າທິໄມທີ່ໂກຼຮານືສະນາມ ເພຼີບວ່າ, ‘ມະລົບກວນນາໂຢະ ຄະມອງກໍປ໋ອງສະ ແລະເອີນກອນທິນາ ກໍງັນໂກຼເກິນາໂຕດສະ ເອືອຕຶກຈ໋ອກອຳໄມຢີປິດດອກ.’ 8ນາເບົ໋າໄປຕຼຸບສະເນ໋ະວ່າ, ເຖິງແມ່ນລາວ ຈະຢີຕຶກຈ໋ອກປອຣ໌ອຳໄມ, ເພາະວ່າເປີຼຍເມົ໋າທິລາວ ແຕ່ລາວກໍຈະຕຶກຈ໋ອກທຸກສິ່ງທີ່ໄມຕ້ອງການ ເພາະໄມຢີກາມາກາເມີທີ່ຈະລາຕໍ່ໄປ.
9ຝ່າຍນາຈຶງເບົ໋າແກ່ໄປວ່າ, ຈົ່ງດຸລາ ແລະ ໄປຈະປິດຮັບ ຈົ່ງດຸທັຽງ ແລະໄປຈະປິດຕາຍ ຈົ່ງດຸຕັ້ງເຄ໋ຍ ແລະຄະມອງຈະເປີກອຳທ່ານ. 10ດ້ວຍວ່າ, ໂຕດສະເນ໋ະທີ່ດຸລາ ກໍປິດຮັບ ປີນຸ໋ຍທີ່ດຸທັຽງ ກໍປິດພະ ແລະກັອນທີ່ດຸຕັ້ງເຄ໋ຍ ກໍຈະໃມ໋ຜູ້ເປີກຄາມອງອຳ.
11ກັອນນືໄປທີ່ເປີຼຍບະຈະຈ໋ອກພິ໋ອຳກອນກາລໍທິໄມບໍ ເມື່ອກອນທິໄມລາຕຼື? 12ແລະຢີໃມ໋ກັອນຈະຈ໋ອກສິໂທຍອຳກອນຈາ ເມື່ອກອນລາກາແລ? 13ດັ່ງນັ້ນ ໄປຜູ້ເປີຼຍປີນຸ໋ຍບາບ ກໍນະຈືຈ໋ອກຂອງເຣາະອຳແກ່ກອນທິຕົນ ທຳເປີງເຢຍອີກຕະມາ ພຣະບິດາເຈົ້າທິໄປ ຜູ້ທີ່ສະຖິດໂກຼນືສະຫວັນ ກໍຈະປະທານພຣະວິນຍານບໍຣິສຸດເຈົ້າ ແກ່ປີນຸ໋ຍທີ່ລາເກິດພຣະອົງ.”
ພຣະເຢຊູເຈົ້າພິສູດວ່າພຣະອົງຢີປິດໃຊ້ອຳນາດທິມານຊາຕານ
(ມທ 12:22-30; ມຣກ 3:20-27)
14ໂມຍຕະໄງ ພຣະເຢຊູເຈົ້າປິດໂຕຼະປະຕູປຼ໋ະປຼີຢີເຣາະທີ່ປືຼມເນກາລໍປີນຸ໋ຍເຢຍມາງຢີປິດ ເມື່ອປຼ໋ະປຼີເຍືອຍເຕິກສະ ກາລໍປີນຸ໋ຍເຢຍລາວກໍເລີ່ມມາງປິດ ຝ່າຍປະຊາຊົນທີ່ໂກຼທີ່ເຢຍຕ່າງກໍແປກໃຈ, 15ແຕ່ໃມ໋ປະຊາຊົນບາງຄົນເບົ໋າວ່າ, “ແມ່ນຊາຕານ#11:15 ຊາຕານ ແມ່ນຫົວໜ້າທິປຼ໋ະປຼີຢີເຣາະທີ່ອຳ ອຳນາດແກ່ປີນຸ໋ຍແນັໂຕ໋ະປະຕູປຼ໋ະປຼີຢີເຣາະເຍືອຍ ປະຊາຊົນນະໃຊ້ທີເນາະທິລາວເຜີອ້າງເຖິງຊາຕານ ນາຍທິປຼ໋ະປຼີຢີເຣາະທີ່ອຳອຳນາດແກ່ພຣະເຢຊູເຈົ້າ ຈຶ່ງສາມາດປະຕູປຼ໋ະປຼີເຍືອຍປິດ.”
16ໃມ໋ປີນຸ໋ຍອື່ນທີປິດທົດສອບພຣະອົງ ຫາມາຍລາເນພຣະອົງສະແດງການອັດສະຈັນ ແລະຣິດເດດອຳນາດທີ່ເຈິະເກິດສະຫວັນ. 17ແຕ່ພຣະເຢຊູເຈົ້າຈືວ່າ ຫາມາຍກຳລັງຄຶດເປະເຕ. ດັ່ງນັ້ນ ພຣະອົງຈຶ່ງເບົ໋າແກ່ຫາມາຍວ່າ, “ປະເທດອາເຕ ທີ່ປະຊາຊົນປະນາກເຍືອຍເປີຼຍກຸ່ມຕໍສູ້ກັນເອງ ປະເທດເຢຍ ກໍຈະຕາເປິສະລະສະສາຍ ຫຼື ໂມຍຄອບຄົວ ທີ່ສະມາຊິກເຮິຄອບຄົວຕໍສູ້ກັນເອງ ສຸດທ້າຍຄອບຄົວເຢຍກໍຈະແຕກແຍກກັນ. 18ມີສະເນີ ຖ້າຊາຕານ ແລະຜູ້ທີ່ໂກຼອານາຈັກທິໄອແຕກແຍກ ແລະຕໍ່ສູ້ກັນເອງ ອານາຈັກທິເມົ໋າໄອຈະຕັ້ງໝັ້ນຄົງໂກຼປິດເປະເຕ? ໄປເບົ໋າວ່ານາປາຕູເມົ໋າປຼ໋ະປຼີຢີເຣາະເຍືອຍ ເພາະຊາຕານປິດອຳ ອຳຣິດອຳນາດເຮິການປຼືມເປະແນັ. 19ຖ້າແນັແມ່ນວິທີ ທີ່ນາປະຕູເອີນໄອເຍືອຍໂດຍຊາຕານ ຜູ້ທີ່ຕິດຕາມທິໄມຈະປະຕູປຼ໋ະປຼີຢີເຣາະເຍືອຍປິດເປະເຕ? ດັ່ງນັ້ນຜູ້ຕິດຕາທິໄມເອງ ຈະຕັດສິນວ່າທ່ານເປຼີຍຜູ້ຜິດ 20ແຕ່ນາປະຕູປຼ໋ະປຼີຢີເຣາະເຍືອຍດ້ວຍອຳນາດທິພຣະເຈົ້າ. ດັ່ງເຢຍ ຣາຊອານາຈັກທິພຣະເຈົ້າປິດເຈິະພຶ໋ໄປສະ.
21ພຣະເຢຊູເຈົ້າສອນຕໍເຕິກວ່າ ຊາຕານເປຼີຍເປະແຂງແຮງ ຈຽງອາວຸດຕຽມພ້ອມໂຕດແອ ຈຳສະນາມທິຕົນ. 22ແຕ່ເມື່ອໃມ໋ກາລໍທີ່ແຂງແຮງກວ່າໂຈມສົກລາວ ແລະຊະນະລາວ ລາວຈ໋ອກອາວຸດໂຕດແອເກິດກາລໍປີນຸ໋ຍເຢຍ ແລະຊັບສິນໂຕດແອ ທີ່ເຈົ້າຂອງສະນາມໃມ໋ໂກຼ ແລະປານາກຊັບສິນໂຕດແອທີ່ລາວຍາດຈ໋ອກປິດເຢຍອຳເກິເມົ໋າທິລາວ.
23ກັອນທີ່ຢີປິດໂກຼເກິນາ ກໍແມ່ນຜູ້ຕໍ່ສູ້ນາ ແລະກັອນທີ່ຢີປິດປຼືມວຽກເກິນາ ຜູ້ນັ້ນກໍຕໍຕ້ານນາ.”
ປຼ໋ະປີຼກະເຈົ໋າບີງເຈິະສະນາມເຕີ
(ມທ 12:43-45)
24“ເມື່ອປຼ໋ະປຼີຢີເຣາະເຍີ໋ືອຍເຈິະເກິດກັອນສະ ໄອກໍທຽວເຕິກເຈິະເຮິປະເຕ໋ຍຮາຣອຍຮາຣຳ ເພື່ອທຽັງບ່ອນຍຳເຊົ່າອາສາ ເມື່ອໄອທັຽງບ່ອນຜັກພອນຢີປິດ. 25ໄອກໍເບົ໋າວ່າ, ‘ນາຈະບີງເຈິະເຮິສະນາມທິນາບ່ອນ ທີ່ນາປິດຕຼໍໂຕະປະຕູເຈິະ.’ ດັ່ງນັ້ນ ເມື່ອປຼ໋ະປຼີບີງເຈິະທັຽງປີນຸ໋ຍເຢຍ ໄອກໍຈືວ່າປີນຸ໋ຍເຢຍເປຼີຍເປະສະນາມທີ່ສະອາດ ແລະເປຼີຍລະບຽບຮຽບຮ້ອຍ. 26ແລ້ວໄອກໍເຍືອຍເຕິກໂຕ໋ຍຈ໋ອກປຼ໋ະປຼີຢີເຣາະເປິ໋ປອມ ທີ່ກະເຈົ໋າເຣງເປີງໄອເອງ ແລະເມົ໋າໄອເຈິະອາໄສໂກຼທີ່ນັ້ນ ດັ່ງນັ້ນ ສະພາບທິປີນຸ໋ຍເຢຍແມ່ນກະເຈົ໋າເຣງເປີງເຕີເຮິຕອນທຳອິດ.”
ຄວາມສຸກມາດ
27ຫລັງຈາກພຣະເຢຊູເຈົ້າເບົ໋າຖ້ອຍຄຳເຫຼົ່າເຢຍສະ ກໍໃມ໋ຕາເຣປີມີຣາເຮິເມົ໋າປະຊາຊົນເບົ໋າເກິພຣະອົງວ່າ, “ຕາເຣທີ່ອຳກຳເນີດ ແລະຈຽມຮາເລທ່ານ ຄວນໃມ໋ຄວາມສຸກທຳທີ່ສຸດ!”
28ແຕ່ພຣະເຢຊູເຈົ້າເພີຼບນາງວ່າ, “ປີນຸ໋ຍໂຕດສະເນ໋ະທີ່ປິດຕະເມິ່ງຖ້ອຍຄຳທິພຣະເຈົ້າ ແລະປືຼມຕາມກໍໃມ໋ຄວາມສຸກທຳເປີງເຢຍອີກ.”
ປະຊາຊົນລາເນປືຼມເຫດການສຳຄັນ
(ມທ 12:38-42; ມຣກ 8:12)
29ເຮິຂະນະທີ່ປະຊາຊົນປະໂຊມກັນອ້ອມພຣະເຢຊູເຈົ້ ພຣະອົງເບົ໋າຕໍ່ເຕິກວ່າ, “ປີນຸ໋ຍສະໄໝ່ແນັ ຢີເຣາະພຽນເຕ ຫາມາຍລາເນປຼືມການອັດສະຈັນ ແຕ່ຈະຢີໃມ໋ກັອນອຳປິດ ນອກຈາກອັດສະຈັນທິໂຢນາ. 30ເຮິແບບດຽວກັນນັ້ນ, ຜູ້ທຳນວາຍໂຢນາເປຼີຍໝາຍສຳຄັນອຳແກ່ຊາວເມືອງນີເນເວ ສະນັ້ນ ກອນມະນຸດກໍຈະເປຼີຍໝາຍສຳຄັນສຳລັບປະຊາຊົນເຮິສະໄໝ່ແນັ. 31ເຮິຕະໄງພິພາກສາ ລາຊີນີແຫ່ງເຊບາຈະເຊິງຕຶກ ແລະກ່າວຫາປະຊາຊົນໂຕດໆຕະໄງແນັ ເພາະນາງເຈິະທີ່ແນັເກິດເມືອງທີ່ສະງາຍທຳ ເພາະນາງໂງນຕາເມິງຄຳສັ່ງສອນທິກະສັດໂຊໂລໂມນອັນພິງເຕິກດ້ວຍສະຕິປັນຍາ ແຕນາເບົ໋າໄມໂຕດສະເນ໋ະຕາມມາດວ່າ ຜູ້ທີ່ຍິງໃຫຍ່ເປີງໂຊໂລໂມນກໍໂກຼທີ່ແນັແຕ່ໄປຢີໂຍມຕາເມິງເຫີ. 32ເຮິຕະໄງແຫ່ງການພິພາກສາ ປະຊາຊົນເມືອງນີເນເວຈະຊຶງຕຶກເບົ໋າໂທດໄປ ເພາະວ່າຫາມາຍປິດປາລັກເກິດບາບທິຫາມາຍ ເມື່ອຫາມາຍປິດຊ໋ອງຄຳສັ່ງສອນທິໂຢນາ ແລະນາເບົ໋າໄມວ່າ ມີຣາທີ່ຍິ່ງໃຫຍ່ເປີງໂຢນາກໍໂກຼທີ່ແນັ ແຕ່ທ່ານປະຕິເສດທີ່ຈະກັບໃຈ.”
ຄວາມສະອາງທິຈັກເຈນ
(ມທ 5:15; 6:22-23)
33“ຫຼັງຈາກນັ້ນພຣະເຢຊູເຈົ້າປິດເບົ໋າວ່າ ຢີເຄີຍໃມ໋ປີນຸ໋ຍອາເຕ ເມື່ອຕາມວນໂຄມອູນສະ ຕຼວກທົວະເຮິບ່ອນທີ່ປີນຸ໋ຍຢີຕາຍ ຫລືຈ໋ອກມູດທົວະເຮິກະຕາ, ແຕ່ເຄີຍຕັ້ງທົວະປຶງຊີຣົງເຜີວ່າປີນຸ໋ຍທີ່ມູດເຈິະ ຈະຕາຍແສງອູນເຢຍ. 34ມັດທິໄມເປຼີຍເປະເກິໂຄມອູນສຳລັບຈັກເຈນ ເມື່ອມັດທິໄມແຈ້ງເປີຼຍປົກກະຕິ ຈັກເຈນໂຕດພາກສວນກໍແຈ້ງມີສະເນີ, ແຕ່ເມື່ອມັດທິໄມຢີແຈ້ງເປີຼຍປົກກະຕິ ຈັກເຈນໂຕດພາກສ່ວນກໍໂກນືຄວາມຮາງົມ. 35ດັ່ງນັ້ນ ຈົ່ງລະຫວັງເນເຣາະ ໂທງວ່າຄວາມສະອາງທີ່ໃມ໋ໂກຼເຮິໄມເຢຍຮາງົມຕູ. 36ຖ້າຈັກເຈນທິໄມໂຕດພາກສວນພີງດ້ວຍຄວາມສະອາງ ຄືຢີໃມ໋ສ່ວນອາເຕໂກຼເຮິຄວາມຮາງົມໄອກໍຈະສະອາງເຕິກໂທຼ ດັ່ງນັ້ນ ເມື່ອໂຄມອູນສອງແສງເຈິະທັຽງໄມດ້ວຍຄວາມສະອາງ.”
ພຣະເຢຊູເຈົ້າຕຳນິເມົ່າຟາຣີຊາຍ ແລະເມົ໋າຄູສອນກົດໝາຍ
(ມທ 23:1-36; ມຣກ 12:38-40)
37ຂະນະທີ່ພຣະເຢຊູເຈົ້ານະເບົ໋າ ກໍໃມ໋ປີນຸ໋ຍຟາຣີຊາຍມີຣາ ເຊີນພຣະອົງເຕິກຈ໋ອງປອຣ໌ທີ່ສະນາມທິຕົນ ດັ່ງນັ້ນພຣະເຢຊູເຈົ້າຈຶ່ງເຕິກທີ່ສະນາມທິຟາຣີຊາຍ ແລະກຳຈ໋ອງປອຣ໌. 38ປີນຸ໋ຍຟາຣີຊາຍ ກໍແປກໃຈເມື່ອຕາຍວ່າ ພຣະເຢຊູຢີປິດຣາວຕີຕາມປະເພນີນອຣ໌ຈ໋ອງປອຣ໌. 39ດັ່ງນັ້ນ ພຣະເຢຊູເຈົ້າເບົ໋າແກ່ລາວວ່າ, “ບັດແນັເອີນຟາຣີຊາຍເອີຍ ໄປເປຼີຍເປະປີນຸ໋ຍຣາວຖ້ວຍເນສະອາດແຕ່ເກິດນອກ ແຕ່ຂີ້ຝຸ່ນທີ່ໂກຼຮານືເນົາທ່ານຢີປິດຣາວ ເພາະວ່າໄມຣາວຕີທິໄມຢ່າງລະມັດລະຫວັງ ແຕ່ໄມຢີສົນໃຈຄວາມໂລບ ແລະຄວາມຊົ່ວທີ່ໂກຼຮານືເກຼີມທິໄມ. 40ໂອ ປີນຸ໋ຍໂງ່ເອີຍ ໃມຈືຮາເລ໋າະວ່າພຣະເຈົ້າ ຜູ້ປືຼມຈັກເຈນທິທ່ານນະປິດປືຼມຈິດໃຈທິທ່ານ? 41ສະນັ້ນ ມະໂລບແລະປຼືມຊົ່ວ ແທນທີ່ຈະປານາກຊັບສົມບັດທິທ່ານທີ່ໂກຼຮານືຈອກ ແລະຖ້ວຍທິທ່ານອຳປີນຸ໋ຍທ໋ອກຍາກ ແລະຫຼັງຈາກນັ້ນ ຂ້າພະເຈົ້າເບົ໋າທ່ານ ຕຼຸບເກຼີມ ແລະຈັກເຈນທິທ່ານຈະຕ້ອງສະອາດ.”
42“ແຕ່ວິບັດແກ່ໄປ ເອີນຟາຣີຊາຍເອີຍ ໄປຖວາຍໂມຍສ່ວນມາເຈັດ ເຮິແນວຕຳຕາມລະດູການແກ່ພຣະເຈົ້າ ຄືຜັກກ້ານກໍ່າ ຜັກແພວ ແລະຜັກອື່ນໆໂຕດຊະນິດ, ແຕ່ໄປລະເລີຍຄວາມຍຸດຕິທຳຕໍ່ປີນຸ໋ຍອື່ນ ແລະຮັກພຣະເຈົ້າ ພ້ອມທັງມອບສວນມາເຈັດທິສິ່ງຂອງທິໄມອຳເກິພຣະເຈົ້າ.”
43“ວິບັດແກ່ໄມ ເອີນຟາຣີຊາຍເອີຍ ໄປເມີດກຳບ່ອນໃມ໋ກຽດນືທຳມະສາລາ ແລະເມີດອຳປີນຸ໋ຍຄຳນັບດ້ວຍຄວາມນັບຖືຕິຕາຕີຕະຫລາດ. 44ວິບັດແກ່ໄປ ໄປເປີຼຍເປະບ່ອນຕົບໂຣງ ທີ່ປີນຸ໋ຍຢີສັງເກດຈືຕາຍ ເປີຼຍບ່ອນທີ່ປີນຸ໋ຍໂຕດສະເນ໋ະຕືເຕິກເຈິະໂດຍຢີຈືວ່າໃມ໋ເມ໋າະ.”
45ຈາກນັ້ນກໍໃມ໋ຄູສອນກົດບັນຍັດມີຣາ ເບົ໋າຕໍພຣະເຢຊູເຈົ້າວ່າ, “ອາຈານເອີຍ ເມື່ອທ່ານເບົ໋າເປະແນັ ທ່ານກໍເບົ໋າໝຶນປະໝາດສີນາມີສະເນີ.”
46ພຣະເຢຊູເຈົ້າເພຼີບວ່າ, “ວິບັດໃມ໋ແກ່ທ່ານ ຄູສອນກົດບັນຍັດຕຼຸບສະເນ໋ະ ທ່ານຮຽກຮ້ອງເນປະຊາຊົນເຊີຕາເມິງກົດລະບຽບທໍາທີ່ຫາມາຍຢີປະຕິບັດຕາມ ໃອຄືເປະວ່າໃມເປຼເຄື່ອງກັນສຶກທົວະປຶງປືດທິເອີນໃອທີ່ກັນສຶກເກີນໄປທີ່ຫາມາຍຈະກ່ອຍປິດ ເຮິຂະນະທີ່ຈັກທ່ານເອງຢີປິດປຼືມເນຄວາມພະຍາຍາມພຽງກາເລດທີ່ຈະຊ່ວຍເນຫາມາຍເຊີຕາເມິງ ປະຕິບັດຕາມກົດລະບຽບເຫຼົ່າແນັ. 47ວິບັດແກ່ໄປ ໄມປືຼມອຸບມຸງອັນເຣາະອຳຜູ້ທຳນວາຍໂຕດສະເນ໋ະ ຜູ້ປະກາດພຣະທໍາທີ່ບັນພະບຸລຸດທິໄມຕຼໍກາເຈດ. 48ໂດຍການປຼືມສິ່ງແນັຈັກທ່ານເອງໂຢມຮັບວ່າທ່ານໂຢມຮັບນືສິ່ງທີ່ ແລະທ່ານຢືນຢັນນືສິ່ງທີ່ບັນພະບຸລຸດທິທ່ານປິດປຼືມ ຫາມາຍປິດກາເຈດເອີນຜູ້ທໍານວາຍ ແລະທ່ານສືບຕໍ່ປຼືມວຽກທິຫາມາຍໂດຍປຼືມອຸບມຸງທິຫາມາຍອໍາແກ່ໂຣງເຫຼົ່ານັ້ນ. 49ດ້ວຍເຫດແນັ ພຣະເຈົ້າຈຶ່ງເບົ໋າວ່າ, ‘ນາ ຈະໃຊ້ເອີນຜູ້ທຳນວາຍ ແລະ ເອີນອັກຄະສາວົກເຈິະທັຽງຫາມາຍ, ແຕ່ຫາມາຍຈຶ່ງກະເຈດບາງຄົນ ແລະຈະຂົ່ມເຫັງບາງຄົນ.’ 50ດັ່ງນັ້ນ ປະຊາຊົນນືສະໄໝແນັຈະຕຼໍລົງໂທດຍ້ອນການ ເກດ ຜູ້ທຳນວາຍຕຼຸບສະເນ໋ະເຊັດການປຼືມໂລກມາ, 51ຈາກການກາເຈດທິອາເບັນ ຈົນພຶ໋ການກາເຈດທິເຊກາຣີຢາ ຜູ້ທີ່ຕຼໍກາເກດໂກຼລະຫວ່າງແທ່ນບູຊາ ເກິພຣະວິຫານ ມາດສະ ນາເບົ໋າໄມວ່າ ປີນຸ໋ຍສະໄໝແນັຈະຕຼໍລົງໂທດໂຕດແອຄືປະກອບໃມ໋ຜູ້ທຳນວາຍໂຕດສະເນ໋ະ.”
52“ວິບັດແກ່ໄມ ເອີນຄູສອນກົດບັນຍັດເອີຍ ເພາະໃມຈະຈ໋ອກກອນກະແຈທີ່ຈະເປີກຄະມອງສູ່ການຈືພຣະເຈົ້າຈາກຜູ້ປີນຸ໋ຍ ໃມເອງຈະຢີມູດ ແລະໃມຈະຢຸດເອີນທີ່ພະຍາຍາມຈະມູດ.”
53ເມື່ອພຣະເຢຊູເຈົ້າເຍືອຍເກິດບ່ອນເຢຍ ເອີນຄູສອນກົດບັນຍັດແລະເອີນຟາຣີຊາຍເລີ່ມຕໍາໜິພຣະອົງຢ່າງຂົ່ມຂື່ນ ແລະເຕືອນພຣະອົງກ່ຽວກັບທໍາເລື່ອ, 54ເອີນຫາມາຍພະຍາຍາມວາ່ງຕັຼກກັບດັກອໍາພຣະອົງ ແລະຣັບພຣະອົງເບົ໋າຜິດ.
Markert nå:
ລູກາ 11: LVI
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
La vy Bible by Beyond Translation is licensed under Creative Commons Attribution-ShareAlike 4.0 License.
